JOSUÉ 1 - Quichua Imbabura Bible

Llactata quichungapajmi alichirishca

1Mandaj Diosta servij Moisés huañushca jipami, cashna tucurca: Mandaj Diosca, Moisesta ayudaj, Nun shuti runapaj churi Josuetami, cashna nijurca:

2“Ñucata servij Moisesca, ña huañurcami. Cunanga cambash, tucui cai gentecunapash jatarishpa, israelcunaman ñuca carashca llactaman, Jordán yacuta chimbashpa richilla.

3Ñucami, canguna maitalla purishca tucuilla llactataca, Moisesman villashcashnallata cangunaman cararcani.

4Jichushca pambamandaca, Líbano shuti urcuta yalishpa, Eufrates jatun yacucaman, heteocunapaj tucuilla llactacunamandaca, indi huashajuj mama cuchacamanmi cangunapaj alpa canga.

5Canhuanga, cambaj tucui causai punllacunapimi, pipash na chimbapura shayari ushanga. Moiseshuan cashcashnallatami, canhuambash casha. Candaca, na jichushpa saquishachu.

6Ama manllashpa, shinllipacha tucungui. Cangunapaj ñaupa taitacunaman carashapachami nishpa juramentushca llactataca, canmi chaupishpa cai gentecunaman, paicunapaj cachun cungui.

7Ñucata servij Moisés mandashcata pactachingapaca, ama manllashpa, shinllipacha tucunatallami charingui. Chai mandashcamandaca, ali ladomambash, lluqui ladomambash, ama anchuringuichu. Chashna rurajpimi, tucui imatalla can rurangapaj munashcapash ali llujshinga.

8Cai libropi mandashcata leyinataca, ima horapash na saquinachu cangui. Ashtahuangarin chai mandashcataca punllapash, tutapash yarijunallami cangui. Chai escribishcacunapi mandashcashnallata, tucuita cazushpa pactachingapajmi, chashna rurana cangui. Chashna pactachishpami, cambaj causaipipash aliguta causangui. Tucui imatalla can rurashcapash, alimi llujshinga.

9Ricui, ñucami candaca ama manllashpa, shinllipacha tucungui nishpa mandani. Na manllashpa, na shaijunachu cangui. Canda Mandaj Taita Dios ñucaca, can maita rijpipash, canhuanmi casha” nijurcami.

10Josueca, israelcunata mandajcunataca cashna nishpami mandarca:

11“Carpacunata shayachishca chaupiman rishpa, tucui gentecunata cashna nishpa mandaichi: ‘Micunacunata apangapaj alichinami canguichi. Cangunata Mandaj Taita Dios carashca alpata japingapajmi, quimsa punlla jipaca, Jordán yacuta chimbana canguichi’ nishpa mandaichi” nircami.

12Josueca, Rubenbaj, Gadpaj aillucunatapash, Manasespaj chaupi aillutapashmi cashna nijurca:

13—Mandaj Diosta servij Moisés mandashcata yarichi. Paica, cashnami nirca: ‘Cangunata Mandaj Taita Diosca, samanata carashpami cai llactatapash carashca’ nircami.

14Cangunapaj huarmicuna, huahuacuna, animalcunaca, Jordán yacu cai ladoman Moisés cushca alpapimi shuyanga. Ashtahuangarin macanajunata ali yachaj, ninan shinlli runacunaca, tucuillami macanajunacunata apashpa, cangunapaj huauquicunata ayudangapaj, ñaupashpa chimbana canguichi.

15Mandaj Taita Dios cangunaman samanata carashcashnallata, paicunamambash samanata carangacaman ayudaichi. Chashna ayudajpimi, cangunata Mandaj Dios carashca alpataca, paicunapash japinga. Chai jipaca, Jordán yacumanda indi llujshimuj cai ladoman, Mandaj Diosta servij Moisés cushca cangunapaj alpacunaman tigramunguichillami. Shina tigramushpami, chai alpataca cangunapaj cachun japinguichi— nijurcami.

16Shina nijpimi Josueman, cashna nishpa tigrachinajurca:

—Ñucanchica, can imata mandashcatapash tucuita rurapashunllami. Can maiman cachajpipash, ripashunllami.

17Moisesta tucuipi cazushcashnallatami, candapash cazupashun. Canda Mandaj Taita Diosca, imashna Moiseshuan cashcashnallata, canhuambash cachunllami munapanchi.

18Can mandashcacunata, tucui imatalla can nishcacunata maijambash na cazungapaj munashpaca, huañungapachami. Canga, na manllashpa, shinlli tucunatallami charipangui— ninajurcami.