2 CRÓNICAS 34 - Quichua Imbabura Bible

Josías shuti runami mandajushca(2 Rey. 22:1-2)

1Josías shuti runaca, pusaj huatata charishpami, mandai callarirca. Paica, quimsa chunga shuj huatatami, Jerusalenbi mandajurca.

2Paica, Mandaj Diospaj ñaupajpica, alitallami rurashpa causajurca. Paipaj ñaupa taita David causashcashnallatami, ali ladomambash, lluqui ladomambash na anchurishpa catijurca.

Diosta yarinajungapajmi, Josías shuti runaca mushujta callarichishca(2 Rey. 23:4-20)

3Josías shuti runaca, ña pusaj huatata mandajushpapash, chaira huambrarami carca. Shina cashpapash, paipaj ñaupa taita Davidpaj Taita Diostami mascai callarirca. Ña chunga ishcai huatata mandajushpami, Judá llactapi, Jerusalenbi tiaj lomacunapi altarcunatapash, Asera shuti huarmi diosman rijchajcunatapash, labrashpa rurashca dioscunatapash, yacuyachishpa rurashca dioscunatapash tucuillata anchuchi callarirca.

4Baal shuti dioscunapaj altarcunatapash, Josías runapaj ñaupajpi urmachishpami, chaicunapaj jahuapi rurashca indiman rijchajcunatapash, tucuillata ñuturca. Shinallata Asera shuti huarmi diosman rijchajcunatapash, labrashpa rurashca dioscunatapash, yacuyachishpa rurashca dioscunatapashmi ñuturca. Chai ñutushcacunataca, chai dioscunaman animalcunata cushpa rupachijcunata pambashca jahuapimi tsirapachirca.

5Chai jahuapash curacunapaj tullucunatapash, paicunapaj altarcunapillatami rupachirca. Shinami Josías runaca, Judá llactamandapash, Jerusalenmandapash, mapata tucuilla anchuchirca.

6Manasés, Efraín, Simeón shuti llactacunapi tiaj pueblocunapipash, Neftalí shuti llactapi tiaj pueblocunacamanmi chashnallata rurajurca. Chai pueblo muyundicunapi tiaj jichushca pushtucunapipash, chashnallatami rurajurca.

7Tucui Israel llactapi tiaj altarcunata, Asera shuti huarmi diosman rijchajcunata, labrashpa rurashca dioscunata, tucuilla yanga dioscunatapashmi faquishpa ñuturca. Chai jipami, Jerusalenman tigrarca.

Dios mandashcata escribishca librotami tarishca(2 Rey. 22:3—23:3)

8Josías shuti runaca, ñami chunga pusaj huatata mandajurca. Chai llactamandapash, Diospaj huasimandapash tucuilla mapata anchuchishca jipami, paita Mandaj Taita Diospaj huasita cutin alichinajuchun mandarca. Azalía shuti runapaj churi Safán shuti runata, pueblota mandaj Maasías shuti runata, paipaj randi rimaj Joacaz shuti runapaj churi Joa shuti runatami chashna mandarca.

9Paicunaca, curacunata mandaj Hilcías shuti runapajmanmi shamurca. Shina shamushpami, Mandaj Diospaj huasiman apamushca culquita cunajurca. Chai culquitaca, Diospaj huasi pungupi cuidaj levitacunami Manasespaj, Efrainbaj aillu puracuna huaquin quedashca israelcuna, tucui Judá llactapi, Benjamín llactapi, Jerusalenbi causajcuna cujpi tandachishca carca.

10Chai culquitaca, Mandaj Diospaj huasita alichijcunata ricuj mayordomocunamanmi cunajurca. Paicunami, Mandaj Diospaj huasita alichishpa imatalla rurajcunaman cunajurca. Paicunaca, Diospaj huasita cutin alichishpa, punda imashna cashcatashnallata rurangapajmi, chashna ruranajurca.

11Shinallata carpinterocunamambash, rumita labraj runacunamambashmi, labrana rumicunata, caspicunata randichun cunajurca. Judá llactata jatun mandajcuna urmachishca huasicunata alichingapaj shayachina caspicunata, chai huasicunata quilpashpa churana tablacunata randichumbashmi, culquita cunajurca.

12Huasita alichij chai runacunaca, tucuitami aliguta pactachishpa ruranajurca. Paicunata ricuj mayordomocunaca, Merari shuti runapaj miraipura Jahat shuti, Abdías shuti levitacuna, shinallata Coat shuti runapaj miraipura Zacarías shuti, Mesulam shuti levitacunami carca. Paicunaca, ima ruranapash ucha rurarichun, ricujcunami carca. Tocanacunapi tocanata ali yachaj levita puracunapash, chaipimi carca.

13Paicunallatami, aparishpa apajcunatapash, chaipi tucui imatalla ruranacunatapash, ricuj mayordomocuna carca. Levita puramandallatami escribijcuna, mandajcuna, Diospaj huasi pungupi cuidajcuna tiarca.

14Mandaj Diospaj huasiman apamushca culquita, Hilcías shuti cura llujchijushpami, Mandaj Dios mandashcata escribichishpa Moisesman cushca librota tarirca.

15Escribichishca libro cajta yachashpami Hilcías runaca, Safán shuti escribij runaman cashna nirca: “Ñucami, Dios mandashpa escribichishca librota, Mandaj Diospaj huasipi tarircani” nircami. Shina nishpami Hilcías runaca, chai librotaca Safán shuti runaman curca.

16Safán shuti runami, jatun mandajpajman chai librota apashpa, chaitaca cashna nishpa villarca:

—Can jatun mandajta servijcunaca, paicunaman tucui mingashcataca aligutami pactachishca.

17Mandaj Diospaj huasipi tiaj culquita tandachishpaca, chai huasita alichijcunata ricungapaj mingai tucushcacunapaj maquipi, chai huasita alichijcunapaj maquipimi cushca— nircami.

18Shina nishca jipami, Safán shuti escribij runaca jatun mandajtaca:

—Hilcías shuti curami, shuj librota cuhuarca— nirca.

Shina nishpami Safán shuti runaca, chai librotaca jatun mandajpaj ñaupajpi leyirca.

19Chai mandashcapi tiajuj shimicunata uyashcandimi, jatun mandajca pai churajushcacunata liquirca.

20Chai jipami Hilcías shuti runatapash, Safán shuti runapaj churi Ahicam shuti runatapash, Micaías shuti runapaj churi Abdón shuti runatapash, Safán shuti escribij runatapash, jatun mandajta servij Asaías shuti runatapash cashna nishpa cacharca:

21—Ñucamandapash, Israel llactapi, Judá llactapi huaquin quedashcacunamandapash, cai tarishca libropi nijushca shimicuna ima cajta yachangapaj, Mandaj Diosta tapugripaichi. Mandaj Dios ninanda fiñarishcata ñucanchi jahuapi cachamushcapash manllanayaimari. Ñucanchi ñaupa taitacunami, cai libropi escribishca tiajunshnallata rurangapaca, Mandaj Diospaj Shimicunata na cazunajushca. Chaimandami, cai llaquicunataca cachamushca— nijurcami.

22Shina nijpimi Hilcías shuti runapash, jatun mandaj mandashca caishujcunapash, Dios ima nishcata villaj Hulda shuti huarmipajman rirca. Paica, curacunapaj churajunata cuidaj Salum shuti runapaj huarmimi carca. Salum shuti runaca, Ticva shuti runapaj churimi carca. Ticva shuti runaca, Harhas shuti runapaj churimi carca. Hulda shuti huarmica, Jerusalenbillatami jipa rurashca uchilla pueblopi causajurca. Chai huarmimanmi, chai villashca shimicunataca villanajurca.

23Shina villajpimi chai huarmica, cashna nishpa tigrachirca:

—Israelcunata Mandaj Taita Diosca, cashnami nin: ‘Ñucapajman cachamuj runataca, cashna nigrichi. Mandaj Diosca, cashnami nin:

24Ricui, ñucami cai llactamambash, cai llactapi causajcunapaj jahuamambash, jatun llaquita cachamugrini. Judá llactata jatun mandajpaj ñaupajpi leyishca libropi tucui llaquichinata villajunshnallatami cachamugrini.

25Ñucamanda anchurishpa, shuj dioscunaman animalcunata cushpa huañuchishcamandami, chashna llaquichigrini. Cangunapaj maquihuan chashna nalita rurashpami, ñucataca ninandapacha fiñachinguichi. Chaimandami cai llactapica, ñuca ninanda fiñashcapash talirinshna shamunga. Cangunahuanga, napacha ali tucushachu’ ninmi.

26Ashtahuangarin Mandaj Dios ñucata tapuchun cachamushca, Judá llactata jatun mandajtaca, cashna ninguichi: Israelcunata Mandaj Taita Diosca, cashnami nin: ‘Canga, chai libropi imatalla nijujtaca alimi uyarcangui.

27Cai llactatapash, cai llactapi causajcunatapash, ñuca llaquichinata villajujtami uyarcangui. Chaita uyashpami, cambaj shungupi nanarishpa, ñuca ñaupajpica urai cumurishpa pingai tucurcangui. Shina pingai tucushpami, cambaj churajushcatapash liquishpa, ñuca ñaupajpi huacarcangui. Chashna llaquirishcataca, ñucapash uyarcanimi ninmi Mandaj Diosca.

28Ricui, ñucami candaca cambaj ñaupa taitacunahuan tandachisha. Canga, ima llaquipash illaj aligutami pambai tucungui. Canga, cai llactata, cai llactapi causajcunata ñuca llaquichijtaca, na ricunguichu’ ninmi nigrichi— nijurcami.

Chai runacunaca, tucuitami jatun mandajman villanajurca.

29Chaita villajpimi jatun mandajca, Judá llactamandapash, Jerusalenmandapash mandaj rucucunataca, tucuicunata cayachun cachashpa tandachirca.

30Chai jipami jatun mandajca, Mandaj Diospaj huasiman vichai rirca. Paihuanga, Judá llactapi causaj tucui jaricunapash, Jerusalenbi causajcunapash, curacunapash, levitacunapash, tucui gentecunapashmi uchillacunamanda callarishpa, rucucunacaman rinajurca. Chaipimi, Dioshuan ari ninajushpa escribishca libropi, imatalla nijujtapash tucuicunapaj ñaupajpi leyirca. Chai librotaca, Mandaj Diospaj huasipimi tarishca carca.

31Jatun mandajca, chai pushtupi shayajushpallatami, Mandaj Diosta catingapaj, pai mandashcacunata cazungapaj, imashna causanata yachachishcacunata, escribichishca shimicunata cazungapaj, Mandaj Diospaj ñaupajpi ari nijurca. Dioshuan ari ninajushpa escribishca libropi imatalla nijushcataca tucui shunguhuan, tucui almahuan pactachingapajmi ari nijurca.

32Shinallata Jerusalenbi causajcunatapash, Benjamín llactapi causajcunatapashmi, chai mandashcacunata cazuchun ari nichirca. Shinamandami Jerusalenbi causajcunaca, Taita Dioshuan ari ninajushcapi mandashcashnallata ruranajurca. Paicunapaj ñaupa taitacunapaj Taita Dios mandashcashnallatami ruranajurca.

33Josías shuti runaca, israelcunapaj llactamandaca, tucui chai millanayaicunatami anchuchirca. Chashna rurashpami, Israel llactapi tucuilla causajcunataca, paicunata Mandaj Taita Diosta servinajuchun mandarca. Pai causajui tucui huatacunapica, paicunapaj ñaupa taitacunata Mandaj Taita Diosmandaca, na anchurishpami paitalla catinajurca.