EZEQUIEL 18 - Quichua Imbabura Bible

Juchata rurajcunapaj almami huañunga

1Mandaj Diosca, cai shimicunata cashna nishpa villahuarca:

2“Israel llactapi, cai yarichij shimicunata parlajcunaca, ¿imatata yanguichi? Chai shimicunaca, cashnami nijun: ‘Jayaj uvasta taitacuna micushcamandami, churicunapaj quiruta nanachinshna tucun’ nijunmi.

3Mandaj Jatun Dios ñucaca, causajunipachami ninimi. Israel llactapica, cai yarichij shimicunataca, cutinga na ashtahuan rimanachu canguichi.

4Ricuichi, tucuicunapaj almami ñucapaj. Taitapaj almapash, churipaj almapash ñucapajmi. Maijanmi juchata ruran, chaipaj almami huañunga.

5Maijan runapash, imatapash cashcatapacha ruraj cashpa, imata cashpapash ali cajta ricushpa, imatapash cashcatapacha rurashpaca, causangapachami.

6Lomacunapi tiaj altar ladocunapipash na micushpa, israelcunapaj yanga dioscunatapash na mañashpa, shujpaj huarmitapash munai na munai huaglichishpa, quilla nanai pactajpi nanaihuan huarmitapash na tacarishpaca causangapachami.

7Pitapash na llaquichishpa charij, divimanda prendashcatapash tigrachishpa, na shuhuashpa, yarjaihuan tiajcunamambash carashpa, churajuna illajcunamambash churachishpaca, causangapachami.

8Culquita mañachishpa mirashcata na japishpa, chai mama culqui mirashcamandapash yalishpa na japishpa, nalita ruranamandapash anchurishpa, runacuna fiñanajujpipash, chimbapurashpa aliguta ricushpa alichishpaca causangapachami.

9Ñuca mandashcacunatami pactachishpa causanga. Imatapash cashcatapacha rurangapaca, imata rurachun ñuca mandashca shimicunatami cazunga. Paimi, imatapash cashcatapacha ruraj canga. Paimi causanga. Mandaj Jatun Dios ñucami, chashna nini.

10Ashtahuangarin maijan runaca, shuhua churita, huañuchij churita, na cashpaca cai tucui nalicunamandaca huaquin nalitallapash ruraj churitami charinga.

11Caishuj nalicunata na rurashpapash, lomacunapi tiaj altar ladocunapica micujungami. Na cashpaca, shujpaj huarmitami munai na munai huaglichinga.

12Imagutapash na charij runatapash, imagupash illaj runatapashmi llaquichishpalla charinga. Shuhuapashmi canga, prendashcatapash na tigrachingachu. Yanga dioscunatapashmi mañanga, ima millanayaitapashmi ruranga.

13Culquita mañachishpa mirashcatapashmi japinga. Chai mama culqui mirashcamandapash yalishpami japinga. Chashna runaca, ¿causangachu imashi? Na, paica na causangachu. Paica, chai tucui millanayaita rurajushcamandaca huañungapachami, paipaj yahuarca paipaj jahuallatami canga.

14Ashtahuangarin chai runaca, tucui juchacunata paipaj taita rurashcata ricushpapash, paica chaitaca na ruraj churitami charinga.

15Lomacunapi tiaj altar ladocunapipash na micungachu, israelcunapaj yanga dioscunatapash ricuitapash na ricungachu, shujpaj huarmitapash munai na munai huaglichingachu.

16Pitapash na llaquichishpalla charingachu, imata mañachishpapash prendataca na japingachu, na shuhuangachu, yarjachijmambash pai micunatami caranga, lluchulla tiajujmambash churajunata churachijmi canga.

17Imagutapash na charijtapash na llaquichingachu, culquita mañachishpa mirashcatapash na japingachu. Chai mama culqui mirashcamandapash, na yalishpa japingachu. Ñuca escribichishca shimicunatapash pactachishpa, imata rurachun ñuca mandashcacunata cazushpa causaj runami canga. Shina cashpaca, paipaj taita nalita rurajushcamandaca na huañungachu, ashtahuangarin causangapachami.

18Paipaj taitaca, llaquichij cashcamanda, shujpaj ima charishcatapash munai na munai quichuj cashcamanda, paipaj rijsij gentecunapash ricujta imatapash nalita ruran cashcamandami huañunga. Ricuichi, paica paillata nalita rurajushcamandaca huañungapachami.

19Cangunaca: ‘¿Imashpashi churica, paipaj taitapaj juchamandaca, na llaquita apan?’ ninguichipashchari. Paipaj churica imapash aligutalla, imatapash cashcatapachami rurarca. Pactachinajuchun ñuca cushca shimicunatapash, tucuita cazushpami pactachirca. Shina rurashcamandaca, causangapachami.

20Maijanmi juchata ruran, chaipaj almami huañunga. Churica, paipaj taitapaj juchamandaca, na llaquita apangachu. Shinallata taitapash, paipaj churipaj juchamandaca, na llaquita apangachu. Imatapash cashcatapacha ruraj runaca, alitami japinga. Ashtahuangarin ñucata na manllaj runaca, ñucata na manllashcamandami llaquita japinga.

Taita Diospaj ñanguca, aligupachami(Ez. 33:10-20)

21Ashtahuangarin ñucata na manllaj runa, tucui juchacunata pai rurajushcamanda anchurishpa, pactachinajuchun ñuca cushca shimicunata cazushpa, imata cashpapash aliguta rurashpa, imatapash cashcatapacha rurashpaca causangapachami, na huañungachu.

22Pai ñucata na cazushcacunataca, na yarishachu. Ashtahuangarin pai imatapash cashcatapacha rurashcamandami causanga.

23Mandaj Jatun Dios ñucaca, cashnami nini: ¿Ñucata na manllaj runa huañuchun munanichu? ¿Nachu pai nalita rurashpa causajushcata saquishpaca causanga?

24Ashtahuangarin imatapash cashcatapacha ruraj runaca, imatapash cashcatapacha ruranata saquishpa, jatun nalita rurashpa Diosta na manllaj runashnallata, imatapash millanayaita rurajushpaca, ¿paica causangachu imashi? Imatapash cashcatapacha pai rurashcataca, napacha yarishachu. Ashtahuangarin yachashpata ñucata na cazushpa pai juchata rurashpaca, chai juchata rurashcamandami huañunga.

25Shina cashcamanda cangunaca: ‘Jatun Diosta cazushpa causanaca nalichu’ ninguichipashchari. Israelcuna, cangunaca caita ali uyahuaichi: Ñucata catishpa causanaca, ¿nachu nali? ¿Nachu canguna nalita rurashpa causashca nali?

26Imatapash cashcatapacha ruraj runaca, imatapash cashcatapacha ruranata saquishpa nalita rurashpaca, paica huañungami. Nalita pai rurashcamandami huañunga.

27Shinallata ñucata na manllaj runa ñucata na manllashpa juchata ruranata saquishpa, imatapash alita rurashpa, imatapash cashcatapacha rurajujpica, paipaj almaca causangami.

28Tucui nalicunata rurajushcata paillata ricushpa chaicunata saquishpa anchurishpaca causangapachami, na huañungachu.

29Shina cajpipash israelcunalla, cangunaca: ‘Jatun Diosta cazushpa causanaca nalichu’ ninguichirami. Israelcuna, ñucata cazushpa causanaca, ¿nachu nali? Ashtahuangarin canguna nalita rurashpa causashcami nali” nihuarcami.

30Shina cashcamanda Mandaj Jatun Diosca, cashnami nin: “Israelcunalla, canguna nalita rurashpa causashcashnallatami, ñucaca tucuicunata llaquichisha. Canguna ñucata na cazushpa causanata saquishpa tigrarimuichi. Shina tigrarimujpica, canguna nalita rurashcapash, na llaquipi churangachu.

31Canguna na cazushpa tucui juchata rurashcataca shitanami canguichi. Cangunaca shungutapash, yuyaitapash mushujta ruraichi. Israelcunalla, ¿imashpashi huañunguichi?” ninmi.

32Mandaj Jatun Diosca, cashnatapashmi nin: “Huañunapacha cajtaca, na huañuchun munanichu. Shina cajpica, nalita ruranata saquishpa tigrarichi. Chashna tigrarishpaca causanguichimi.