1Mandaj Diostami juyajuni.
Paimi, ninandapacha ñuca mañajujtaca uyahuashca.
2Paica, ñucataca aligutami uyahuarca.
Chaimandami, tucui ñuca causajui punllacunapi mañajusha.
3Huañuica, huatashpami muyundi charijuhuarca.
Seolmanda ninan llaquicunami ñucata tuparimurca.
Ninan llaquita, nanaitallami tarircani.
4Chaimandami, Mandaj Diospaj shutipi mañashpa, cashna nircani:
“Mandaj Dioslla, cunanga ñuca almata quishpichihuayari” nircanimi.
5Mandaj Diosca, ninanda juyaj, imatapash cashcatapacha rurajmi.
Ari, ñucanchi Taita Diosca llaquijpachami.
6Mandaj Diosca, na jariyajcunatami huacaichijun.
Ñucataca, huañunalla sirijujtami quishpichihuarca.
7Ñuca almalla, cambaj samanaman tigramupailla.
Mandaj Diosca, alitami rurashca.
8Canmi, ñuca almataca huañuimanda cacharichircangui.
Ñuca ñavimanda viquitapash, ñuca chaqui
lluchanatapashmi charihuarcangui.
9Runacuna causanajuj cai pachapica,
Mandaj Diospaj ñaupajpimi purijusha.
10Manllanayai llaquihuan cashpami, crishpa cashna rimarcani.
11Llaquihuan musparijushpami:
“Tucui runacunami llullacuna” nircani.
12Mandaj Dios ñucaman tucui alicunata
rurashcamandaca, ¿imatata paiman cupashayari?
13Quishpichishcata ricuchijuj copata
japishpami, Mandaj Diospaj shutipi mañajushalla.
14Cunanga, Mandaj Diosman carashapachami nishcataca,
tucui pai agllashcacunapaj ñaupajpimi cusha.
15Mandaj Diospaj ricuipica, paipajllacuna
huañushpaca, ninan valishcami.
16Mandaj Dioslla, ñucaca canda servijpachami capani.
Canda servij huarmipaj churi, canda servijmi capani.
Canmi, ñuca huatai tucushcataca fitishcangui.
17Candaca alicachishpami, animalta
canman carashpa huañuchishpa,
Mandaj Dios cambaj shutipi mañasha.
18Cunanga, Mandaj Diosman carashapachami nishcataca,
tucui pai agllashcacunapaj ñaupajpimi cusha.
19Mandaj Diospaj huasi patiocunapimi cusha.
Jerusalenlla, cambaj chaupipimi cusha.
Mandaj Diosta alicachinguichi.
Who We AreWhat We EelieveWhat We Do
2025 by iamachristian.org,Inc All rights reserved.
