JOSUÉ 9 - Quichua Imbabura Bible

Gabaonitacunami israelcunata umashca

1Heteo, amorreo, cananeo, ferezeo, heveo, jebuseo nishca gentecunata tucuilla jatun mandajcunaca, tucui chaicunata israelcuna rurashcatami yacharca. Tucui chai gentecunaca, Jordán yacu cai ladopi, urcucunapi, pugru pambacunapi, Líbano shuti llacta chimba purapi tiaj Mama Cucha ladocunapimi causanajurca.

2Paicunaca, Josuehuan, israelcunahuan macanajungapajmi, parlarishpa tandanajurca.

3Ashtahuangarin Gabaón shuti pueblopi causajcunaca, Jericó pueblopi causajcunatapash, Hai shuti pueblopi causajcunatapash, Josué imatalla rurashcatami yacharca.

4Chaimandami paicunaca, umachinata ali yachajcuna cashpallata, jatun mandajpaj randi parlajcunashnalla tucushpa, Josuetaca umachinata yarinajurca. Paicunaca, mauca mauca costalcunata, vinotapash liquirishcata sirashca, mauca mauca caracunapimi, burrocunaman apachishpa rinajurca.

5Shinallata chaquipi churajunatapash, sirashca mauca maucacunata, paicuna churajunacunatapash, mauca maucacunata churajushpami rinajurca. Ñambi micuna tandatapash, chaquishpa mujuzuyashcatami apanajurca.

6Gilgal pueblo ladollapi carpacunata shayachishca tianajuj, Josuepajman shamushpami Josuetapash, israelcunatapash cashna ninajurca:

—Ñucanchica, caru caru llactamandami shamupanchi. Cunanga, ñucanchihuan imatalla pactachingapaj ari nihuaichi— ninajurcami.

7Shina ninajujpimi israelcunaca, heveo nishca gentecunataca:

—Ñucanchi ladollapi causajcunallatapash canguichipashchari. ¿Imashnata cangunahuanga ari nishunyari?— ninajurca.

8Shina ninajujpimi paicunaca, Josuetaca:

—Ñucanchica, canda servijcunami capanchi— nijpi Josueca:

—Cangunaca, ¿picunata canguichi, maimandata shamunguichi?— nishpa tapurca.

9Shina nijpimi paicunaca, cashna nishpa tigrachinajurca:

—Canda servijcunaca, caru caru llactamandami shamupanchi. Canda Mandaj Taita Diospaj shutica, tucui rijsishca cashcata yachashpa, Egiptopi imatalla rurashcata yachashpami shamupanchi.

10Shinallata Jordán yacu chimba ladopi causanajuj amorreocunapaj ishcai jatun mandajcunata, tucui imatalla rurashcatapash uyaparcanchimi. Paicunaca, Hesbón shuti pueblopi jatun mandaj Sehón shuti runapash, Basán shuti llactapi tiaj Astarot shuti pueblopi jatun mandaj Og shuti runapashmi carca.

11Chaimandami ñucanchita mandaj rucucunapash, ñucanchi llactapi tucui causajcunapash, cashna ninajurca: ‘Ñambi micungapaj micunata apashpa, paicunata tuparingapaj richi. Paicunapajman chayashpaca: Ñucanchica, cangunata servijcunami canchi. Ñucanchihuan imatalla pactachingapaj ari nihuaichi ninguichi’ nishpami cachamurca.

12Cangunata tuparingapaj llujshimui punllapica, cai ñucanchi tandataca rupajllatami, ñucanchi huasimandaca apamurcanchi. Ricui cunanga, ña chaquishpa mujuzushcamari.

13Shinallata vinotapash, mushuj caracunapimi jundachishpa apamurcanchi. Ricui, cunanga maucayashpami, ña liquirijun. Ñucanchi cai churajushcacunapash, chaquipi churajushcacunapash, mushujmi carca. Carumandapacha shamujpimi, chashna ña maucayashca— ninajurcami.

14Israelcunaca, chai runacuna apamushca micunacunatami chasquirca. Ashtahuangarin Mandaj Diostaca, na tapurcachu.

15Chai jipami Josueca, paicunataca casilla aliguta causachun saquishpa, causanajuchun saquishunmi nishpa pactachingapaj ari nirca. Shinallata israelcunata mandajcunapashmi juramenturca.

16Chashna ari nishca quimsa punlla jipami, chai runacunataca, paicuna causanajuj ladollapi causajcunallata cashcata yacharca.

17Chaimandami israelcuna mascangapaj rishpaca, chai runacuna causanajuj pueblocunamanga, quimsa punllallapi chayarca. Paicunapaj pueblocunaca: Gabaón, Cafira, Beerot, Quiriat-jearim shuticunami carca.

18Tandanajushca israelcunata mandajcunallata israelcunata Mandaj Taita Diospaj shutipi juramentushcamandami, chaipi causajcunataca na huañuchi usharca. Chaimandami tandanajushca tucuilla israelcunaca, paicunata mandajcunata huashalla rimanajurca.

19Ashtahuangarin tucui mandajcunami, tucuilla tandanajushca israelcunataca cashna ninajurca:

—Ñucanchimi, israelcunata Mandaj Taita Diospaj shutipi juramenturcanchi. Chaimandami cunanga, chai runacunataca imatapash na rurai ushanchi.

20Cashnami paicunahuanga rurana canchi: Paicunataca, causanajuchun saquinallami canchi. Paicunaman juramentushca jahua huañuchijpi, Dios fiñarishcata ñucanchi jahuapi ama cachamuchunmi, na huañuchina canchi— ninajurcami.

21Chaimandami israelcunata mandajcunaca:

—Paicunataca, causanajuchun saquichilla— ninajurca.

Shinamandami, israelcunata mandajcuna juramentushcashnallata causanajuchun saquishpa, tandanajushca tucui israelcunaman yamdata, yacuta yalichishpa servinajuchun churarca.

22Josueca, chai runacunata cayashpami cashna nirca:

—¿Imashpata cangunaca: ‘Cai ladolla llactamanda cashpata, caru caru llactamandami shamunchi’ nishpa umachircanguichi?

23Chashna cashcamanda cunanga, ninanda nalicachi tucushcacunami canguichi. Canguna puramandaca, ñucanchita servishpa causajcunaca na illangachu. Yamdacunata cuchushpa, yacuta llujchishpa, ñuca Taita Diospaj huasiman yalichishpami causanguichi— nircami.

24Shina nijpimi paicunaca, Josueman cashna nishpa tigrachinajurca:

—Tucuilla llactataca, cangunaman carasha nishpa, cangunata Mandaj Taita Diosta servij Moisesman villashcatami, cangunata servijcunaca yachaparcanchi. Shinallata chai llactapi causajcunataca, cangunapaj ñaupajpillatami, tucuillata tucuchishun nishcatapashmi yachaparcanchi. Chaimandami, canguna ñucanchita huañuchinata ninanda manllashpa, chashna ruraparcanchi.

25Cunanga, cambaj maquipimi capanchi. Ñucanchitaca, imata rurashpa cambi ali cana cajpipash, chaita rurapailla— ninajurcami.

26Shina nijpimi Josueca, paicuna nishcashnallata rurashpa, chai runacunataca, israelcunapaj maquimanda cacharichirca. Chaimandami, paicunataca na huañuchirca.

27Chai punllami Josueca, gabaonitacunataca tandanajushca tucui israelcunamambash, Mandaj Diospaj altarmambash, yamdata, yacuta yalichishpa servinajuchun churarca. Mandaj Dios agllashca maijan pushtupipash, chashna rurashpa causanajuchunmi churarca. Gabaonitacunaca, cunangamanmi chaita rurashpa causanajun.