Psalms 49 - Quichua Imbabura Bible

Imatapash charishcatalla yariashpa causanaca, juizu illajmiCandajcunata mandaj candachijuchun, Coré shuti runapaj miraicuna rurashca Salmomi.

1Tucui gentecuna, caita uyaichi.

Tucui cai pachapi causajcuna, uyaichi.

2Yangacuna cashpa, alicachi tucushcacuna cashpa,

charij cashpa, imagutapash na charij cashpapash,

tucuillacuna uyaichi.

3Ñuca shimihuanga, ali yachaitami rimasha.

Ñuca shunguhuanga, ali yuyaitami yarisha.

4Ali yuyaita cujuj shimitami, aliguta uyasha.

Na yachai ushanallatami, arpata tocashpa villasha.

5Ñucata fiñajcuna, jatun nalita rurashpa

muyundi llaquichinajui punllapipash,

¿imamandata manllashayari?

6Paicunaca, imata charishcacunata yariashpallami causan.

Ninandapacha charishcacunahuanmi, jariyashpa parlanajun.

7Chaicunahuanga, imahuanllapash shuj huauquita

quishpichitaca, napacha ushangachu.

Pai quishpiringapajpash, Taita

Diosman cuitaca na ushangachu.

8(Causaita quishpichingapaca, ashtacapacha valishcami.

Chaitaca, imata cushpapash ima horapash na ushangachu).

9Causaita causaicaman causangapajpash,

ima horapash na ismugringapajpash,

imata cuitapash na ushanllu.

10Ashtahuangarin alipacha yachajushcacunapash,

huañujtami ricunga.

Paicunapash shinlli shungu runashnallata,

juizu illaj runashnallata huañujtami ricunga.

Paicunapaj charishcacunataca, shujcunamanmi saquin.

11Paicunapaj shungu ucupica, paicunapaj

huasicunaca, causaita causaicamanmi

canga yashpami causanajun.

Chai huasi ucucunapash, mirai

miraicunapajmi canga yashpami causanajun.

Paicunapaj alpacunatapash, paicunapaj

shutihuanmi saquinajun.

12Ashtahuangarin runaca, na alicachi

tucushcalla causajungachu.

Paicunapash, huañushpa chingaj animalcunashnallatami.

13Paicunapaj causaipipash, yuyai illanshnami causanajun.

Shina cajpipash paicunapaj miraicunaca,

chai yuyai illajcuna rimashcahuanmi cushijunajun. Selah

14Paicunataca, llamacunatashnami Seolman pushanga.

Chaipica huañuimi michijunga.

Aligutalla rurajcunami, paicunataca

tutamandata mandanajunga.

Paicuna juyailla cashcapash tucuringami,

Seolmi paicuna causana huasi canga.

15Ashtahuangarin ñuca causaitaca, Taita Diosmi

Seolpaj ushaimandaca quishpichihuanga.

Paimi ñucataca pushahuanga. Selah

16Maijambash ninanda charijyashpa,

paipaj huasipi ninan cushijunacunata

juyailla jundachijpipash, ama manllarichu.

17Ima hora pai huañushpaca, imatapash na apangachu.

Imata juyailla charishcacunapash,

na paita catishpa urai ringachu.

18Paica, causajushpallami paipaj

almataca cushijuilla nijun.

Ninanda charishpami, alicachi tucujun.

19Shina cashpapash, paipaj ñaupa

taitacunahuanmi tandanajugringa.

Chai jipaca, ima horapash na michata ricungachu.

20Alicachi tucushpa causaj runa cashpapash,

na yuyaita japij cashpaca, huañushpa

chingaj animalcunashnallatami.