NÚMEROS 21 - Quichua Imbabura Bible

Arad shuti pueblota jatun mandajmi, israelcunahuan macanajushca

1Neguev llactapi causanajuj cananeocunata jatun mandajca, chai llactapillata tiajuj Arad shuti pueblopimi causajurca. “Atarim shuti puebloman rina ñandami, israelcuna shamunajun” nijtami paica uyarca. Chaimandami paica, israelcunahuan macanajushpa, huaquin israelcunata prezu japirca.

2Shinamandami israelcunaca pactachishumbacha nishpa, Mandaj Diostaca cashna ninajurca: “Cai gentecunata ñucanchi maquipi churajpica, paicunapaj tucuilla pueblocunandimi tucuchishun” ninajurcami.

3Israelcuna mañanajujta Mandaj Dios uyashpami cananeocunataca, paicunapaj maquipi churarca. Shina churajpimi paicunataca, paicunapaj pueblocunandi tucuchirca. Shinamandami chai llactataca, Horma shutita shutichirca.

Bronce culebrata rurashcatami villajun

4Chai jipami israelcunaca, Hor shuti urcumandaca, Edom llactata muyugringapaj, Puca Cuchaman rina ñanda rinajurca. Paicunaca, chai ñanda rinajushpallatami, na ashtahuan ringapaj munanajurca.

5Chaimandami gentecunaca Taita Diostapash, Moisestapash fiñashpa cashna rimanajurca:

—¿Imashpata ñucanchitaca llujchimurcangui? ¿Cai jichushca pambapi huañuchunllachu, Egiptomanda vichai pushamurcangui? Caipica yacupash, micunapash na tianga. Ñucanchi shungupica cai yanga micunataca, ña amishcami canchi— ninajurcami.

6Shina nijpimi Mandaj Diosca, rupachinshna nanachij culebracunata, Israel puracunapajman cachamurca. Chai culebracuna canijpimi Israel purapica, ashtaca gentecuna huañunajurca.

7Shina tucujpimi israelcunaca, Moisespajman shamushpa cashna ninajurca:

—Ñucanchica, Mandaj Diostapash, candapash fiñashpa rimashpami, juchata rurashcanchi. Cunanga, cai culebracunata ñucanchimanda anchuchipachun, Mandaj Diosta ninanda mañapai— ninajurcami.

Shina nijpimi Moisesca, israelcunamanda Diosta mañarca.

8Shina mañajpimi Mandaj Diosca, Moisesta cashna nirca:

—Rupachinshna nanachij culebrata rurashpa, banderata huarcuna caspipi churai. Maijanda cashpapash culebrapi cani tucushpaca, chai caspipi culebrata ricushpami na huañunga— nircami.

9Shina nijpimi Moisesca, broncemanda culebrata rurashpa, banderata huarcuna caspipi churarca. Shina churajpimi, maijanda cashpapash culebra canijpica, chai bronce culebrata ricushpa na huañurca.

Israelcunami, Moab shuti llactata muyushca

10Chaimanda israelcuna rishpaca, Obot shuti pushtupi carpacunata shayachishpami tianajurca.

11Obot shuti pushtumanda rishpaca, Moab shuti llacta chimba purapi tiaj Ije-abarim shuti jichushca pambapimi, carpacunata shayachishpa tianajurca. Chai pambaca, indi llujshimuj ladomanmi.

12Ije-abarim shuti pambamanda rishpaca, Zered shuti pugru pambapimi carpacunata shayachishpa tianajurca.

13Zered shuti pugru pambamanda rishpaca, Arnón shuti jatun larca yacu chimba lado jichushca pambapimi, carpacunata shayachishpa tianajurca. Chai yacuca, amorreocunapaj llactamandami llujshimujun. Arnón shuti chai jatun larca yacumi, Moab llactahuan, amorreocunapaj llactahuan lindero.

14Shinamandami, Mandaj Diospaj jatun macanajuicunamanda escribishca libropica cashna nijun:

“Diosca, Puca Cuchapipash, Arnón shuti jatun

larca yacu manñacunapipashmi ayudarca.

15Shinallata jatun larcacuna tandanajushpa

ninanda rijuj yacu ladopipashmi ayudarca.

Chai yacuca, Ar shuti pueblocaman chayashpami,

Moab llacta linderopi samajun” nijunmi.

16Arnón shuti jatun yacumandaca, Beer shuti pushtumanmi shamunajurca. Yacuta llujchingapaj allashca jatun utujumanda villashpami Mandaj Diosca, Moisestaca cashna nirca: “Gentecunata tandachi. Paicunamanmi yacuta carasha” nircami.

17Shinamandami israelcunaca, cashna nishpa candanajurca:

“Yacuta llujchingapaj allashca pugyulla,

yacuta llujchiyari.

Diosman candaichiyari.

18Yacuta llujchina chai utujutaca, mandajcunami allanajurca.

Israelcunata mandajcunami allanajurca.

Mandashcacunata cujcunami, paicunapaj taunacunahuan

allanajurca” nishpami candanajurca.

Israelcunaca, jichushca pambamandaca, Matana shuti pushtumanmi shamunajurca.

19Matana shuti pushtumandaca, Nahaliel shuti pushtumanmi shamunajurca. Nahaliel shuti pushtumandaca, Bamot shuti pushtumanmi shamunajurca.

20Bamot shuti pushtumandaca, Moab pambacunapi tiaj pugru pambaman, jichushca pamba chimba purapi tiaj Pisga shuti urcu jahuamanmi shamunajurca.

Israelcunami, Sehón shuti jatun mandajta mishashca(Deut. 2:26-37)

21Shinamandami israelcunaca, amorreocunata jatun mandaj Sehón shuti runata cashna nichun, paicunapaj randi rimajcunata cacharca:

22“Ñucanchimi, cambaj llactata yalingapaj munapanchi. Tarpushca pambacunapipash, uvas chagracunapipash na yaicupashunllu. Yacuta llujchingapaj allashca utujumanda cambaj yacutapash, na ufiapashunllu. Cambaj llactata yalingacaman, jatun mandajpaj ñandallami yalipashun” nichunmi cacharca.

23Shina cachajpipash Sehón shuti runaca, israelcunata paipaj llactata yalichunga na saquircachu. Ashtahuangarin Sehón shuti runaca, paipaj gentecunata tucuilla tandachishpami, israelcunahuan macanajungapaj, jichushca pambaman shamurca. Paica, Jahaza shuti pueblo ladocaman shamushpami, israelcunahuan macanajurca.

24Chaipimi israelcunaca, chai jatun mandajta espadahuan huañuchishpa, paipaj llactata japinajurca. Arnón shuti yacumandaca, Amón shuti llactapi tiaj Jaboc shuti jatun yacucamanmi japinajurca. Amón shuti llacta linderopica, shinllitapacha jarcashcami carca.

25Israelcunaca, tucuilla cai pueblocunata japishpami, amorreocunapaj tucuilla pueblocunapi causanajurca. Shinallata Hesbón shuti pueblopipash, chai pueblo muyundi uchilla llactacunapipashmi causanajurca.

26Hesbón shuti puebloca, amorreocunata jatun mandaj Sehón shuti runa causajuj pueblomi carca. Paimi pundaca, Moab llactata jatun mandajhuan jatun macanajuita charishca carca. Shina macanajushpami, pai mandajushca tucui llactataca, Arnón shuti yacucaman quichushca carca.

27Chaimandami, yarichij shimicunata ali yachajcunaca, cashna ninajun:

“Hesbón shuti puebloman shamuichi.

Jatun mandaj Sehón shuti runapaj pueblotaca,

cutin alichishpa, cutin shayachipaichi.

28Hesbón shuti pueblomandaca, ninami llujshirca.

Sehón shuti runapaj pueblomandaca,

rupajuj nina llujshishpami, Moab llactapi

tiaj Ar shuti pueblota tucuchirca.

Arnón shuti yacu jahua ladocunapi

causanajuj mandajcunatapashmi huañuchirca.

29¡Aij Moab llactalla, imachari tucungui!

Quemos shuti diosta mañashpa causajcunaca,

tucurircanguichimari.

Cambaj churicunaca, pacajungapajmi calpanajurca.

Cambaj ushicunapash, amorreocunata jatun

mandaj Sehón shuti runa prezu apajpimi rinajurca.

30Ashtahuangarin paicuna mandanajuj

llactataca tucuchircanchimi.

Hesbón shuti pueblomandaca, Dibón shuti

pueblocamanmi tucurirca.

Shinallata Nofa shuti pueblocaman, Medeba shuti

pueblocamambashmi tucuchircanchi” ninajunmi.

Israelcunaca, Basán shuti llactata mandaj Og shuti runatami mishashca(Deut. 3:1-11)

31Chashnami israelcunaca, amorreocunapaj llactapi causanajurca.

32Moisesca, Jazer shuti pueblotapashmi ricugrichun cacharca. Chai pueblotapash, muyundi uchilla llactacunandi quichushpami, chaipi causanajuj amorreocunataca llujchishpa cacharca.

33Chaimanda tigrashpami, Basán shuti llactaman rina ñanda vichai rinajurca. Chaita rinajujpimi, Basán shuti llactata jatun mandaj Og shuti runaca, israelcunahuan Edrei shuti pueblo ladopi macanajungapaj paipash, paipaj gentecunandi llujshirca.

34Chaipimi Mandaj Diosca, Moisesta cashna nirca: “Ama manllaichu. Ñucami, chai jatun mandajtaca, paipaj tucuilla gentecunandi, paipaj tucuilla llactandi, cambaj maquipi churarcani. Paicunataca, amorreocunata mandashpa, Hesbón shuti pueblopi causajushca jatun mandaj Sehón shuti runata imashna rurashcashnallatami rurangui” nircami.

35Shina nijpimi israelcunaca, Og shuti jatun mandajtaca, paipaj churicunandi, tucuilla paipaj gentecunandi, shujllatapash causajta na saquishpa huañuchinajurca. Shina huañuchishpami, paicunapaj llactataca japinajurca.