2 CRÓNICAS 32 - Quichua Imbabura Bible

Judá llactamanmi, Senaquerib shuti runaca yaicushca(2 Rey. 18:13-37; Isa. 36:1-22)

1Tucui chaicunata Ezequías shuti runa rurashca jipa, Diosta cazushcata ricuchishca jipami, asiriocunata jatun mandaj Senaquerib shuti runaca, Judá llactata japingapaj yaicurca. Jatun pircacunahuan pueblocunata quichungapaj munashpami, chai pueblocunapi causajcunahuan macanajungapaj carpacunata shayachishpa tiarirca.

2Senaquerib shuti runaca, Jerusalenbi causajcunahuan macanajuna munaihuan shamushcatami, Ezequías runaca ricurca.

3Chaimandami, pai churashca mandajcunahuan, ninan shinlli paipaj soldadocunahuanga, pueblo canllaman tiaj pugyucunata alpahuan quilpanata yarinajurca. Shina yarishca jipaca, paicunallatami ayudanajurca.

4Chaimandami, ashtaca gentecuna tandanajushpa, tucui pugyucunatapash, alpa ucuta rinajuj yacutapash quilpanajurca. Paicunaca: “Asiria llactata jatun mandajcuna chayamushpaca, ¿imashpata ashtaca yacuta taringayari?” nishpami, chashna ruranajurca.

5Chai jipami Ezequías runaca, chaita rurana munaihuambacha, chai pueblo muyundi jatun pirca urmashcacunataca, cutin shayachirca. Shinallata torrecunatapashmi rurarca. Chai jatun pirca canlla ladomambash, shuj jatun pircatami rurarca. Davidpaj pueblopi tiaj Milo nishca pushtutapashmi, ashtahuan shinllita rurachirca. Shinallata ashtaca espadacunata, jarcarina escudocunatapashmi rurachirca.

6Chai jipami, macanajuj gentecunata mandachunga mandaj soldadocunata churashpa, Jerusalén pueblo pungu lado plazapi tucuicuna tandanajuchun mandarca. Chaipimi, paicunapaj shunguman chayajta, rimashpa cashna nijurca:

7“Shinlli tucushpa, cushijuita japichi. Imatapash na manllanachu canguichi. Asiria llactata jatun mandajtapash, paihuan shamuj ashtaca soldadocunatapash na manllanachu canguichi. Ñucanchica, chai jatun mandajtaca ashtahuan yali ushaitami charinchi.

8Chai jatun mandajca, runacunapaj ushaihuanllami. Ashtahuangarin ñucanchi macanajuipi ayudangapaca, ñucanchita Mandaj Taita Diosmi ñucanchihuan” nijurcami. Judá llactata jatun mandaj Ezequías runa chashna nishcatallami, gentecunaca yarianajurca.

9Chai jipami, asiriocunata jatun mandaj Senaquerib shuti runaca, paita servijcunata Jerusalenman cacharca. Paica, paipaj soldadocunahuan Laquis shuti pueblota chaupipi churashca cashpami, chashna cacharca. Paicunataca, Judá llactata jatun mandaj Ezequías runamambash, Judá llactamanda Jerusalenbi tucui causajcunamambash, cashna nichunmi cacharca:

10“Asiriocunata jatun mandaj Senaquerib shuti runaca, cashnami nin: ‘¿Imata yarianajushpata cangunaca, Jerusalenda chaupipi churashpa shayanajujpipash, shinlli tucushpa macanajungapaj shuyanajunguichi?

11Ezequías runaca cangunataca: Ñucanchita Mandaj Taita Diosmi, Asiria llactata jatun mandajpaj maquimanda quishpichinga nijunmi. Chashna nishpaca, ¿nachu yarjaimanda, yacunaimanda canguna huañuchun chashna umachijun?

12¿Nachu Ezequías runallata Diosman rurashca lomacunapi huasicunatapash, altarcunatapash anchuchirca? ¿Nachu chashna anchuchishpaca, Judá llactapi, Jerusalenbi causajcunataca: Cai altar ñaupajpillami Diosta mañana canguichi, inciensotapash cai altarpillatami cushnichina canguichi nishpa mandarca?

13Shuj llactapi causaj gentecunata ñucapash, ñuca ñaupa taitacunapash, tucui imatalla rurashcataca, ¿nachu yachashcanguichi? ¿Chai llactacunapi causajcunapaj dioscunaca, paicunapaj llactata ñuca maquimanda cacharichi usharcachu?

14Ñuca ñaupa taitacuna tucuchishca llactacunapaj tucui dios puramandaca, ¿maijan diosta, paipaj gentecunataca ñuca maquimanda quishpichi usharca? Cangunapaj Taita Diospash, ¿imashnashi ñuca maquimandaca quishpichi ushanga?

15Cunanga, Ezequías runa cangunata umachijuchunga, na saquinachu canguichi. Chashna nishpa crichijujpipash, na crinachu canguichi. Tucui chai llactacunapaj dioscunapash, mandajuj llactacunapaj dioscunapash, maijan diospash, paicunapaj gentecunataca ñuca maquimandapash, ñuca ñaupa taitacunapaj maquimandapash cacharichitaca na usharcachu. ¿Cangunapaj Taita Diosrachu ñuca maquimanda cacharichi ushanga?’ ninmi” nichunmi cacharca.

16Chai servijcunaca, Mandaj Taita Diostapash, paita servij Ezequías runatapashmi, ashtahuan shuj shimicunahuan rimanajurca.

17Chai jahuapashmi Senaquerib shuti runaca, israelcunata Mandaj Diosta ninanda nalicachishpa rimashpa, cartacunata escribishpa cachamushca carca. Chai cartacunapica, cashnami rimajurca: “Imashnami shuj llactacunapi causaj gentecunapaj dioscunaca, paicunapaj gentecunata, ñuca maquimanda na cacharichi usharca, shinallatami Ezequías runapaj Taita Diospash, paipaj runacunata ñuca maquimanda cacharichitaca na ushanga” nishpami escribishca carca.

18Chai mandajcunaca, ninanda manllachingapajmi, Jerusalén pueblo muyundi pircapi tianajujcunataca, Judá llacta rimaipi shinllita caparishpa rimanajurca. Chai pueblota japina yuyaihuanmi, chashna ninajurca.

19Chai mandajcunaca, Jerusalenbi causajcunapaj Taita Diostaca, shuj llactacunapi causajcunapaj dioscunatashnami, fiñashpa rimanajurca. Chai dioscunaca, runacunapaj maquihuan rurashcalla dioscunami.

Mandaj Diosmi, Ezequías shuti runataca cacharichishca(2 Rey. 19:1-37; Isa. 37:1-38)

20Ashtahuangarin chashna rimashcamandami, jatun mandaj Ezequías shuti runapash, Amoz shuti runapaj churi, Dios ima nishcata villaj Isaiaspash, jahua pachapi causajuj Diosta caparishpa mañanajurca.

21Paicuna mañanajujpimi Mandaj Diosca, shuj angelta cachamurca. Chai angelmi, Asiria llactata jatun mandajpaj carpacunapi tianajuj ninan shinlli, imatapash na manllaj soldadocunatapash, mandajcunatapash, chai soldadocunata mandajcunatapash huañuchirca. Chaimandami chai jatun mandajca, ninanda pingai tucushpa paipaj llactaman tigrashpaca, paipaj diospaj huasiman yaicurca. Chaipimi paipaj churicunallata, espadahuan huañuchirca.

22Shinami Mandaj Diosca, Ezequías runatapash, Jerusalenbi causajcunatapash, Asiria llactata jatun mandaj Senaquerib shuti runapaj maquimanda, tucui shujcunapaj maquimandapash quishpichirca. Shinami, caimanda chaimanda llaquichijujpipash samachirca.

23Chaimandami Mandaj Diosman imagutapash carangapaj, ashtacacuna Jerusalenman apamunajurca. Shinallata Judá llactata jatun mandaj Ezequías runamambash, juyailla caranacunatami apamunajurca. Chai jipami Ezequías runaca, tucui shuj llactacunapi causajcunapaj ñaupajpica, ninanda jatunyachi tucurca.

Ezequías shuti runami, ung:uihuan cashca(2 Rey. 20:1-11; Isa. 38:1-22)

24Chai huatacunami Ezequías shuti runaca, ung:uihuan huañunalla sirijurca. Chaimandami Ezequías runaca, Mandaj Diosta mañajpi Diosca uyashpa, shuj ricuchinata ricuchirca.

25Ashtahuangarin Ezequías runaca, alicunata paiman rurashcamandaca na pashi nircachu, ashtahuangarin paipaj shungupimi jariyarca. Chaimandami Taita Diosca paihuambash, Judá llactapi causajcunahuambash, Jerusalenbi causajcunahuambash, ninanda fiñarirca.

26Shina cashpapash Ezequías runaca, paipaj shungupi jariyashca jipaca paipash, Jerusalenbi causajcunapashmi pingai tucushpa, urai cumurinajurca. Chaimandami Mandaj Diosca, ninanda fiñarishca cashpapash, Ezequías runa causajui punllacunapica, na llaquichirca.

Babilonia llactamanda cachamushcacunatami, Ezequías shuti runaca chasquishca(2 Rey. 20:12-19; Isa. 39:1-8)

27Ezequías runaca, ninan charijpash, ninandapacha alicachi tucushcapashmi carca. Paica, ashtaca culquita, orota, juyailla rumicunata, mishquillagu ashnajuj jambicunata, jarcarina escudocunata, munanayai shuj shuj juyailla charinacunatapashmi charirca.

28Shinallata imamandalla carana granocunata, vinota, aceiteta, alichina huasicunatapashmi rurachirca. Shican shican animalcuna shayana huasicunatapash, tucui animalcunapaj corralcunatapashmi rurachirca.

29Tauca pueblocunatapashmi rurachirca. Llamacunata, huarmi huagracunataca, ashtacatapachami charirca. Chai ashtaca alicunataca, Taita Diosmi carashca carca.

30Cai Ezequías runami, janaj ladoman tiaj Gihón shuti pugyu yacuta quilparca. Chai yacutaca, indi huashajuj ladoman, Davidpaj pueblomanmi apamurca. Shinami, imatalla Ezequías runa rurai callarishcapash, tucuipi ali llujshirca.

31Ashtahuangarin Judá llactapica, ima jatun llaquicuna tucushcata, jatun manllarinacunata rurashcata tapushpa yachachunmi, Babilonia llactata mandajcunaca, huaquin villajcunata cachamurca. Taita Diosca, Ezequías runapaj shungupi imashna yarijushcata yachangapajmi, paicuna shamujpica saquircalla.

Ezequías shuti runa huañushcatami villajun(2 Rey. 20:20-21)

32Ezequías shuti runa imatalla ashtahuan rurashcapash, shujcunata llaquij cashcapash, Dios ima nishcata villaj Isaías, Dios villashcata escribishca libropimi tucuilla tiajun. Isaiasca, Amoz shuti runapaj churimi carca. Judá llactata, Israel llactata jatun mandajcuna imatalla rurashcata escribishca libropimi tiajun.

33Ezequías runa huañushpa, paipaj ñaupa taitacunahuan tandanajujpica, Judá llactapi tucui causajcunapash, Jerusalenbi tucui causajcunapash, paita alicachishpami, Davidpaj miraicunata pambana utujucunamanda ashtahuan ali utujupi pambarca. Paipaj randica, Manasés shuti paipaj churimi mandajurca.