LEVÍTICO 9 - Quichua Imbabura Bible

Aaronga, animalcunata Diosman cushpami rupachishca

1Pusaj punllapimi Aarondapash, paipaj churicunatapash, israelcunata mandaj rucucunatapash Moisesca cayarca.

2Chaipimi Moisesca, Aarondaca cashna nijurca: “Juchamanda cungapaca, huarmi huagracunamanda shuj shicuta japingui. Diosman cushpa tucuillata rupachingapaca, imapash na tucushca jari llamata japingui. Chaicunataca, Mandaj Diospaj ñaupajman apamungui.

3Israelcunamambash, cashna nishpa villangui: ‘Juchamanda Diosman cungapaca, shuj jari chivota japinguichi. Diosman cushpa tucuillata rupachingapaca, shuj huatata charij, imapash na tucushca shicuta, shuj huatata charij, imapash na tucushca maltun llamata japinguichi.

4Shinallata Dioshuan ali cangapaj paiman cushpa huañuchingapaca, shuj jari huagrata, shuj jari llamata japinguichi. Chaicunataca, Mandaj Diospaj ñaupajpimi huañuchina canguichi. Diosman carangapajpash, aceitehuan masashcata apamunguichi. Mandaj Diosca, cunan cangunaman ricurimuna cashcamandami, chashna apamuna canguichi’ ningui” nijurcami.

5Moisés imatalla mandashcatami, Dioshuan tuparina jatun carpa ñaupajman apamunajurca. Tandanajushca tucui israelcuna shamushpami, Mandaj Diospaj ñaupajpi shayanajurca.

6Chaipimi Moisesca, cashna nirca: “Mandaj Diosmi, caita rurachun mandarca. Pai mandashcata rurajpimi, Mandaj Diospaj punchapambaguca ricurimunga” nircami.

7Chai jipami Moisesca, Aarondaca cashna nirca: “Altarman quimirishpa, cambaj juchamanda cushca animaltapash, tucuillata rupachingapaj can cushca animaltapash huañuchilla. Canmandallatapash, israelcunamandapash, Dioshuan ali cangapaj huañuchilla. Israelcuna Diosman carashcatapash cunguilla. Paicunapaj juchamanda Diosman animalta cushpa huañuchilla. Chaitaca, Mandaj Dios mandashcashnallatami rurana cangui” nircami.

8Shina nijpimi Aaronga, altarman quimirishpa, paipaj juchamanda Diosman cushca shicutaca, cungata muchushpa huañuchirca.

9Shina huañuchijpimi Aaronbaj churicunaca, chai shicupaj yahuarta apamunajurca. Chaita apamujpimi Aaronga, paipaj maqui dedota yahuarpi mutiyachishpa, altar cachucunapi javirca. Puchushca yahuartaca, altar chaquipimi talirca.

10Chai animalpaj virataca, riñongunandimi altarpi rupachijurca. Shinallata juchamanda Mandaj Diosman cushca animalpaj yana shungupi tiaj viratapashmi rupachijurca. Chaitaca, Mandaj Dios imashna Moisesta mandashcashnallatami rupachijurca.

11Ashtahuangarin aichatapash, caratapash, carpacunamanda caruman apashpami rupachijurca.

12Diosman cushpa tucuillata rupachina animaltapashmi, cungata muchushpa huañuchirca. Shina huañuchijpimi Aaronbaj churicunaca, chai animalpaj yahuartapash apamunajurca. Chaitaca, altar muyundipimi tsirapachirca.

13Chai jipami, tucuillata rupachina animalpaj aichataca asha asha fitishpa, umandi cunajurca. Chaicunataca, altarpi churashpami rupachijurca.

14Chai jipaca chunllulicunatapash, changa aichatapash maillashpami, tucuillata rupachijuna aicha jahuapillata churashpa, altarpi rupachirca.

15Shinallata israelcuna Diosman carashcatapashmi, Diosman curca. Israelcunapaj juchamanda Diosman cushpa huañuchina jari chivotapash japishpami, cungata muchushpa huañuchirca. Chaitaca, juchamanda punda cushcashnallatami curca.

16Tucuillata rupachina animaltapash, imashna rurachun mandashcashnallatami rupachirca.

17Shinallata imaguta Diosman carashcatapash, chai carashcacunamanda maqui junda jacuta japishpami, altarpi rupachijurca. Tutamandata Diosman animalta cushpa tucuillata rupachishca jahuami, Aaronga chashna rurajurca.

18Shinallata israelcuna Dioshuan ali cangapaj carashca huagratapash, jari llamatapashmi, cungata muchushpa huañuchirca. Shina huañuchijpimi Aaronbaj churicunaca, chai animalpaj yahuartapash apamunajurca. Chaitaca, altar muyundipimi Aaronga tsirapachirca.

19Shinallata huagrapaj, jari llamapaj viracunatapash, chupatapash, chunllulicunapi, riñongunapi tiaj viratapash, yana shungupi tiaj viratapash,

20pecho aicha jahuapimi churanajurca. Chai viracunataca Aaronga, altarpimi rupachirca.

21Ashtahuangarin pecho aichacunataca, ali lado rigra aichahuanmi Aaronga, Mandaj Diospaj ñaupajpi vichai cuyuchishpa cunashnallata vichai cuyuchishpa cuyujurca. Chaitaca, Mandaj Dios imashna Moisesta mandashcashnallatami cujurca.

22Chai jipami Aaronga, israelcunapaj ladoman paipaj maquita chutashpa bendiciarca. Shinallata israelcunapaj juchamanda cushca animaltapash, tucuillata rupachina animaltapash, Dioshuan ali cangapaj cushca animaltapash huañuchishca jipaca, urai rircallami.

23Shinallata Moisesndi, Aarondimi, Dioshuan tuparina jatun carpaman yaicurca. Chaimanda llujshishpami, israelcunata bendicianajurca. Chaipimi, Mandaj Diospaj punchapambaguca tucuilla israelcunaman ricurimurca.

24Chai jipami, Mandaj Diospaj ñaupajmanda nina llujshishpa, tucuillata rupachina animalpaj aichataca, viracunandi altarpi rupachishpa tucuchirca.

Tucuilla israelcuna chaita ricushpami, Diosta alicachishpa, alpaman chayajta urai cumurinajurca.