2 CORINTIOS 2 - Quichua Imbabura Bible

1Cangunapajman rishpaca, na ashtahuan llaquilla cangapaj munashpami, cutinga na rishachu yajurcani.

2Cangunata ñuca llaquichijpica, ¿pita ñucataca cushichingayari? Cangunallami, ñucataca cushichi ushanguichi.

3Cashna nijunshnallata, ñami cangunaman escribimurcani. Cangunapajman chayamujpi, ama ñucata llaquichinajuchun nishpami, na shamurcani. Ashtahuangarin cangunami, ñucataca cushichina carcanguichi. Ñuca cushijujpica, cangunapash tucuicuna cushijunataca, alipachami yacharcani.

4Chaimandami cangunamandaca, ninan llaqui shunguhuan ninanda llaquirishpa, viquisapa huacashpa escribimurcani. Cangunata llaquichingapaca, na munarcanichu. Ashtahuangarin ñuca ninanda juyajujta yachachunmi escribimurcani.

Pabloca, paita llaquichishpa nalita rurashcatami cungashca

5Ñucata llaquichij runaca, na ñucatalla llaquichircachu. Ashtahuangarin cangunatapash, tucuillatami ashataca llaquichirca. Cashna nishpa, (cangunata ama yapa llaquichingapajmi): “Ashagutallami llaquichirca” nini.

6Tauca purami, chai nalita rurajtaca llaquichishcanguichi. Ña chaitallami llaquichina canguichi.

7Ashtahuangarin ama yapa llaquihuan huañujuchunmi, cangunaca chai nalita rurashcataca cungashpa, paitaca cushichina canguichi.

8Chaimandami paitaca juyashpa, cutin shinllichipanguichi nipani.

9Ñuca imata nijujtapash cazunajuj, na cazunajujtapash yachangapajmi shina escribircani.

10Maijandapash chai nalita rurashcata canguna cungajpica, ñucapashmi chai nalita rurashcataca cungani. Ima nalita rurashcata cungana tiajpipash, cangunapaj ali cachunmi, Cristopaj ñaupajpi chashna rurashpa ña cungarcani.

11Satanás ñucanchita umachishpa ama mishachunmi, chashna nalita rurashcataca cungarcani. Satanasca, ñucanchi imashna nalita rurachumbash, ninanda yarichijujta alimi yachanchi.

Troas shuti pueblopimi Pabloca, llaqui llaqui cashca

12Cristomanda ali villaita villangapajmi, Troas shuti puebloman chayarcani. Chaipica, punguta pascanshna Apunchi Jesús saquijpipash,

13ñuca huauqui Titota na tuparishpami, ninanda llaquirishpa, ñuca shungupipash na samai usharcani. Shina cashpami, Troas shuti pueblopi causajcunataca cayacaman nishpa, Macedonia llactaman rircani.

Cristohuanmi ima nalitapash mishanchi

14Ashtahuangarin Taita Diosta pashi ninajunchimi. Paimi ñucanchitaca, Cristo Jesushuan shujlla tucujpi, ima nalitapash mishachishpa, tucui causaipi ricuchishpa pushajun. Shinallata Cristomanda yachajunatapash, mishquillagu ashnajujtashna maipi cashpapash villachunmi, Diosca ñucanchita maimambash aliguta pushajun.

15Ñucanchica, quishpirishca purapipash, chingaita chingangapaj rinajuj purapipash Taita Diospaca, Cristohuanmi mishquillagu ashnajunshna canchi.

16Chai mishquillagu ashnajujmi, huañuiman rijcunataca, huañuita huañuchun cachajun. Ashtahuangarin quishpirishcacunataca, causaita causachunmi pushajun. Chaicunataca, ¿pita aliguta villashpa pactachi ushangayari?

17Ñucanchica, na chai ashtacacunashna imatapash japingapajlla Diospaj Shimita huaglichishpa villajchu canchi. Ashtahuangarin Taita Dios mingajpimi, Taita Diospaj ñaupajpi, Cristomanda na llullashpa villanajunchi.