MARCOS 11 - Quichua Imbabura Bible

Jesusca, alicachi tucushpami Jerusalenman yaicushca(Mat. 21:1-11; Luc. 19:28-40; Juan 12:12-19)

1Jerusalenman Jesús ña chayajushpaca, Betfagé shuti, Betania shuti pueblocunamanmi chayamurca. Chai ñaupajpica, Olivos shuti lomagupashmi tian. Chaiman chayajushpami Jesusca, paipaj yachajuj puramanda ishcaita cacharca.

2Paicunataca, cashna nishpami cachajurca:

—Chai chimba uchilla llactaguman ripaichi. Chaiman chayashpaca, pipash nara tiarishca maltun burroguta, huatashca shayajujtami taringuichi. Chai maltun burrogutaca, cacharishpa apamupanguichilla.

3Canguna cacharijujpica: ‘¿Imapajta apanajunguichi?’ ningami. Shina nijpica: ‘Apunchi Jesús apamugri’ nijpimi, apanajupanchi. Ñapash apamupashunllami ninguichi— nishpami cacharca.

4Paicuna rishpaca, huasi pungu ñambi, shuj maltun burroguta huatashcata tarishpami cacharinajurca.

5Shina cacharijujta ricushpami:

—¿Imapajta chai maltun burrotaca, cacharishpa apagringuichi?— nishpa, huaquingunaca tapurca.

6Shina tapujpimi, Jesús mandajpi rishca chai ishcai yachajujcunaca, pai mandashcashnallata ninajurca. Shina nijpica, apachun saquircallami.

7Ña Jesuspajman chai maltun burrohuan chayamushpaca, paicunapaj jahualla churajunacunatami, lomopi churanajurca. Shina churajpimi Jesusca, maltun burro jahuapi tiarirca.

8Jesús ña rijujpica, ashtaca gentecunami paicunapaj churajunata ñambi mandanajurca. Shinallata huaquingunaca, quiru malquicunata cuchushpami ñambi mandanajurca.

9Chai gentecunaca, Jesusta chaupipi churashpami ñaupatapash, huashatapash shamunajurca. Paicunaca, cashna nishpami ninanda caparinajurca:

—¡Diosca ninanda alicachi tucushca cachun! ¡Jatun Diospaj shutipi shamujujca, aligumari cangui ni tucushca cachun!

10¡Ñucanchipaj ñaupa taita David mandajushca llactagupi mandangapaj shamujujca, aligumari cangui ni tucushca cachun! ¡Jahua pachapi tiajuj Diosca, ninanda alicachi tucushca cachun!— ninajurcami.

11Jesusca Jerusalenman yaicushpaca, Diospaj huasimambashmi yaicurca. Chai huasitaca, tucui ladotami Jesusca muyundita ricujurca. Shina ricushpami ña tutayajujpica, paipaj chunga ishcai yachajujcunandi Betania puebloman rirca.

Na fucuj jigos yuratami, Jesusca nalicachishca(Mat. 21:18-19)

12Chai cayandi punllami, Betania pueblomanda llujshishpa rijushpa, Jesusca ninanda yarjachirca.

13Shina rijushpaca, shuj jigos yura fangasapa shayajujtami carumanda ricurca. Chai yurapica, shujllapash fucushca tiambashchari yashpami, Jesusca chayagrirca. Ashtahuangarin chaiman chayashpa ricujpica, ima jigospash illaj, fangacunalla jundami cashca carca. Chai punllacunapica, nara jigos fucui punllacuna chayashca carcachu.

14Chashna imapash na fucushcata Jesús ricushpami:

—Can na fucushcamandaca, ima horapash pipash na ashtahuan micungachu— nirca.

Chashna nijujtaca, paipaj yachajujcunami uyarca.

Diospaj huasitaca, mapa illajtami rurashca(Mat. 21:12-17; Luc. 19:45-48; Juan 2:13-22)

15Jerusalenman chayamushpami Jesusca, Diospaj huasiman yaicurca. Chai ucumandaca, jatushpa tianajuj runacunatapash, randishpa purijcunatapash, llujchishpami calpachirca. Culquicunata randishpa jatushpa tianajushca mezacunatapash, palomacunata jatujcuna tianajushca bancocunatapash urmachishpami saquirca.

16Diospaj huasi ucuta imatapash aparishpa yalichumbash, na saquircachu.

17Jesusca, chai gentecunataca cashna nishpami yachachijurca:

—¿Nachu escribishcapica: ‘Ñuca huasica, tucui llactacunapi causajcuna ñucata mañana huasimi ni tucushcami canga’ nijun? Ashtahuangarin cangunaca, shuhuacuna pacajuj utujutashnami, cai huasitaca rurashcanguichi— nircami.

18Jesús chashna nijujtaca, curacunata mandajcunapash, mandashca shimita yachachijcunapashmi uyanajurca. Shina uyashpami paicunaca, imashna huañuchinata yarinajurca. Jesús yachachijujtaca, tucui gentecunami cushijushpa uyanajurca. Paitara catinata manllashpami, chai runacunaca huañuchingapaj munarca.

19Ña tutayajujpimi Jesusca, paipaj yachajujcunandi, Jerusalén pueblomandaca llujshishpa rirca.

Jesús ninanda nalicachishca jigos yurami chaquishca(Mat. 21:19-22)

20Chai cayandi tutamanda yalinajushpami, jigos yurataca sapimandapacha chaquishca shayajujta ricunajurca.

21Pedroca, chai yurata ricushpami, Jesús ninanda nalicachijushcata yarishpa:

—Ricui, Yachachij. Can ninanda nalicachishca yuraguca chaquishcamari— nirca.

22Shina nijpimi Jesusca, paicunata cashna nijurca:

—Taita Diostaca, tucui shunguhuambachami crina canguichi.

23Na llullashpami, cangunataca cashna nini: Taita Diosta tucui shunguhuan crishpa, cai urcuta: ‘Caimanda anchurishpa, mama cuchaman huashajui’ nijpica, huashajungallami. Na ishcai shungu tucushpa pai imata nishcapash pactanatapacha crijpica, Diosca chashna pactachingami.

24Shinamandami cangunataca, cashna nini: Diosta tucui shunguhuan crishpa, japishapachami yashpa mañajpica, chaica pactangallami.

25Shinallata Diosta mañajushpaca, canguna maijandapash imamandapash fiñashca cashpaca, uchami ali tucuna canguichi. Shina ali tucujpimi, jahua pachapi tiajuj cangunapaj Taitaca, canguna rurashca juchacunataca anchuchinga.

26Ashtahuangarin canguna ali tucungapaj na munajpica, jahua pachapi tiajuj cangunapaj Taitapash, canguna rurashca juchacunataca na anchuchingachu— nijurcami.

Jesuspaj ushaimandami villajun(Mat. 21:23-27; Luc. 20:1-8)

27Chai jipami, Jerusalenman cutin tigranajurca. Diospaj huasi ucupi Jesús purijupimi, curacunata mandajcunapash, mandashca shimita yachachijcunapash, mandaj rucucunapash, paipajman ñapash quimirimurca.

28Paicunaca, cashna nishpami tapunajurca:

—¿Pipaj ushaihuanda caicunataca, cashna rurajungui? ¿Pita chashna rurachun, candaca mandarca?— ninajurcami.

29Shina nijpimi Jesusca, paicunata cashna nirca:

—Ñucapashmi, cangunata shujta tapugrini. Ñuca tapujpi canguna tigrachijpica, ñucapash pipaj ushaihuan chashna rurajushcata villashallami.

30Juan bautizachunga, ¿jahua pachamandachu cachamushcanga, na cashpaca runacunachu cachamushcanga? Cai ñuca tapushcatapash tigrachihuaichi— nircami.

31Shina tapujpimi, paicunapura cashna nishpa parlarirca:

—¿Ima nishunchita? ‘Juanga, jahua pachamanda cachamujpimi shamurca’ nijpica: ‘¿Imashpata pai villashcataca, na crircanguichi?’ ningami.

32‘Runacuna cachamujpillami shamurca’ nitapash, na ushanchica— ninajurcami.

“Profeta Juanbachami shamushca” nishpami, tucuilla gentecunaca rijsishca carca. Shinamandami manllashpa paicunaca, imatapash na ni usharca.

33Chashna imatapash na ni ushashpami:

—Na yachapanchica— nishpa, Jesusman tigrachinajurca.

Paicuna chashna nijpimi, Jesuspash cashna nirca:

—Ñucapash, maijambaj ushaihuan chashna rurajushcataca, na villashachu— nircami.