1Taita Diostaca, ninanda caparishpami mañajurcani.
Taita Diostami caparijurcani, paica uyahuangami.
2Ninan llaquita apajui punllapica,
Jatun Diostami mascarcani.
Tutapash maquita vichai churashpami,
na samashpa paita mañajurcanilla.
Ñuca almaca, cushijuita na chari usharcachu.
3Taita Diosta yarishpami, ninanda llaquirircani.
Aij nijujpillatami, ñuca espiritupash shaijurca. Selah
4Taita Dioslla, ñuca ñavi
vicharichunllapash na saquihuarcanguichu.
Ninan llaquihuan cashpami, rimaitapash na usharcani.
5Callarimandapachami, punllacunataca yarijurcani.
Huatacunatapash, callari
huatacunamandapachami yarijurcani.
6Ñuca candashcacunata tuta yarijushpami,
ñuca shungupica aligutapacha yarijurcani.
Ñuca espiritupash, cashnami tapujurca:
7“¿Jatun Diosca, causaita causaicamanllu shitanga?
¿Nacha cutin ñucanchitaca ayudanga?
8¿Pai llaquinaca, causaita causaicamanllu tucurishca?
Pai imata rurasha nishcapash, ¿tucui
causaipajchu tucurishca?
9Taita Diosca, ¿llaquinataca cungashcachu?
¿Pai ninanda fiñashcahuanllu, llaquishpa
ayudanacunataca vichashca?” nishpami tapujurcani. Selah
10Cashnami yajurcani: “Caica ñuca nanaimi.
Shina cashcamandami, jahua pachapi causajuj
Diospaj ali lado maquihuan alicunata
rurashca huatacunata yarijusha” yajurcanimi.
11Mandaj Dios rurashcacunatami yarijusha.
Ari, ñaupa huatacuna juyaillacunata can
rurashcatami yariajusha.
12Tucui can rurashcacunatami, aligutapacha yarijusha.
Can rurashcacunataca villajushallami.
13Taita Dioslla, cambaj ñanga
jucha illaj ñangumi.
Ñucanchi Taita Dioshuan chimbapurangapaca,
¿maijan diospash jatun tianllu?
14Can Taita Diosmi, juyaillacunata ruraj cangui.
Gente puracunapimi, cambaj ushaitaca ricuchircangui.
15Cambaj rigrahuanmi, can
agllashcacunataca quishpichimurcangui.
Paicunaca Jacobopaj, Josepaj miraicunami. Selah
16Taita Dioslla, yacucunaca candami ricunajurca.
Yacucuna canda ricushpaca, manllarinajurcami.
Manllanayai ucu ucu yacucunapashmi chujchunajurca.
17Fuyupash, yacu jundajtami tamiachimurca.
Jahua pachapi culun nishpami, cambaj
rayocunapash caiman chaiman punchayachirca.
18Can culun nichishcapash, jatun
acapana huairapimi uyarirca.
Cambaj punchapamba shitamushcapash, tucui
cai pachatami punchayachirca.
Alpapash chujchushpami, ninanda cuyurirca.
19Mama cuchatami, cambaj ñan carca.
Ashtaca yacu chaupitami, cambaj chaqui ñan carca.
Cambaj chaqui sarushcatapash,
pipash na rijsircachu.
20Cambaj agllashcacunataca llamagucunatashnami,
Moiseshuan, Aaronhuan pushamurcangui.
Who We AreWhat We EelieveWhat We Do
2025 by iamachristian.org,Inc All rights reserved.
