2 TESALONICENSES 3 - Quichua Imbabura Bible

Diospaj Shimitaca alicachinami

1Huauquicuna, panicuna, caigutapash nipanchimi: Apunchi Jesusmanda villajuj Shimita canguna chasquishcashnallata, maipi cashpapash alicachishpa ucha chasquichun, ñucanchimanda Diosta mañapanguichi.

2Jesustaca, na tucuicuna cringapaj munanllu. Chai jatun nalita ruraj, nali runacunapaj maquimanda Dios ñucanchita cacharichumbash mañapanguichi.

3Ashtahuangarin Apunchi Jesusca, pai imata rurasha nishcataca pactachij cashpami, shinllitapacha cangunaman ushaita carashpa, ima nalimandapash huacaichishpa charinga.

4Ñucanchi imata mandashcatapash, Apunchi Jesusta yariashpami, aliguta ruranajunguichi. Chashna rurashpa canguna catinataca yachanchimi.

5Taita Dios juyajujtaca, Apunchi Jesucristo cangunapj shungupi yarichijuchunmi munanchi. Shinallata paishnalla na ñapash fiñarishpa causachumbash, ushaita carachunmi munanchi.

Imagutapash rurashpa causachunmi yachachishca

6Huauquicuna, panicuna, ñucanchi Apunchi Jesucristopaj shutipimi, cashna mandanchi: Ñucanchi yachachishcata na cazushpa, imatapash na rurashpa purinajuj crijcunahuanga, na tandanajunachu canguichi.

7Ñucanchi imata rurashpa causashcatapash yaringuichimi. Cangunapash, shinallatami rurashpa catina canguichi. Ñucanchica cangunahuan cashpaca, na yanga maitapash purishpami, imatapash aliguta rurarcanchi.

8Shinallata pipaj micunatapash na yanga micushpa purishcachu canchi. Ashtahuangarin cangunapajpi ama yanga micungapaj, pitapash ama mañangapajmi, tutapash punllapash na samashpa imagutapash rurarcanchi.

9Cangunaca, ñucanchimanmi carana carcanguichi. Ashtahuangarin canguna ñucanchita shina rurajta ricushpa shinallata catichunmi, shina causarcanchi.

10Cangunahuan cashpaca, cashnatami mandarcanchi: Maijambash imata ruranatapash na munashpaca, micuitapash ama micuchun nircanchimi.

11Canguna puramanda huaquingunaca, yachachishcata na cazushpa, imata rurangapajpash na munashpami, shujcunapaj huasicunapi chayaj tucushpalla purinajun nijtami uyanchi.

12Shina purijcunataca, cangunallata cushijuihuan imagutapash rurashpami micuna canguichi nishpami, Apunchi Jesucristopaj shutipi aliguta yarichishpa mandanchi.

13Huauquicuna, panicuna, cangunaca ima aliguta ruranatapash na saquinachu canguichi.

14Cangunaman cashna nishpa escribimushcata, maijambash na cazungapaj munajtaca ricuchipanguichi. Paihuanga, pai pingai tucushpa llaquirichunmi, na tandanajuna canguichi.

15Ashtahuangarin paitaca na fiñashpami, crijtashnalla shinlli tacurishpa yarichina canguichi.

Dios bendiciapachun nishpami tucuchishca

16Ali casilla causaita caraj Apunchi Jesusca, tucui causaipi casilla ali causaiguta cangunaman carajuchunmi munanchi. Apunchi Jesusca, tucui cangunahuan causachun ninchimi.

17Ñucaca Pablomi cani. Ñuca quiquin maquihuambacha cashna escribishpami, cangunataca alillachu capanguichi nishpa cachamuni. Tucui cartacunapillatami, rijsinallatapacha escribishpa cachani. Cashnami escribipani.

18Ñucanchi Apunchi Jesucristopaj ninan juyaipash, tucui cangunahuan cachun ninmi. Shina cachun.