ISAÍAS 29 - Quichua Imbabura Bible

Ariel nishca Jerusalendaca fiñajcunami llaquichinga

1Ariel nishca pueblolla, Ariel nishca pueblolla, ¡aij imachari tucungui! Chaipica, Davidmi causajurca. Huatapi huatapi cati cati jatun micuicunata rurashpa, chashna huata pactaichilla.

2Ashtahuangarin Ariel nishca pueblotaca, musparina llaquipimi churasha. Shinamandami, pipash na cushichijpi llaquilla canga. Chai puebloca ñucapaca, Ariel nishcashnami tucunga.

3Ñucami, cangunapaj muyundipica, carpacunata shayachishpa chapasha. Ashtaca soldadocunahuanmi, muyundi chapasha. Baluarte nishcacunatapashmi shayachisha.

4Chashna rurajpimi, pingai tucushpa alpapi urmashpa parlajungui. Can rimashcapash, ñutu alpamandami uyaringa. Alpa ucumanda, alma rimashca uyarijunshnami, ñutu alpamandaca chingajlla uyaringa.

5Canda fiñaj ashtaca runacunaca, ñutu alpashnami tucunga. Ninan shinlli ashtaca runacunapash huairapi yalinshnami canga. Napash yashca cungashcapimi, ñapash chashna tucunga.

6Tucuita Mandaj Diosmi, ninanda culun nishpa ricuj shamunga. Ninanda alpa mama chujchushpa, manllanayaita culun nishpa, ninanda rundushpa tamiajuj huairahuan, tucuchij rupajuj ninahuanmi ricuj shamunga.

7Ariel nishca pueblopi causajcunahuan macanajujcunaca, tucui llactacunami tuta puñushpa muscuipi ricurinshna chinganga. Cai pueblopi causajcunahuan macanajushpa, jatun torretapash urmachishpa, muspachij runaca chashnami chinganga.

8Cashnapashmi tucunga: Yarjachijuj runaca micujushpa muscushpaca, micujunimi yanmi. Ashtahuangarin rijcharishpaca, yarjaillatami rijcharin. Yacunayachijuj runapash yacuta ufiajushpa muscushpaca, yacuta ufianimi yanmi. Ashtahuangarin rijcharishpaca, shaijushca yacunayaihuanllatami rijcharin. Sion shuti urcupi causajcunahuan macanajungapaj, tucui llactacunamanda shamuj ashtaca soldadocunaca, chashnami canga.

Israelcunaca, ñausashna tucushpami yanga nij tucushpalla purinajushca

9Cangunaca shayarishpa manllarichiyari. Yuyai illanshna musparishpa, ñausashna caichiyari. Vinota, sidrata na ufiashca cashpapash, machashcashna caiman chaiman urmanajuichiyari.

10Mandaj Diosmi, puñuchij espirituta cangunaman cachamurca. Shina cachamushpami, cangunaman villajcunapaj ñavitaca vicharca. Imatalla ricushcata cangunaman villajcunapaj umatapash, telahuanmi quilparca.

11Muscuipishnalla tucuita ricushcapash, escribishca librota pillushpa sellashcashnami canga. Chashna sellashcata maijambash leyinata yachajman: “Caita leyishpa uyachi” nijpica: “Sellashcamari, na leyi ushanica” ninmanmi.

12Na cashpaca, na leyinata yachajman librota cushpa: “Caita leyishpa uyachi” nijpica: “Na leyinata yachanichu” ninmanmi.

13Chaimandami Jatun Diosca, cashna nin: “Cai gentecunaca, shimihuanllami ñucataca mañanajun. Shimi jahuallami ñucataca alicachinajun. Ashtahuangarin paicunapaj shunguca, ñucamandaca carupimi. Ñucata manllanatapash runacuna mandashpa yachachijpillami ruranajun.

14Shina cashcamanda ricuichi, cutin jatun manllarinayaicunata rurashpa ricuchishpami, cai gentecunapaj yuyaita rijchachishpa yarichisha. Ali yachajushcacunapaj ima yachajushcapash chingangami. Ali yuyaita charijcunapaj chai ali yuyaipash, yangami tucunga” ninmi.

15Nalita yarinajushcata, Mandaj Diosmanda pacalla rurajcunaca, ¡aij imachari tucunga! Paicunaca, imata rurashpapash yana yana tutapi rurashpami: “Ñucanchitaca pipash na ricunllu, pipash na yachanllu” ninajun.

16Canguna yachashca jahua na cazushcacunaca, mangata rurana turushnami, tucuicuna rijsishca tucunga. ¿Ña rurashca tiajuj mangaca, paita ruraj runataca: “¿Canllu ñucataca rurarcangui?” nishpa tapunllu? ¿Manga rurarijuj alpapash, mangata rurajuj runataca: “Imata rurajushcatapash na yachanguichu” ninllu?

Israelcunataca llaquimanda quishpichingami

17Cunanmanda asha huatacuna jipaca, Líbano quirucuna tiaj pambapica, ali fucuj alpacunami tucunga. Ali fucuj alpacunaca, sachami tucunga. ¿Chaitaca nachu yachanguichi?

18Chai huatacunapica, rinri na uyajcunapash libropi escribishcata leyijtaca uyanajungami. Ñausacunapaj ñavica, tutayashca cajpipash, yana yana tuta cajpipash ricungallami.

19Shinamandami na jariyaj shunguta charijcunaca, Mandaj Diospi ashtahuan cushijunga. Tucui runacunata ashtahuan yali imagutapash na charijcunapashmi, israelcunapaj jucha illaj Diospi ninanda cushijunajunga.

20Ñapash fiñarij runaca, tucuchi tucungami. Na cazushpa asijpash, chingachi tucungami. Nalita rurangapajlla puñuitapash na puñujcunaca, tucuillami tucuringa.

21Nalita rimachishpa, shujcunata juchata rurachijcunapash, pueblo pungupi cangunatara rimajman japichingapaj lazuta churajcunapash, imatapash cashcatapacha ruraj runata yangamanda juchachishpa llaquipi churajcunapash, tucuchi tucungami.

22Chaimandami, Abrahamda quishpichij Mandaj Diosca, Jacobopaj miraicunataca cashna nin: “Cunanga, Jacoboca na ashtahuan pingai tucushpa, ñavipash quillu quillu tucungachu.

23Paipaj miraicunaca, paicunapaj chaupipi ima alitapash ñuca rurashcata ricushpami, ñuca shutitaca jucha illaj shutimi ninajunga. Jacobopaj jucha illaj Dios ñucatami, jucha illajmi cangui ninajunga. Israelpaj Taita Dios ñucatami, manllashpa causanajunga.

24Panda yuyaita charijcunapash, ali yuyaita japinajungami. Nalicachishpalla parlajcunapash, yachachijpi yachajungami” ninmi.