JEREMÍAS 21 - Quichua Imbabura Bible

Jerusalenda tucuchinatami villajun

1Judá llactata jatun mandaj Sedequías shuti runaca, Malquías shuti runapaj churi Pasur shuti runatapash, Maasías shuti runapaj churi Sofonías shuti curatapashmi, Jeremiaspajman cachamurca. Shina cachamujpi Jeremiasman, Mandaj Dios villashca shimicunami, caipica tiajun. Paicunataca, cashna nichunmi cachamurca:

2“Babilonia llactata jatun mandaj Nabucodonosor runami, ñucanchihuan macanajungapaj shamushca. Shina cashcamanda Mandaj Diosta ñucanchimanda tapupairi. Paica, ninan ushaita charishcamanda, imashpapash jatun manllarinacunata rurangapashchari. Chashna rurajpimi, chai jatun mandaj runaca, ñucanchimandaca anchuringa” ninajurcami.

3Shina ninajujpimi Jeremiasca, paicunataca cashna nirca: “Sedequías shuti runaman, cashna villagrichi:

4Israelcunata Mandaj Taita Diosca, cashnami nin: ‘Ricui, Babilonia llactata jatun mandajhuan macanajungapaj, cangunapaj maquipi charijuj macanajunacunataca, cangunapajmanllatami tigrachisha. Jatun pirca huasha muyundipi cangunata chapashpa tianajuj chai caldeo soldadocunataca, ñucallatami cai pueblo chaupiman tandachimusha.

5Ñucaca nina japirinshna fiñarishcami cani. Shinamandami cangunahuanga, ninandapacha fiñarishpa, ninan ushaita charij, ñuca shinlli maquita alsashpa macanajusha.

6Cai pueblopi causajcunataca, ninandami llaquichigrini. Gentecunapash, animalcunapash, ninan jatun ung:uihuanmi huañunajunga.

7Chai jipaca, Judá llactata jatun mandaj Sedequías shuti runatapash, paita servijcunatapash, shuj gentecunatapash, jatun ung:uipi, espadapi, yarjaipi na huañushpa, cai pueblopi puchujcunatapash, Babilonia llactata jatun mandaj Nabucodonosor runapaj maquipimi churasha. Paicunata huañuchingapaj mascanajuj, paicunata fiñajcunapaj maquipi churajpica, espadahuanmi huañuchinga. Paicunataca, shujtallapash na causajta saquingachu. Paica, pimandapash na nanaringachu, pitapash na llaquingachu’ ninmi Mandaj Diosca nigrichi” nircami.

8Caipi gentecunataca, cashna ningui: Mandaj Diosca, cashnami nin: “Ricuichi, cangunapaj ñaupajpica causana ñanda, na cashpaca huañuna ñandami churani.

9Cai pueblopi puchushca gentecunaca, espadapi cashpa, yarjaihuan cashpa, jatun ung:uihuan cashpapash huañungapachami. Ashtahuangarin caimanda llujshishpa, cangunapaj muyundipi chapanajuj caldeo soldadocunapajman maijambash rishpaca, causangami. Paicunapaj maquipi yaicugrishpaca, huañunamanda quishpiringami.

10Ñucaca, cai pueblotaca llaquichingapajmi ricujuni. Alita carangapaca, na ricujunichu. Babilonia llactata jatun mandajpaj maquipimi churagrini. Paimi rupachishpa tucuchinga” ninmi Mandaj Diosca ningui.

11Judá llactata jatun mandajpaj huasi ucu puracunatapash, cashna ningui: Mandaj Dios rimashcata uyaichi:

12Davidpaj huasi ucu purataca, Mandaj Diosca cashnami nin: “Ima llaquita cashpapash, tucui tutamandacuna alichinguchi. Shinallata llaquichi tucuj runataca, llaquichij runapaj maquimanda cacharichishpa, alita ruranguichi. Canguna nalita rurashcamanda nina japirinshna ñuca ama fiñarichunmi, chashna rurana canguichi. Chai ninataca, pipash na huañuchi ushangachu” ninmi.

13Mandaj Diosca, cashnatapashmi nin: “Pugru pamba chaupipi tiaj jatun rumi jahuacunapi causajcunalla, ricuichi. Ñucallatami, cangunata llaquichingapaj shayarini. Cangunaca cashnami ninajunguichi: ‘¿Pita ñucanchihuan macanajungapaj, vichai shamui ushanga? Ñucanchi causanajuj pushtupica, ¿pita yaicui ushanga?’ ninajunguichimi.

14Ñucami, cangunata llaquichigrini. Canguna nalita rurashcashnallatami, chashna ruragrini. Ñucami, paipaj bosquepi yuracunataca, ninata japichishpa rupachisha. Chai ninaca, paipaj muyundipi tucui tiajcunatapashmi tucuchinga” ninmi Mandaj Diosca.