1 CORINTIOS 11 - Quichua Imbabura Bible

1Cristota ñuca imashna catijujta ricushpa, cangunapash ñucashnallata catipaichi.

Huarmicunaca umata quilparinami

2Tucui crijcuna, ñucataca na cungashpami, ñuca imata yachachishpa mingashcatapash, aliguta catinajunguichi. Shina cajpimi cangunataca, cushijushpa alicachini.

3Ashtahuangarin caita yarichunmi munani: Cristoca, tucui jaricunatami umashna mandajun. Cusapash, paipaj huarmitaca, umashnami mandajun. Taita Diospash, Cristotaca umashnami mandajun.

4Maijan jaripash Diosta mañajushpa, na cashpaca Dios ima nishcata villajushpapash, umata quilparishpaca, paita umashna mandajujtami na cazujun.

5Ashtahuangarin maijan huarmipash Diosta mañajushpa, na cashpaca Dios ima nishcata villajushpapash, umata na quilparishpaca, umashna paita mandajtami na cazujun. Chashna rurashpaca, ajchata rutushcashnami ricurin.

6Maijan huarmipash, umata na quilparishpaca, ajchata rutuchishpami ali canman. Huarmica, asha ajchata rutuchishpa, na cashpaca tucui tucui rutuchinata pinganayajpica, umata quilparichun ninimi.

7Jarica, na umata quilparinachu. Paitaca, Taita Diosmi paiman rijchajta rurashca. Shina cashpami Taita Dios punchapambagu cajta ricuchinajun. Ashtahuangarin huarmica, cusa juyailla cajtami ricuchijun.

8Jarica, na huarmimanda llujshishcachu. Ashtahuangarin huarmimi, jarimanda llujshishca.

9Shinallata jaritaca, na huarmipaj ali cachun rurashcachu. Ashtahuangarin huarmitami, jaripaj ali cachun rurashca.

10Shinamandami huarmica, mandajpi causajushcata ricuchingapaj, angelcunamandapash umata quilparina.

11Ashtahuangarin Apunchi Jesusta crijcuna cashcamanda, jarica na huarmita yalichu. Huarmipash, jaritaca na yalichu.

12Huarmitaca, jarimanda llujchishpami rurashca. Shinallata jaripash, huarmimandami miranajun. Ashtahuangarin Taita Diosmandami, tucui imapash tiashpa catijun.

13Cangunallata aliguta ricushpa yaringuichi: Taita Diosta mañajushpa, ¿huarmica umata na quilparishpa mañashpachu ali canga?

14Jaricuna ajchata viñachun saquishcamanda pinganayai cajtaca, ¿nachu imashna causashcallata cangunaman yachachijun?

15Ashtahuangarin huarmicuna ajchata viñachun saquinaca, alipachami. Umata quilparingapaj randimi, huarmicunapaj ajchataca Diosca viñachishca.

16Ñuca cashna nijujta maijambash fiñashpa rimangapaj munajtaca, cashnami nini: Ñucanchi purapipash, Taita Diospajlla tandanajuj crij purapipash huarmicunaca, umata quilparinataca yacharishcami.

Apunchi Jesús huañushcata yarishpa micushpapash, yangatami ruranajushca

17Ashtahuangarin cai shimicunata villashpaca, cangunata alicachishpaca na nijunichu. Cangunaca, tandanajushpa alita rurangapaj randica, ashtahuan nalita rurangapajmi tandanajunguichi.

18Pundaca caitapashmi nigrini: Crijpura tandanajushpapash, cangunapura shicanyarinajun nijtami uyarcani. Chashna nijtaca, ashataca crinimi.

19Canguna purapi Dios alicachijpi causajcuna ricurichunga, cangunapura shican shican tucushpami ali canguichiman.

20Canguna tandanajushpaca, Apunchi Jesús huañushcata yarishpa micungapaca, na tandanajunllu cashcanguichi.

21Cangunaca, micungapaj apashpapash, shujcunataca na shuyashpami micushcanguichi. Shina rurashcamandami, huaquingunaca yarjaihuan, huaquingunaca machashca tianajun.

22Micushpa, ufiashpa tiangapaca, ¿nachu huasita charinguichi? Na cashpaca, ¿Taita Diospajlla tandanajuj crijcunata yangapi churangapaj, imagutapash na charijcunata pingaichingapajchu chashna ruranajunguichi? Cangunataca, ¿ima ninata cani? ¿Cangunataca alicachishachu? Chashna ruranajujtaca, napacha alicachinichu.

Apunchi Jesús huañushcata yarishpa micuchunmi callarichishca(Mat. 26:26-29; Mar. 14:22-25; Luc. 22:14-20)

23Apunchi Jesús ñucaman mingashcatami, cangunaman yachachircani. Apunchi Jesusca, paita huañuchijcunaman japi tucuna tutami, tandata japirca.

24Chai tandamanda Diosta pashi nishpami chaupishpa, cashna nirca: “Japishpa micuichi. Caica, cangunapaj ali cachun chaupirina ñuca cuerpomi. Ñucata yarishpa, cashnata rurashpa catinguichilla” nircami.

25Ña micushca jipaca, copatapash japishpami cashna nirca: “Cai vino copaca, ñuca yahuarmi. Chaihuanmi Diosca, shuj mushujta ari nishca. Ima horas cashnata ufiashpapash, ñucata yarishpa ufianguichilla” nircami.

26Ima hora cashpapash, canguna cai tandata micushpa, cai copamanda ufiashpaca, Apunchi Jesús huañushcatami, pai tigramungacaman villanajunguichi.

Jesús huañushcata yarishpa micunataca, nali shunguhuan na micunachu

27Maijan cashpapash, Apunchi Jesús micuichi nishca cai tandata nali shunguhuan micushpa, na cashpaca ufiaichi nishca cai copamandapash nali shunguhuan ufiashpaca, Apunchi Jesuspaj cuerpota, yahuarta nalicachishpami juchata ruran.

28Shinamandami tandata nara micushpallata, copamanda vinota nara ufiashpallata, tucui canguna imashna causanajushcata aliguta yarina canguichi.

29Ashtahuangarin Apunchi Jesuspaj cuerpo cajta na aliguta yarishpa, nali shunguhuan cashpa maijambash micushpa ufiashpaca, paillata llaquichi tucungapajmi micun, ufian.

30Shinamandami huañujujpash, irquiyashcapash canguna purapica, ashtacacunapacha tianguichi. Taucacunami ña huañushca.

31Ñucanchillata imashna causajushcata aliguta yarishpaca, na chashna llaquita apanchimanllu.

32Ashtahuangarin Apunchi Jesusca, ñucanchi nali cajta ricushpami llaquichishca. Na crijcunahuan ama ninan llaquiman cachangapajmi, chashna llaquichijun.

33Shina cashcamanda ñuca juyashca crijcuna, shina micungapaj tandanajushpaca, caishuj chaishuj shuyanarami canguichi.

34Maijambash yarjachishpaca, huasipillata micuchun. Tandanajushcapica na llaquichi tucungapajmi, chashna rurana canguichi. Imapash shuj alichinacuna tiajpica, ñuca shamushpami alichisha.