TITO 1 - Quichua Imbabura Bible

Alillachu capangui nishcami

1Taita Diosta servij Pablomi cani. Jesucristo villachun cachashcapashmi cani. Taita Dios agllashcacuna crichunmi villajuni. Diosta yarishpa causajcunata yachachij, na llullaj Shimitami villajuni.

2Causaita causagrinata shuyashpa causachunmi villajuni. Na llullaj Taita Diosmi, cai pachata nara rurashpallata, causaita causagrinataca carashapachami nishca.

3Diosca, pai shina nishcata pactachina punllacunapimi ricuchimushca. Chaita villachunga, ñucanchita Quishpichij Taita Dios mandashpami mingahuarca.

4Caitaca, can Titomanmi escribimuni. Canga, ñucashnallata crij cashpami, ñuca huahuashnapacha cangui. Taita Diospash, ñucanchita Quishpichij Jesucristopash ninan juyaita, ninanda llaquinata, casilla ali causaiguta canman carachunmi munani.

Crijcunata mandaj rucucunapash, crijcunata ricushpa yachachijcunapash imshnalla canatami villajun

5Creta shuti llactapi causanajuj, cada pueblopi tandanajuj crijcunapi nara ñuca alichishcataca, can alichijuchunmi saquircani. Paicunata cuidashpa ricuchun mandaj rucucunata agllashpa churapangui nishpami, canman mingarcani.

6Chai rucucunaca, shujlla huarmihuan pipash na juchachijpi causachun. Paipaj huahuacunapash crijcuna cachun, imatapash nalitaca na rurashpa, na cazunllu nishpaca, ama juchachi tucushca cachun ninimi.

7Crijcunata ricushpa yachachijca, Taita Dios mingashcata rurashpa, na juchachi tucushpami, aligutapacha causana. Shinallata na jariyaj, na ñapash fiñarij, na machaj, na pihuambash fiñanajuj, culquimandalla imatapash nalitaca na ruraj cashpami ali.

8Ashtahuangarin cushijushpa mingachij, imatapash aliguta ruraj, na machaj, imatapash cashcatapacha ruraj cachun. Diospajlla causashpa, ima nalitapash jarcarij cachun.

9Diospaj Shimica na llullaj cajta paiman yachachishcataca, aliguta yarishpa causaj cachun. Shina causajcunami, na chashnachu nishpa rimajcunataca mishashpa, ali shimiguta yachachishpa, aliguta yarichi ushanga.

10Ashtacacunami na cazunayachishpa, yanga parlocunatalla parlashpa, pandachishpa purijcuna tian. Ashtahuambachaca, circuncisión nishcata rurashca puracunami chashnacuna tian.

11Chashnacunataca, upallayajta rimashpa tigrachinapachami. Chashnacunaca, napash yachachinacunata yachachishpami, huasi ucu puratapash pandachishpa, culquimandalla imatapash nalicunata ruranajun.

12Paicuna puramanda shuj villaj runaca, cashnami nishca: “Cai Creta llactapi causajcunaca, llullashpallami causan. Shinallata millai animalcunashna, na trabajashpami, micunatalla yariashpa causan” nishcami.

13Shina nishcapash, na llullachu. Shina cashcamandaca paicunataca, alipacha crishpa catichun, shinllitapacha ninanda rimashpa yachachingui.

14Judá llactamanda runacuna llujchishca parlocunatalla parlanajujtaca, uyaitapash na uyanachu cangui. Runacunalla mandashca shimicunatapash, na uyanachu cangui. Paicunataca, na llullashpa villajuj Shimimanda anchurishca cajpimi, chashna yachachina cangui.

15Imatapash alitalla yarishpa causajcunapaca, ima cashpapash alimi. Ashtahuangarin na crishpa, imatapash huaglita rurajcunapaca, ima cashpapash nalichu. Paicunapaca shungupash, yuyaicunapash huaglitallami yarinajun.

16Taita Diostaca yarinchimi nishpapash nalitalla rurashcahuanmi, Diosta na crij cashcataca ricuchinajun. Chashnacunaca millanayaicunata rurajcuna, Diostapash na cazujcunami. Imata aliguta rurangapaj munashpapash, na ushashpami causanajun.