JOSUÉ 5 - Quichua Imbabura Bible

Circuncisión nishcatapash, pascuatapash Gilgal shuti pueblopimi rurashca

1Jordán yacu chimba ladoman, indi huashajuj ladoman causanajuj amorreocunata tucui mandajcunapash, mama cucha ladopi causanajuj cananeocunata tucui mandajcunapashmi, Jordán yacuta israelcuna chimbangacaman, paicunapaj ñaupajpi Mandaj Dios imashna chaquichishcatapash yachanajurca. Chaimandami paicunapaj shungupica, huañunashna tucushpa israelcunapaj ñaupajpica, samai ña tucurijunshna tucunajurca.

2Chai punllacunami Mandaj Diosca, Josueta cashna mandarca: “Filo cuchillocunata rurashpa israelcunataca, circuncisión nishcata cutin rurai” nircami.

3Shina nijpimi Josueca, filo cuchillocunata rurashpa, Israel jaricunataca, Aralot shuti lomapi circuncisión nishcata rurarca.

4Egiptomanda llujshimushca tucui gentecunaca jaricunapash, macanajunata ali yachaj runacunapashmi, Egiptomanda llujshishpa shamunajushpaca, jichushca pambapi huañushca carca. Chaimandami israelcunataca, circuncisionda rurarca.

5Egiptomanda llujshimushca tucui gentecunami, circuncisionda rurai tucushca carca. Ashtahuangarin Egiptomanda llujshimushca jipa, ñanda shamunajujpi, jichushca pambapi huacharishca gentecunaca, na circuncisionda rurai tucushcachu carca.

6Israelcunaca, chuscu chunga huatatami, jichushca pambapi purinajurca. Paicunaca, Egiptomanda llujshimushca, macanajunata ali yachaj tucui runacuna tucuringacamanmi, chashna purinajurca. Paicunaca, Mandaj Dios rimashcata na cazushcamandami, chashna tucurirca. Shinamandami Mandaj Diosca, cashna nishpa juramenturca: “Ñucaca: ‘Lechepash, balun mishquipash, ashtacapacha tiaj llactata carashami’ nishpa, Mandaj Dios ñuca cangunapaj ñaupa taitacunaman juramentushca llactataca, napacha ricuchun saquishachu” nircami.

7Josueca, chai runacunapaj randi paicunapaj huahuacunata Dios pushamujushcamandami, circuncisionda rurarca. Paicunaca, circuncisionda na rurashcacunami carca. Paicunataca, ñambi cachashcamandami circuncisionda na rurashca carca.

8Tucui gentecunata circuncisionda rurashca jipaca, ali tucungacamanmi, chai pushtupillata carpacunapi quedarca.

9Chaipimi Mandaj Diosca, Josuetaca cashna nirca: “Egiptopi nalicachishpa rimai tucunajushcataca, cunanmi anchuchircani” nirca. Chaimandami chai lomataca, Gilgal nishpa cunangaman parlan.

10Israelcunaca, Jericó pueblo ladolla pugru pamba Gilgal shuti pueblopimi, carpacunata shayachishpa tianajurca. Chaipi tianajushpami, chai quillapaj chunga chuscu punlla chishipica, pascua punllapi cushijushpa micunata ruranajurca.

11Chai pascua cayandi punllapica, chai alpapi fucushca granocunatami, levadura illaj tandata rurashpa micunajurca. Chai punllapillatami, pundalla fucushca trigo camllashcatapash micunajurca.

12Chai llactapi fucushca granocunata micui callarishca cayandi punllamandapachami, maná shuti micunaca tucurirca. Israelcunaca, maná shuti micunataca, na ashtahuan charircachu. Ashtahuangarin chai huataca, Canaán llactapi fucushca granocunatallami micunajurca.

Josuemandapash, espadata charijuj soldadomandapashmi villajun

13Josueca, Jericó pueblo ladollapi cashpa vichai ricushpami, espadata alichinamanda llujchishpa charijuj runata, paipaj ñaupajpi shayajujta ricurca. Josueca, paipaj ladoman rishpami:

—¿Canga, ñucanchi purachu cangui, na cashpaca ñucanchita fiñaj purachu cangui?— nishpa tapurca.

14Shina tapujpimi chai runaca, cashna nishpa tigrachirca:

—Na chashnachu. Ashtahuangarin Mandaj Diospaj soldadocunata Mandaj cashpami, cunanga shamurcani— nircami.

Shina nijpimi Josueca cungurishpa, alpacaman chayajta cumurishpa, ninanda alicachishpaca:

—Ñucata Mandajlla, canda servij ñucataca, ¿imatata nihuanguiyari?— nirca.

15Shina nijpimi, Mandaj Diospaj soldadocunata Mandajca, Josueman cashna nishpa tigrachirca:

—Cambaj chaquipi churajushcata llujchi. Can maipi shayajungui, chai alpaca Diospajlla shicanyachishcami— nirca.

Shina nijpimi Josueca, pai mandashcashnallata rurarca.