DEUTERONOMIO 25 - Quichua Imbabura Bible

1Canguna purapi fiñanajuita charishpaca, juezcuna aliguta ricushpa alichinajuchunmi, juezcunapajman rina canguichi. Paicunami, imatapash cashcatapacha ruraj runataca cacharinga, nalita ruraj runataca llaquichinga.

2Nalita ruraj runa asti tucuna cajpica, juezmi alpapi chutachishpa, paipaj ñaupajpi astichinga. Chai runa imashna nalita rurashcashnallatami, mashnata astina cajpipash astichinga.

3Chuscu chungamanda yalitaca, na astinachu canguichi. Chuscu chunga yalita astijpica, cambaj purallata chai runaca cangunapaj ñaupajpi, yangapi churai tucushcata yarinman.

4Trillajushpaca, huagrapaj shimitaca na huatanachu cangui.

5Chai huasipillata huauquipura causanajushpa, paicuna puramanda maijan cashpapash, churita nara charishpallatami huañunga. Shina huañujpica, chai huañushcapaj huarmica, na rijsishca shuj jarihuanga, na cazarai ushangachu. Chai huarmipaj cusapaj huauquillatami, chai huarmihuan cazarashpa, chai huarmipi chayanga. Chashnami paihuanga, cutin familiapura tucunga.

6Huañushca huauquipaj huarmihuan charishca punda churitaca, huañushca huauquipaj shutitami shutichinga. Huañushca huauquipaj shuti, Israel puramanda ama chingachunmi, chashna ruranga.

7Huauquipaj huarmihuan cazarangapaj na munajpica, huauquipaj huarmica puebloman yaicuna pungupi tianajuj mandaj rucucunapajman rishpami, cashna nishpa villanga: ‘Ñuca huañuj cusapaj huauquica, paipaj huauquipaj shuti, Israel purapi tiachunga, napacha ñucahuan cazarangapaj munanllu’ ningami.

8Shina villajpimi, chai pueblopi mandaj rucucunaca, na cazarangapaj munaj runata cayashpa, paihuan parlanga. Shina parlajpipash: ‘Napacha cazarangapaj munanichu’ nishpa jataringapashchari.

9Shina jatarijpica, paipaj huauquipaj huarmica, paipajman quimirishpami, mandaj rucucunapaj ñaupajpi paipaj pargateta chaquipi churajushcata llujchinga. Chaipaj jipaca, ñavipi t'ucashpami: ‘Huauquipaj huasi ucu puracuna tiachun na munaj runataca, cashnami rurana’ ninga.

10Shina cajpimi, Israel purapica: ‘Lluchu chaqui runapaj huasi ucu purami’ nishpa shutichinga.

11Maijangunapash randimanda macanajunajujpi, maijambaj huarmi cashpapash, chugrichijuj runapaj maquimanda paipaj cusata mitsangapaj quimiringapashchari. Shina quimirishpaca caishuj runataca, paipaj pinganayai pushtupi japingapashchari.

12Shina rurajpica, chai huarmipaj maquitaca, napacha llaquishpami fitina cangui.

13Pezana cambaj muchilapica, chaipillata jatundapash, uchillatapash chapushpaca, na charinachu cangui.

14Cambaj huasipica, efa nishca medinataca, chai medinatallata jatundapash, uchillatapash, na charinachu cangui.

15Ashtahuangarin imatapash cashcatapacha pezanata, imatapash cashcatapacha medina efatami charina cangui. Shina cashpami, canda Mandaj Taita Dios carashca llactapi causai callarishpaca, unaita causangui.

16Canda Mandaj Taita Diosca, maijambash chashna rurajcunata, imatapash cashcatapacha na rurajcunataca millanayachinmi.

Amalecitacunata tucuchinajuchunmi mandashca

17Egiptomanda llujshishpa ñanda shamujujpi, amalecitacuna imata rurashcataca, yarinami cangui.

18Imashna ñambi tuparingapaj llujshishpa, cambaj huashata catimunajuj, imatapash na rurai ushajcunata llaquichishcatapash yarinami cangui. Cangunaca, imatapash ninanda rurashpa shaijushcacuna cajpimi, chashna llaquichirca. Paicunaca, Taita Diostaca na manllarcachu.

19Cangunapaj muyundipi causanajuj cangunata tucui fiñajcunamandaca, canda Mandaj Taita Diosmi samachinga. Cambaj cachun canda Mandaj Taita Dios carashca llactapimi, chashna samachinga. Shina rurajpica, amalecitacunata cai pachapi ama ashtahuan yarinajuchunmi, na cungashpa tucuillata chingachina cangui.