ÉXODO 22 - Quichua Imbabura Bible

Cutin tigrachishpa cunatami mandashca

1Maijan cashpapash huagrata, na cashpaca llamata shuhuashpa, cungata muchushpa huañuchishca cashpa, na cashpaca jatushca cashpaca, chai huagramandaca picha huagratami tigrachinga. Shinallata llamamandapash, chuscu llamatami tigrachinga.

2Maijanda cashpapash shuhuangapaj huasita utujujujta japishpa, chugrichishpa huañuchishpaca, huañuchij runaca, pai huañuchishcamandaca ima nalita rurashcapash na ricuringachu.

3Ashtahuangarin punlla shuhuajujta japishpa huañuchishpaca, chai huañuchij runaca llaquichi tucungapachami.

Shuhuajushpa japi tucuj runaca, mashna cajpipash tucuitallami tigrachinga. Tigrachingapaj imatapash na charishpaca, shuhuashcamandaca paimi jatui tucunga.

4Huagrata cashpa, na cashpaca burrota cashpa, na cashpaca llamata cashpapash shuhuajushpa causajtara charijushpa japi tucushpaca, chaupita mirachishpami tigrachinga.

5Maijan cashpapash paipaj animalcunata shujpaj pambapi, na cashpaca uvas chagrapi michijushpa, shujpaj jihua pambaman paipaj animal yaicushpa micujpica, animal dueño runaca, paipaj ashtahuan ali jihua pambata, paipaj ashtahuan ali uvas chagratami tigrachinga.

6Maijan cashpapash ninata japichijpi cashacuna rupajushpa, grano tandachishcacunata, na cashpaca nara cuchushcacunata, na cashpaca chagra pambata rupachijpica, ninata japichij runami, chai rupashcamandaca tigrachinga.

7Maijan cashpapash paipaj cumba runaguman culquita cashpa, na cashpaca imapash juyaillagucunata cashpapash mingajpi, chai runapaj huasimanda shuhuajpica, shuhuata tarijpica chai shuhua runami chaupita mirachishpa tigrachinga.

8Shuhua na taririjpica, huasiyu runami juezcunapaj ñaupajman apai tucunga. Chaipimi, cumba runagupaj chai charishcacunataca, paillata apashcata, na apashcatapash tapuchinajunga.

9Tucui imata shuhuashca cajpipash huagrata, burrota, llamata, churajunata shuhuashca cajpi, tucui imalla chingashca cajpimi, maijan cashpapash: ‘Caica ñucapajmi’ nijunga. Shinallata shujpash: ‘Caica ñucapajmi’ nijungami. Shina nijujpica, chai ishcandipaj llaquita ricungapajmi, juezcunapaj ñaupajman pushanga. Chaipica, maijanda cashpapash llaquichinapachami nishpa juezcuna villajpimi, chaupita mirachishpa chai cumba runaguman tigrachinga.

10Maijan cashpapash cumba runaguman burrota, na cashpaca huagrata, na cashpaca llamata, na cashpaca ima animaltapashmi minganga. Shina mingajpimi, chai animalca huañunga, na cashpaca chugringa, na cashpaca pipash na ricujtami apanga.

11Shina tucujpica, paipaj cumba runagu mingashcataca na paillata apashcata ricuchingapajmi, Mandaj Diospaj ñaupajpi ishcandi juramentunga. Shina juramentujpimi, animalpaj dueño crijpi, caishujca na tigrachinga.

12Ashtahuangarin shuhuashca cajpica, animalpaj dueño runaman tigrachingami.

13Urcu animal apashca cajpica, imashna apashcata villashpami, chai apashca animalmandaca imatapash na cunga.

14Ashtahuangarin maijan cashpapash, shujpaj burrota mañashpa charijujpi, chai burropaj dueñoca illajpi chugrichishca, na cashpaca huañuchishca cajpica, chai animalmandaca tigrachingami.

15Ashtahuangarin dueño chaipillata cashca cajpica, na tigrachingachu. Alquilachishca cajpica, alquilachishca culquitallami japinga.

Shujcunata llaquichijpica, imata ruranatami mandashca

16Maijan cashpapash jarihuan nara tacarishca, nara cazarashca cuitsata umachishpa paihuan puñushpaca, mashna culquita cunashnallata cushpami, chai cuitsataca cazaranga.

17Shina cajpipash paipaj taita cazarachingapaj na munajpica, jarihuan nara tacarishca cuitsacunamanda mashna culquita pezashpa cuna cashcashnallatami cunga.

18Yumba huarmitaca, causachun na saquinachu cangui.

19Maijan cashpapash animalhuan chayarishpaca, huañungami.

20Maijan cashpapash, Mandaj Diosman na carashpa, shuj dioscunamanra animalcunata carashpa huañuchishpaca, huañuchi tucungami.

21Shuj llactamanda runataca ama umachinguichu, ama ninanda llaquichinguichu. Cambash, Egipto llactapica, shuj llactamanda rishpami causajurcangui.

22Maijan sapalla huarmitapash, taita mama illaj huahuacunatapash, na llaquichinachu canguichi.

23Paicunata can llaquichijujpi ñucata caparishpa mañanajujpica, paicuna caparinajujtaca uyashapachami.

24Shina uyashpaca, ñucapash nina japirinshna fiñarishpami, cangunataca espadahuan huañuchisha. Shinamandami, cangunapaj huarmicunapash sapalla tucunajunga, cangunapaj huahuacunapash, taita mama illaj quedanajunga.

25Ñuca agllashca puramanda, canhuan causajuj imagutapash na charij runaguman culquita mañachishpaca, yapata mirachishpa japij runashnaca ama canguichu. Mama culquimanda mirashcatapash, na japinachu cangui.

26Cambaj cumba runapaj churajunata prenda japishpaca, nara indi huashajujpillatami tigrachina cangui.

27Chai churajunagutallami, pai jahualla quilparingapaca charin. Chai churajunagutallami, paipaj cuerpota quilparingapaca charin. Paica, ¿imatashi churajushpa puñunga? Pai ñucata caparishpa mañajujpica, ñucaca paita uyashami. Ñucaca, llaquij Diosmi cani.

28Juezcunataca, ama nalicachishpa rimanguichu. Cambaj llacta puracunata mandajtapash, ama ima llaquipash japishpami ali canman ninguichu.

29Punda cozechashca granocunatapash, uvasta cutana pushtupi punda llujshishcatapash, na shuyashpami ñucamanra ucha cuna cangui. Cambaj churicunamanda punda churitaca, ñucamanrami punda cuna cangui.

30Shinallatami cambaj huagracunamanda, cambaj llamacunamandapash punda huacharishcataca, canchis punllacaman paipaj mamahuan saquishpa, pusaj punllapica ñucaman cuna cangui.

31Chashna rurashpami, ñucapajlla shicanyachishca runacuna canguichi. Urcu animalcuna pambapi canishpa huañuchishca aichataca, na micunachu canguichi. Chai aichacunataca, alcucunaman shitanguichi.