NÚMEROS 20 - Quichua Imbabura Bible

Jatun rumimandami, yacu llujshishca

1Tandanajushca tucui israelcunaca, huatapaj callari punda quillapimi, Zin nishca jichushca pambaman tucuicuna chayamurca. Chaiman chayamushpaca, Cades shuti pueblopimi unaicaman causanajurca. Chaipimi, Moisespaj pani Mariaca huañurca. Paitaca chaipillatami pambarca.

2Chaipica, tandanajushca israelcunapaj yacu na tiajpimi Moisestapash, Aarondapash fiñashpa rimangapaj tandanajurca.

3Chaipimi israelcunaca, Moisesta fiñashpa, cashna nishpa rimanajurca:

—Mandaj Diospaj ñaupajpi ñucanchi huauquicuna huañushca horallata ñucanchipash huañushpachari, ali canchiman carca.

4Mandaj Diospajlla tandanajushca israelcunataca, ¿imashpata cai jichushca pambaman pushamurcangui? ¿Ñucanchipash, ñucanchi animalcunapash huañuchunllachu pushamurcangui?

5¿Imashpata ñucanchitaca Egiptomanda llujchishpa, cai nali pushtuman vichai pushamurcangui? Caipica jigoscunata, uvascunata, granadillacunata tarpungapajpash na alichu. Ufiangapaj yacullapash na tianllu— ninajurcami.

6Chashna rimajpimi Moisespash, Aaronbash chai tandanajushca israelcunapaj ñaupajmanda anchurishpa, Dioshuan tuparina jatun carpa punguman rinajurca. Chaiman ña chayashpaca cungurishpami, alpaman chayajta cumurinajurca. Chaipimi Mandaj Diosca, paicunapaj jahuapi punchapamba ricurirca.

7Chaipimi Mandaj Diosca, Moisesman cashna nishpa villarca:

8—Cambaj vara caspita japi. Chai jipaca, cambaj huauqui Aaronhuan ishcai tucushpa, tucuilla israelcunata tandachimushpa, paicunapaj ñaupajpi chai jaca rumita rimai. Shina rimajpimi chai rumimandaca, ashtaca yacu llujshinga. Chai jaca rumimanda yacuta llujchishpami, tandanajushca israelcunamambash, paicunapaj animalcunamambash ufiachun carangui— nircami.

9Shina nijpimi Moisesca, Mandaj Diospaj ñaupajmanda vara caspitaca, Dios mandashcashnallata japirca.

10Chai jipami, tandanajushca israelcunataca Moisespash, Aaronbash, chai jaca rumi ñaupajman tandachishpa cashna nirca:

—¡Na cazuj gentecuna, cunanga uyaichi! ¿Cai jaca rumimandachu, yacuta llujchina canchi?— nircami.

11Shina nishpami Moisesca, paipaj maquita alsashpa chai jaca rumitaca, paipaj vara caspihuan ishcaicaman huactarca. Shina huactajpimi, yacuca ashtaca llujshijurca. Shina llujshijujpimi tandanajushca israelcunapash, paicunapaj animalcunapash yacuta ufianajurca.

12Chaipimi Mandaj Diosca Moisestapash, Aarondapash cashna nirca:

—Cangunaca, ñucata na crishpami, ñuca jucha illaj cajtaca, israelcunapaj ñaupajpi na ricuchircanguichi. Chaimandami tandanajushca cai israelcunataca, ñuca carashca llactaman na chayachi ushanguichi— nircami.

13Caicunaca, fiñanajui nishca yacucunami. Chai yacucunamandami israelcunaca, Mandaj Dioshuan fiñanajurca. Diosca paicuna purapica, jucha illaj cajtami ricuchirca.

Edomitacunami, israelcunata na yalichingapaj munashca

14Cades shuti pueblomandapachami Moisesca, paipaj randi rimajcunata Edom shuti llactata jatun mandajta cashna nichun cacharca: “Cambaj huauqui israelcunaca, candaca cashnami ninajun: ‘Tucui llaquicunata ñucanchi charijtaca, canllata alimi yachangui.

15Ñucanchi taitacuna Egiptoman urai rishcamandami ñucanchica, Egiptopillata unai huatacunata causarcanchi. Chaipimi, Egiptopi causajcunaca ñucanchitapash, ñucanchi taitacunatashnallata ninanda llaquichinajurca.

16Shinamandami ñucanchica, Mandaj Diosta caparishpa mañanajurcanchi. Ñucanchi mañanajujpi Mandaj Dios uyashpami, paipaj angelta cachamushpa, Egiptomanda llujchimurca. Ricui cunanga, cambaj llacta lindero ladollacunapi tiaj Cades shuti pueblopimi canchi.

17Shina cashcamanda cambaj llactata yalingapaj cambaj ñanda mañachihuai nipanchimi. Cangunapaj tarpushca chagracunatapash, uvas chagracunatapash na yalipashunllu. Canguna yacuta llujchingapaj allashca jatun utujucunamanda, yacutapash na ufiapashunllu. Cambaj llactata yalingacaman ali ladomambash, lluqui ladomambash na llujshishpami, jatun mandajpaj ñandalla yalipashun’ ninajunmi” nichunmi cacharca.

18Shina nijpimi shuti llactata jatun mandajca, cashna nishpa tigrachirca:

—Ñuca llactataca, napacha yalinguichu. Na uyashpa yalingapaj munajpica, macanajunacunahuan alichirishpami, canhuan macanajungapaj llujshisha— nircami.

19Shina nijpimi israelcunaca, cashna ninajurca:

—Ñucanchica, jatun ñandallamari ripashun. Ñucanchipash, ñucanchi animalcunapash, cambaj yacucunata ufiashpaca, chai yacumandaca mashna cajpipash cupashunllami. Chaquilla yalingapajlla saquihuai. Chaica, imapash na cangachu— ninajurcami.

20Ashtahuangarin Edom shuti llactata jatun mandajca:

—Caitaca napacha yalinguichu— nishpami tigrachirca.

Shina nishpami Edom llactata jatun mandajca, Moisesta fiñashpa, ninan shinlli, ashtaca soldadocunandi macanajungapaj llujshirca.

21Edom llactata mandajca, paipaj llactata israelcuna yalinajuchun saquingapaca na munarcachu. Chaimandami israelcunaca, chai llactamanda anchurinajurca.

Aaronga, Hor shuti urcupimi huañushca

22Israelcuna, Cades shuti pueblomanda llujshishpaca, tucui chai tandanajushca gentecunami, Hor shuti urcuman shamunajurca.

23Mandaj Diosca, Hor shuti urcupi, Edom shuti llacta linderopimi Moisesmambash, Aaronmambash, cashna nishpa villarca:

24“Aaronga huañushpami, paipaj gentecunahuan tandanajunga. Paica, israelcunaman ñuca carashca llactaman na yaicungachu. Fiñanajui nishca yacu ladopi canguna ñuca mandashcata na cazushcamandami, na yaicunga.

25Canga Aarondapash, paipaj churi Eleazartapash japishpa, Hor shuti urcuman pushashpa vichai ringui.

26Chaipica, Aarón cura churajushcata surcuchishpa, chai churajunataca paipaj churi Eleazarman churachingui. Aaronga chaipi huañushpami, paipaj gentecunahuan tandanajunga” nircami.

27Mandaj Dios mandashcashnallatami, Moisesca rurarca. Chaimandami, tandanajushca tucuilla israelcuna ricujta Hor shuti urcuman vichai rinajurca.

28Chaiman chayashpami Moisesca, Aarón churajushcacunata surcuchishpa, Aaronbaj churi Eleazarman churachirca. Aaronga, chai urcu jahuapimi huañurca. Moiseshuan, Eleazarhuanga chai urcumanda urai shamurcallami.

29Aarón huañushcata tucuilla tandanajushca israelcuna yachashpaca, tucuilla Israel familiacunami quimsa chunga punllacunacaman, ninanda llaquirinajurca.