MATEO 28 - Quichua Imbabura Bible

Jesús causarishcatami villajun(Mar. 16:1-8; Luc. 24:1-12; Juan 20:1-10)

1Samana punlla yalishpa cayandi, domingo tutamandaca, narapash ali punllayajpillatami, Magdala shuti pueblomanda Mariapash, shuj Mariapash, Jesusta pambashca utujuta ricungapaj shamunajurca.

2Shina shamunajujpica, ñapashmi alpa mamaca, ninanda cuyurca. Shuj angelta Jatun Dios jahua pachamanda cachamujpi chayamushpami, chai utujuta quilpashca rumitaca, shuj ladoman anchuchirca. Shina anchuchishpami, chai rumi jahuapi tiarirca.

3Chai angelca, punchapamba shitamujunshnami ricurijurca. Paipaj churajunapash, rasushna yuraj yurajgumi carca.

4Cuidanajuj soldadocunaca, chai angelta ricushpa ninanda manllarishpa chujchunajushpami, huañushcashna tucurca.

5Ashtahuangarin chai huarmicunaman tigrachishpaca, chai angelca cashnami nirca: “Cangunaca, na manllarinachu canguichi. Chacatashpa huañuchi tucushca Jesusta, canguna mascaj shamushcataca yachanimi.

6Paica na caipichu, ña causarishcami. Pai villajushcashna ricungapaj shamuichi. Apunchi Jesustaca, caipimi churashca carca.

7Cunanga, huañushcacunapaj chaupimanda causarishcata, paipaj yachajujcunaman ucha villagrichi. Ricuichi paica, Galilea llactaman cangunata ñaupashpami rijun. Chapimi paitaca ricunguichi. Ricuichi, chaitaca cangunaman ñami villani” nircami

8Shina nijpica chai huarmicunaca, manllarishpapash ninanda cushijushpami, chai utujumandaca llujshishpa, chai ali villaita villangapaj calpanajurca. Chai ali villaita Jesuspaj yachajujcunaman villangapaj calpanajujpimi,

9Jesusca ñapash tuparishpa:

—¿Alillachu capanguichi?— nirca.

Shina nijpimi chai huarmicunaca, Jesuspaj ñaupajman quimirishpa cungurishpaca, chaquipi ugllarishpa alicachinajurca.

10Shina alicachijpimi Jesusca, cashna nirca:

—Na manllarinachu canguichi. Galilea llactaman, ñuca huauquicuna ucha richun villagripaichi. Chaipimi ñucataca ricuhuanga— nircami.

Cuidaj soldadocunami villagrishca

11Chai huarmicuna rinajujpimi, chai utujuta cuidanajuj soldado puramanda huaquingunaca, Jerusalén puebloman rinajurca. Paicunapash, tucui imashna tucushcatami, curacunata mandajcunaman villanajurca.

12Shina villajpimi, mandaj rucucunahuan tandanajushpa, paipura parlarishca jipaca, ashtaca culquita chai soldadocunaman cunajurca.

13Cashna yachachishpami cunajurca:

—Cangunaca cashna ninguichi: ‘Ñucanchi puñunajujpimi, paipaj yachajujcunaca tuta shamushpa, chai huañushcataca shuhuashpa apashca’ ninguichi.

14Mandaj Pilato chashnata uyashpa, cangunata imatapash nijpica, ñucanchimi paihuanga parlapashun— ninajurcami.

15Soldadocunaca culquita japishpaca, paicuna yachachishcashnami villanajurca. Cashna villashcataca, cunan punllacamanmi Judá llactapi causanajuj purapi chashnallata ninajun.

Tucuicunaman villagrichun mingashcami(Mar. 16:14-18; Luc. 24:36-49; Juan 20:19-23)

16Ashtahuangarin paipaj chunga shuj yachajujcunaca, Jesús mandashcashnami Galilea llactapi tiaj urcuman rinajurca.

17Jesustaca, ricushpa ninandami alicachinajurca. Ashtahuangarin huaquingunaca, ishcai shungumi tucunajurca.

18Paicunapajman Jesús quimirishpaca, cashna nishpami villajurca: “Jahua pachapipash, cai pachapipash mandajuchunmi, tucui ushaita Diosca ñucaman carahuarca.

19Shina cashcamandami, ñucapaj yachajujcuna tucuchun, cai pachapi causanajuj tucuilla gentecunapajman rishpa, villana canguichi. Paicunataca Taitapaj, Churipaj, Diospaj jucha illaj Espiritupaj shutipimi bautizana canguichi.

20Canguna pactachinajuchun ñuca tucui imatalla yachachishcataca, paicunapash tucuillata pactachishpa causanajuchunmi, yachachina canguichi. Ricuichi, ñucami cai pacha tucuri punllacaman tucui punllacuna cangunahuan cani. Shina cachun” nijurcami.