EZEQUIEL 9 - Quichua Imbabura Bible

Nalita rurachijcunata huañuchinatami, muscuipishnalla ricushca

1Ñuca uyajtami, cashna nishpa ninanda caparinajurca: “Cai pueblopi causajcunata huañuchijcunamari chayamushca. Paicunaca, tucuicunami tucuchingapaj macanajunacunata, maquipi apashpa shamunajun” nihuarcami.

2Chai jipallami, jahua lado pungumanda shamuna ñandaca, sucta runacuna shamunajujta ricurcani. Paicunaca, tucuicunami tucuchingapaj macanajunacunata maquipi apamunajurca. Paicuna purapi shuj runaca, lino churajunata churajushcami carca. Paica cinturaspica, escribijpaj tinta churanatami apamujurca. Paicuna yaicushpaca, bronce altar ladopimi shayarinajurca.

3Chaipimi, israelcunapaj Taita Diospaj punchapambaguca, querubín nishcapaj jahuapi tiajushcamanda jatarishpa, huasi umbralpi tiarirca. Chaimandami Mandaj Diosca, lino churajunata churajushca escribij runapaj tinta churanata cinturaspi charijuj runata cayarca.

4Mandaj Diosca, chai runataca cashnami nirca: “Jerusalén pueblo chaupita yalishpa, chaipi causajcuna tucui millanayaicunata rurashcamanda, huacashpa ninanda caparinajuj gentecunapaj frentepi, shuj ricuchinata churagri” nircami.

5Ñuca uyajtami, caishuj runacunatapash cashna nirca: “Cangunapash, chai runata catishpa, chai pueblotallata yalishpa, chaipi causajcunata huañuchigrichi. Cangunapaj ñaupajmandaca na quishpichinachu canguichi, na llaquinachu canguichi.

6Rucucunata, chairalla viñaicunata, jarihuan na tacarishca cuitsacunata, huahuacunata, huarmicunataca, shujtallapash na saquishpa huañuchigrichi. Ashtahuangarin shuj ricuchinata frentepi charijcunataca, na tacarinachu canguichi. Ñuca huasipirami, huañuchishpa callarina canguichi” nircami. Shina nijpimi, Diospaj huasi ñaupajpi tiaj mandaj rucucunamanda callarishpa huañuchinajurca.

7Chai runacunataca cashnami nirca: “Diospaj huasita mapayachishpa, chai ucu patiopipash huañushcacunata jundachingapaj llujshinguichi” nircami.

Shina nijpi llujshishpami paicunaca, chai pueblopi causajcunata huañuchinajurca.

8Chaipica, cashnami tucurca: Paicuna huañuchinajujpica, ñucallami puchurcani. Chaimandami ñucaca, alpaman chayajta cumurishpa: “¡Aij, Mandaj Jatun Dioslla! ¿Ninandapacha can fiñarishcata Jerusalenman talinshna cachamushpachu, huaquin puchushca israelcunataca, tucuillata tucuchigringui?” nishpami caparircani.

9Shina nijpimi, cashna nihuarca: “Israelcunapash, Judá llactapi causajcunapash, yapapachami nalita ruranajushca. Chaimandami, cai llactaca yahuarhuan junda. Shinallata cai pueblopash nalita ruranacunahuanlla jundami. Paicunaca: ‘Mandaj Diosca, cai llactataca saquishcami. Mandaj Diosca, na ricujunllu’ ninajurcami.

10Ñucaca, chashnami llaquichisha. Ñuca ñaupajmandaca napacha quishpichishachu, paicunataca napacha llaquishachu. Paicuna nalita rurashpa causashcashnallatami llaquitaca, paicunapaj jahuapi cachamusha” nihuarcami.

11Lino churajunata churajushca, escribijpaj tintata churanata cinturaspi charijuj runaca: “Can mandashcashnallatami, tucuita pactachircani” nishpami tigrachirca.