APOCALIPSIS 11 - Quichua Imbabura Bible

Ishcai villajcunamandami villajun

1Chai jipaca, medina varashnalla sucusta cushpami, cashna nihuarca: “Jatari, Taita Diospaj huasitapash, altartapash medigri. Shinallata Diospaj huasipi mañajcunatapash cuentangui.

2Ashtahuangarin Diospaj huasi canlla patiotaca, na medinachu. Chaitaca, na israelcunaman cushcami. Na israelcunami, Diospajlla pueblotaca, chuscu chunga ishcai quillacaman llaquichishpa purinajunga.

3Ñucamanda ishcai villajcunatami, huaranga ishcai patsaj sucta chunga punllacaman, cañamuta churajushpa, ima tucunatapash villanajunga” nihuarcami.

4Chai ishcai villajcunaca, cai pachata mandaj Taita Diospaj ñaupajpi shayanajuj ishcai olivos quirucuna, ishcai candelerocunami.

5Paicunata maijambash llaquichingapaj munajtaca, paicunapaj shimimanda nina llujshishpami, rupachishpa huañuchinga. Maijambash paicunata llaquichingapaj munaj runaca, chashnallatami huañunga.

6Dios ima nishcata paicuna villanajui punllacunapi, ama tamiachunmi jahua pachata vichangapajpash ushaita charin. Shinallata yacucunata yahuarman tigrachitapash ushanmi. Cai pachatapash, shuj shuj llaquicunahuan, mashna viajecaman munashpapash, llaquichi ushanmi.

7Paicuna villaita tucuchijpimi, manllanayai animalca, manllanayai ucu ucu utujumanda llujshishpa, paicunahuan macanajunga. Shina macanajushpami, chai villajcunataca mishashpa huañuchinga.

8Shina huañuchijpimi, jatun pueblopi tiaj plazapi sirinajunga. Ñucanchi Apunchi Jesustapash, chai pueblopillatami chacatashpa huañuchirca. Jatun pueblo nishpaca, Sodoma shuti, Egipto shuti llactacunatami chashna nijun.

9Shuj gentecuna, shuj aillucuna, shuj rimaicunata rimajcuna, shuj llactacunapi causajcunami, paicuna huañushcataca, quimsa punlla chaupicaman sirinajujta ricunga. Shina ricushpapash, pambachunga na saquingachu.

10Cai pachapi causajcuna paicunata ricushpaca, ninandami cushijunga. Profeta chai ishcai runacunaca, cai pachapi causajcunatami ninanda llaquichirca nishpami, ninanda cushijushpa ima caranacunatapash, caishuj chaishuj cachanajunga.

11Ashtahuangarin quimsa punlla chaupi tucujpimi, Taita Diosca causaita caraj espirituta paicunapi churajpi, cutin jatarishpa shayarinajurca. Shina causarijta ricushpami, chai ricunajushca gentecunaca ninandapacha manllarinajurca.

12Chai ishcai villajcunaca, jahua pachamandami: “Jahuaman vichai shamuichi” nijta uyarca. Shina uyashpaca, fuyupi jahua pachaman rircallami. Shina rijtaca, paicunata na ricunayachij gentecunapashmi ricurca.

13Paicuna rinajujpillata alpa mama ninanda cuyushpami, chai pueblopi huasicunataca, chunga parteta urmachishpa, canchis huaranga gentecunata huañuchirca. Na chaipi huañujcunaca, ninandapacha manllarishpami, jahua pacha Taita Diosta ninanda alicachinajurca.

14Ña ishcai llaquicunaca yalirca. Ashtahuangarin quimsa llaquicunami, ña shamugrin.

Suctapaj cati angelpashmi, trompetata huacachishca

15Suctapaj cati ángel trompetata huacachijpica, jahua pachapi cashna nishpa, ninanda caparinajujtami uyarcani: “Ñucanchipaj Jatun Diospash, pai cachamushca Quishpichij Cristopash, cai pachapi tiaj tucui llactacunata mandajuna punllami pactashca. Paimi, causaita causaicaman mandajunga” ninajurcami.

16Taita Diospaj ñaupajpi paicuna mandangapaj tiarinapi tianajuj, ishcai chunga chuscu rucucunaca cungurishpa, alpaman chayajta cumurishpami, Taita Diosta mañashpa,

17cashna ninajurca: “Tucui Ushaita Charij, Mandaj Taita Dios, candami pashi ninajunchi. Canga, cunambash canllatami causajungui, pundapash canllatami causajurcangui, canllatami shamungui. Ninan ushaita charishpami, tucuita mandai callarishcangui.

18Llactacunapi causajcuna canda fiñashpa causanajujpimi, cunanga cambash ninanda fiñashpa llaquichina punlla pactamushca. Causanajushpa imata rurashcatapash, huañushcacunaman can ricuchina punllacunami pactamushca. Shinallata canda servishpa, can ima nishcata villajcunaman, cambajlla causajcunaman, canda manllaj uchillacunaman, jatungunamambash, aligutami carajungui. Ashtahuangarin cai pachata tucuchijcunata, can tucuchinami pactamushca” ninajurcami.

19Chai jipallami, jahua pachapi tiajuj Taita Diospaj huasi pascarij ricurirca. Chai huasi ucupica, Dios ari nishpa escribishcata alichishca arcami ricurirca. Shina ricurishpami punchapamba shitajcunapash, rimanajuicunapash, ninanda culun nishcapashmi uyarirca. Alpa mamapash cuyushpami tucuchijurca, ninandami rundujurca.