Psalms 50 - Quichua Imbabura Bible

Cai pachapi causajcunataca, Taita Diosmi llaquichingaAsaf shuti runa rurashca Salmomi.

1Taita Diosca, dioscunapaj Mandaj Diosmi.

Paimi, cai pachapi causajcunataca,

indi llujshimuj ladomanda, indi huashajuj

ladocaman causajcunata tandanajuchun cayashpa rimashca.

2Tucuita yali juyailla Sion urcumandami,

Taita Diosca punchayachimushca.

3Ñucanchi Taita Dios shamushpaca,

na upalla shamungachu.

Paipaj ñaupajpica, ninami tucuchinga.

Paitaca, ninan shinlli tamiahuan,

huaira muyushcami canga.

4Jahua pachataca, jahuamandami cayanga.

Cai pachataca, pai agllashcacuna imata

rurashcata ricungapajmi cayanga.

5Paica cashnami ninga: “Ñucapajlla causajcuna,

ñucapaj cangapaj animalta carashpa huañuchishpa

ari nishcacuna, tandanajumuichi” ningami.

6Imatapash cashcatapacha can rurashcataca,

jahua pachami villanga.

Taita Dios Juez cajpimi, chashna villanga. Selah

7Ñuca agllashcacunalla, ali uyahuaichi,

ñucami rimagrini.

Israelcunalla, uyahuaichi.

Ñucami, cangunata fiñashpa rimagrini:

“Ñucami Taita Dios cani, cambaj Taita Diosmi cani.

8Animalcunata ñucaman carashpa

huañuchishcamandaca, na jarcashpa rimagrinichu.

Ñuca ñaupajpi animalta ñucaman cushpa,

tucuillata rupachishcamandaca, na rimagrinichu.

9Cambaj huasimanda shicucunataca, na japishachu.

Cambaj corralmanda, jari chivocunatapash na japishachu.

10Sachapi causaj tucuilla animalcunapash,

lomacunapi causaj huaranga huaranga

animalcunapash ñucapajmi.

11Urcucunapi causaj alasyu tucui

animalcunatapash rijsinimi.

Pambacunapi causaj tucuilla animalcunapash ñucapajmi.

12Ñucaca, yarjaihuan cashpapash, na canman villaimanllu.

Cai pachaca, tucui imalla chaipi tiajcunandimi ñucapaj.

13¿Ñucaca, huagra aichata micunichu?

¿Na cashpaca, jari chivocunapaj yahuarta ufianichu?

14Taita Diostaca, animalta

carashpa huañuchinshna alicachingui.

Imata carashapacha nishcataca,

jahua pachapi causajuj Diosman cungui.

15Llaqui punllapica, ñucata mañahuanguilla.

Chai llaquimandaca cacharichishallami.

Cambash ñucataca alicachihuanguimi”

nishpami rimagrini.

16Ashtahuangarin nalita rurajtaca,

Taita Diosca cashnami nirca:

“Canga, ñuca mandashcacunamandaca,

¿imata ninatata charingui?

Ñucahuan ari nishcatapash, cambaj

shimihuanga imatallapash na ninachu cangui.

17Canga, ali tucuchun rimashcatapash millanayachinguimi.

Ñuca rimashca shimicunatapash, huashamanmi churangui.

18Shuhua runata ricushpaca, paihuanmi calpan carcangui.

Cazarashca jahua shuj huarmicunahuan

causajcunahuanmi purin carcangui.

19Cambaj shimihuanga, llaquipillami churan carcangui.

Cambaj jallupash, umachinatallami yachan carca.

20Tiarishpaca, cambaj huauquitallatami,

huasha parlan carcangui.

Cambaj mamapaj churitallatami,

juchachishpa pingaichin carcangui.

21Chashnacunata rurajujpipash ñucaca,

upalla saquircanillami.

Ñucatapash, canshnallapachami canga yarcanguimi.

Ashtahuangarin candaca jarcashpa rimashpami,

chashna rurashcacunataca, cambaj

ñaupajpillata ricuchisha.

22Taita Diosta cungashpa causaj cangunaca,

cunanga caita yarichi, pactarallapash

cangunata ñutujpi, pipash na quishpichij tianman.

23Animalta ñucaman carashpa huañuchinshna

ñucata alicachijmi, alipi churahuanga.

Paipaj causaita alichijmanmi, Taita Dios

ñuca quishpichinata ricuchisha” nircami.