DEUTERONOMIO 26 - Quichua Imbabura Bible

Punda fucushcacunatapash, chungamanda shujguta cunatapash cuchunmi mandashca

1Canda Mandaj Taita Dios carashca llactaman chayashpa, chai llactata japishpaca, chai llactapimi causangui.

2Chaipi causajushpaca, canda Mandaj Taita Dios carashca alpapi punda fucushca tucui granocunamanda cozechashcata shicanyachingui. Chaitaca, canda Mandaj Taita Dios paipaj shuti chaipi causachun pai agllashca pushtuman, shuj canastapi churashpa apangui.

3Chaiman chayashpaca, chai punllacuna Diosta servijuj curapaj ñaupajman rishpa, cashna ningui: ‘Cai llactata carashami nishpa ñucanchi ñaupa taitacunaman Mandaj Dios juramentushca llactaman chayamushcataca, cunanga canda Mandaj Taita Diosmanmi villani’ ningui.

4Chai canastata cambaj maquimanda cura japishpami, canda Mandaj Taita Diospaj altar ñaupajpi churanga.

5Shina churajpimi, canda Mandaj Taita Diospaj ñaupajpi, cashna nishpa villangui: ‘Ñuca ñaupa taitaca, llaqui japijpi huañunalla causaj arameo runami carca. Paica, Egiptoman urai rishpami, huaquin gentecunandi chaipi causajurca. Chaipi mirashpami, shuj jatun llacta tucurca. Paicunaca, ninan shinlli, ninan ashtaca ashtaca gentecunami tucurca.

6Egiptopi causajcunaca imapash cachun macashpami, ñucanchitaca ninandapacha llaquichinajurca. Shina rurashpami, ñucanchitaca shinllitapacha servichishpa charirca.

7Chaimandami, ñucanchi taitacunata Mandaj Taita Diostaca caparishpa mañarcanchi. Shina mañajpimi Mandaj Diosca, ñucanchita ayudarca. Shinallata ñucanchi llaquitapash, shinlli ruranacunata ruranajujtapash, ñucanchita imashna llaquichishpa charijtapash ricurcami.

8Chaimandami Mandaj Diosca, ninan ushaita charij paipaj maquihuan Egiptomanda llujchimurca. Paica, paipaj rigrata chutashpa, ninan manllarinacunata cachamushpa, imatapash juyaillacunata rurashpa, pipash na rurai ushanallacunata rurashpami llujchimurca.

9Chaimanda llujchishpa caiman pushamushpami lechepash, balun mishquipash ashtacapacha tiaj cai llactata ñucanchiman cararca.

10Mandaj Dioslla, chaimandami cunanga can carashca cai alpapi punda fucushca granocunata, canman cungapaj apamupani’ ningui. Shina nishpaca, can apashca canastataca, canda Mandaj Taita Diospaj ñaupajpi churangui. Shina churashpaca, canda Mandaj Taita Diospaj ñaupajpi ninanda alicachingui.

11Shina rurashpami canmambash, cambaj huasi ucu puramambash, canda Mandaj Taita Dios alicunata carashcamanda cushijungui. Shinami cambash, levita runapash, shuj llactamanda shamushca canguna purapi causaj runapash cushijunguichi.

12Cambaj chagrapi fucushcamandaca, chungamanda shujguta cuna huatapica, cada quimsa huatapimi, chungamanda shujguta cuna cangui. Shina cushca jipami levitamambash, shuj llactamanda shamushca runamambash, taita mama illaj huahuagumambash, sapalla mamagumambash carana cangui. Shina carajpimi, can causajuj uchilla llactacunapica, na ushangacaman micunajunga.

13Chai jipaca, canda Mandaj Taita Diospaj ñaupajpi, cashna ningui: ‘Canman cungapaj shicanyachishcamandaca, ñami ñuca huasimanda llujchishpa apamuni. Chaitaca, can Dios mandashcashnallatami levitamambash, shuj llactamanda shamushca runamambash, taita mama illaj huahuagumambash, sapalla mamagumambash cararcani. Shina rurachun can mandashcataca, cungaitapash na cungashpami, tucuita pactachircani.

14Chaicunataca, huañui tiajpi llaquilla cashpapash, imamanda mapayashca cashpapash na micurcanichu. Chaicunataca, huañushcacunamambash na cararcanichu. Ñucata Mandaj Taita Dios imatalla nishca shimicunata cazushpami, can Dios tucuita mandashcashnallata pactachircani.

15Jahua pachapi can causajuj, jucha illaj cambaj huasimanda ricushpa, can agllashca israelcunatapash bendiciapangui. Lechapash, balun mishquipash ashtacapacha tiaj llactata carashami nishpa, ñucanchi ñaupa taitacunaman juramentushcashnallata ñucanchiman carashca cai llactatapash bendiciapangui’ ningui.

16Canda Mandaj Taita Diosca, cunanga pactachinajuchun cushca shimicunata, imata rurachun mandashcacunata pactachijuchunmi, candaca mandajun. Chaicunataca tucui shunguhuan, tucui almahuan pactachingui.

17Canllatami, tucuicunapaj ñaupajpi cashna nircangui: ‘Cunanga Mandaj Diosca, ñuca Taita Diosmi. Pai yachachishcatami cazushpa causasha. Shinallata pactachinajuchun pai cushca shimicunata, imata rurachun mandashcacunatapash cazushpami causasha. Pai rimashca shimicunatapash uyashami’ nircanguimi.

18Cunanmi Mandaj Diosca, cangunataca: ‘Ñucapajlla agllashca gentecunami canguichi’ nishca. Pai imashna nishcashnallatami, paipajlla cachun agllashcacuna canguichi. Tucui pai mandashcacunata pactachinajuchunmi, chashna agllashca.

19Paica, cangunataca paillata rurashca tucui shuj llactacunata yali jatumbi churangapajmi agllashca. Shinallata tucuicuna rijsishca cachun, alicachi tucushca juyailla llacta cachunmi, chashna agllashca. Cangunata Mandaj Taita Diospajlla causaj gentecuna cachunmi, imashna pai nishcashnallata agllashca” nijurcami.