NÚMEROS 24 - Quichua Imbabura Bible

1Israelcunata pai bendicianaca, Mandaj Diospaca ali canatami yacharca. Shina yachashpami, Balaam shuti runaca brujota mascangapaj punda rishcashnapash jipaman rishcashnapash na rirca. Ashtahuangarin jichushca pamba ladoman tigrarishpami ricujurca.

2Chaipi vichai ricushpami Balaam shuti runaca, israelcunaca tucui aillucuna shican shican tianajujta ricurca. Chaipimi, Diospaj Espíritu paipajman shamurca.

3Chaimandami Balaam shuti runaca, pai yarichina shimicunahuan cashna nijurca:

“Beor shuti runapaj churi Balaam

shuti runaca, cashnami nijurca:

Ñavita pascashpa ricujuj runami, cashna nijurca:

4Taita Dios imatalla nijta uyaj runami,

cashna nijurca. Tucuita Rurai Ushaj Dios,

muscuipishna ricuchishcata ricuj

runami, cashna nijurca:

Paica urmashca cashpapash, ñavi pascariajmi

cashna nijurca:

5¡Jacobopaj miraicunalla, cangunapaj

carpacunaca juyaillagumari!

¡Israelcunalla, canguna causana

huasicunaca juyaillagumari!

6Jatun larca yacucuna rijunshnami ricurin.

Jatun yacu manñapi tiaj huertacunashnami ricurin.

Mandaj Dios tarpushca áloe yuracunashnami ricurin.

Jatun yacu manñapi tiaj cedro yuracunashnami ricurin.

7Paicunapaj maquihuan yacuta jichajpi yacu

shutujunshnami canga.

Paicunapaj miraicunaca, ashtaca yacupi

tianajunshnami canga.

Paicunata jatun mandajca, Agag shuti

jatun mandajtapash yali alicachi tucushcami canga.

Pai mandajuj llactapash, jatunyachi tucungami.

8Taita Diosmi, paicunataca Egiptomanda llujchimurca.

Paica, búfalo nishca huagrapaj ushaitashnami charin.

Paicunata fiñaj llactacunataca langanshna

tucuchishpami, tullucunatapash ñutunga.

Paicunapaj flechahuanga, huashaman yalijtami shitanga.

9Leonshna siriringapajmi, urai curcuyajunga.

Mama leonshna sirijujtaca, ¿pita rijchachingayari?

Cangunata bendiciajcunaca, bendiciai tucungami.

Cangunata ima llaquipash japishpaca

alimi canman nijcunaca, ninandami

nalicachi tucunajunga” nijurcami.

Balaam shuti runa villashca shimicunami

10Shina nijujta uyashpami Balac shuti runaca, Balaam shuti runahuanga nina japirinshna ninanda fiñarishpa, maquita huactarishpa cashna nirca:

—Candaca, ñucata fiñajcunata ima llaquipash japishpaca, alichari canman nichunmari pushamurcani. Ricui canga, ñucata fiñajcunataca, ña quimsacamanmi bendiciangui.

11Cunanga, cambaj huasiman tigrailla. Ñucaca, candaca alicachishami nircanimi. Ricui, ashtahuangarin Mandaj Diosmi, can alicachi tucunataca jarcashca— nircami.

12Shina nijpimi Balaam shuti runaca, cashna nishpa tigrachirca:

—Ñucapajman can cachamushca chai villaj runacunataca, ¿nachu ñucapash cashna nircani?:

13‘Paipaj huasi ucu junda culquita, orota Balac shuti runa cujpipash, Mandaj Dios rimashcata na cazushpa, ñuca munailla alita cashpa, nalita cashpapash ruraitaca na ushashachu. Ashtahuangarin Mandaj Dios ima nishcatapash chaitallatami villasha’ nircanimi.

14Ricui cunanga, ñuca llacta puracunapajman ña rigrinimi. Shina cashcamanda jipa punllacunapi cai gentecuna, cambaj gentecunata imatalla ruranata ricuchishpa saquingapaj shamui— nijurcami.

15Chaipimi Balaam shuti runaca, pai yarichina shimicunahuan cashna nijurca:

“Beor shuti runapaj churi Balaam shuti

runaca, cashnami nijurca:

Ñavita pascashca ricujuj runami, cashna nijurca:

16Mandaj Dios imatalla nijta uyaj runami,

cashna nijurca. Jahua pachapi causajuj

Dios yachachishca runami, cashna nijurca.

Tucuita Rurai Ushaj Dios muscuipishna

ricuchishcata ricuj runami, cashna nijurca.

Paica urmashca cashpapash, ñavi pascariajmi,

cashna nijuni:

17Paitaca ricushami, shina cashpapash cunanga

na ricui ushanichu.

Ricushpapash, na ladollamandaca ricushachu.

Jacobopaj mirai israelcunamandaca, LUZEROMI llujshinga.

Paicunamandaca, mandana varami llujshinga.

Paimi, Moab llactapi causajcunataca, rinri

ladopi huactashpa chugrichinga.

Set shuti runapaj miraicunataca, tucuillatami tucuchinga.

18Edom llactataca quichungami.

Seir shuti llactataca, paicunata fiñajcunami japinajunga.

Israelcunaca, ninan shinllicunapashmi shayarinajunga.

19Jacobopaj miraimandaca, mandashpa charij runa

llujshishpami, pueblopi puchushcacunataca

tucuchinga” nijurcami.

20Balaam shuti runaca, amalecitacunata ricushpami, pai yarichina shimicunahuan cashna villarca:

“Amalecitacunaca, tucuilla llactacunapaj umashnami.

Ashtahuangarin tucuripica, causaita

causaicamanmi chinganga” nijurcami.

21Shinallata ceneocunatapash ricushpami, pai yarichina shimicunahuan cashna nirca:

“Cangunapaj huasicunaca, shinlli huasicunami.

Jatun rumi ucupi churashca tazimbishnami causanguichi.

22Ashtahuangarin Asiria llactapi causajcuna

mishashpa prezu apajpica, ceneocuna causaj llactaca

shitashcami siringa” nircami.

23Balaam shuti runaca, cutimbashmi pai yarichina shimicunahuan cashna nijurca:

“¡Aij! Taita Diosllata chashna llaquicunata

rurajpica, ¿pita causai ushangayari?

24Quitim shuti llactapi tiaj mama cucha manñamanda

jatun barcocuna shamushpami, Asiria llactatapash,

Heber shuti llactatapash llaquichinga.

Ashtahuangarin chai llaquichij runacunapashmi,

causaita causaicaman tucuringa” nijurcami.

25Chai jipami, Balaam shuti runaca jatarishpa, paipaj llactaman tigrarca. Shinallata Balac shuti runapash, ñanda japishpa rircallami.