Psalms 95 - Quichua Imbabura Bible

Alicachishpa candanapash, ninanda alicachishpa mañanapashmi

1Mandaj Diostaca, cushijuihuan

caparishpa candaj shamuichi.

Ñucanchi quishpirina jatun Rumishna Diostaca,

ninan cushijuihuan candashunchi.

2Paipaj ñaupajman chayashpa alicachishunchi.

Juyailla candanacunahuan caparishpa candashunchi.

3Mandaj Taita Diosca jatun Diosmi,

tucui dioscunatapash yali Jatun Mandajmi.

4Alpa ucucunapash, paipaj maquipimi.

Jatun urcucunapash paipajmi.

5Mama cuchapash, pai rurashcamandaca paipajmi.

Chaquishca alpatapash, paipaj maquihuanmi rurarca.

6Shamuichi, paipaj ñaupajpi urai

cumurishpa, ninanda alicachishunchi.

Ñucanchita ruraj, Mandaj Diospaj

ñaupajpi cungurishunchi.

7Paimi, ñucanchi Taita Dios.

Ñucanchica, pai michina pambacunapi

causaj gentecunami canchi.

Paipaj maquihuan cuidajpi causaj

llamagucunashnami canchi.

Cunan, pai rimashcata uyashpaca,

8Meriba shuti pambapishnallataca,

na shinlli shungu tucunachu canguichi.

Masah shuti jichushca pambapi purinajushca

punllapishnallataca, na tucunachu canguichi.

9Chaipimi, cangunapaj ñaupa taitacunaca, paicuna

munashcata rurachun mañashpa fiñachihuarca.

Shinallata imata rurajta ricungapaj munashpami,

ñuca imata rurashcacunatapash ricunajurca.

10Chaimandami chuscu chunga huatacunata,

paicunahuanga fiñarishca carcani.

Shinamandami paicunataca, cashna nircani:

“Cai gentecunaca, paicunapaj shungupi

pandarishpami anchurinajun.

Ñuca mandashcacunatapash, na rijsinllu” nircanimi.

11Chaimandami ninanda fiñarishpa,

cashna nishpa juramenturcani:

“Ñuca samachina llactapica,

napacha yaicungachu” nircanimi.