JOB 22 - Quichua Imbabura Bible

Elifaz shuti runaca, Jobtaca jatun nalitami rurashcangui nishpami juchachishca

1Temanita nishca Elifaz shuti runaca, cashna nishpami tigrachirca:

2“¿Runaca, Taita Diosman ima alitapash apamungachu? Na chashnachu, ashtahuangarin alipacha yachajushca cashpapash, paipajllatami ali canga.

3¿Can imatapash cashcatapacha ruraj cashcamandachu, Tucui Ushaita Charij Diosca cushijunga? Na cashpaca, can ¿ima pandatapash na ruraj cashcamandachu, ima alitapash japinga?

4¿Chaimandachu candaca llaquichijun? ¿Na cashpaca, can paita manllaj cajpichu, imata rurashcatapash canhuan randimanda ricungapaj shamun?

5Can nalicunata rurashcacunaca, jatun nalipachami. Can nalita rurashcacunaca, na tucuringachu.

6Cambaj huauquicunataca, yangamandami prendata quichurcangui. Churajunata na charijcunapaj churajunatapashmi quichurcangui.

7Shaijushca runa yacuta ufiachumbash na cararcanguichu. Yarjachij runamambash, micunata na cararcanguichu.

8Ashtahuangarin ninan ushaita charij runallami, alpataca japirca. Alicachi tucushca runaca, chaipimi causajurca.

9Sapalla mamagucunatapash, chushaj maquitami tigrachircangui. Taita mama illaj huahuacunatapash, rigrata faquinshnami irquiyachircangui.

10Shinamandami cambaj muyundipica, lazucuna tiajun. Chaicunami, cungashcapi ñapash tucuchishpa manllachin.

11Na cashpaca, can ama ricuchunga, yana yana tutami quilpanga. Ashtacapacha yacumi, candaca quilpajun.

12Taita Diosca, ¿nachu jahua pacha jahuaman tiajun? Ricui, paita quilpaj luzerocunapash jahua jahuapimi tianajun.

13Chaita ricushpami, canga cashna ningui: ‘Taita Diosca, ¿imata yachangayari? Yana tutapica, ¿imashnata ricushpa llaquichingayari?

14Fuyu muyundi quilpashcapica, na ricungachu. Jahua pacha muyunditallami purijun’ ninguimi.

15¿Jatun nalita ruraj runacuna purishca, punda ñandallatachu cambash catingapaj munangui?

16Paicunaca, nara punlla pactajpillatami huañunajurca. Callaripi churashca rumicunandi, jatun yacu apashcashnami tucunajurca.

17Paicunaca, Taita Diostaca: ‘Ñucanchimanda anchuri’ ninajurcami. Tucui Ushaita Charij Diosca, ¿paicunataca imatashi rurarca?

18Paicunapaj huasicunapimi, ashtaca charishcacunata jundachishca carca. Ashtahuangarin amalla ñucapash, paicunashna yarijusha.

19Imatapash cashcatapacha rurajcuna ricushpaca, cushijungami. Ima nalitapash na ruraj runaca, asishpami cashna nijunga:

20‘Ñucanchita fiñajcunaca, tucuchi tucushcamari. Paicuna imatalla charishcacuna puchushcatapash, ninami rupachishpa tucuchishca’ nijungami.

21Cunanga, paihuan ali tucuyari. Shina rurashpami, casilla ali causaita charingui. Paimandallatami, ima alipash cambajman shamunga.

22Cunanga, paipaj shimihuan mandashcata chasquiyari. Paipaj shimicunataca, cambaj shungupi alichiyari.

23Tucui Ushaita Charij Diospajman tigrarishpaca, cutinmi shayachi tucungui. Cambaj carpamandapash, tucui llaquitami anchuchingui.

24Canga orotaca, alpatapash yalimi charingui. Ofir shuti llactamanda orotapash, yacu huaicu rumicunatashnami charigringui.

25Tucuita Rurai Ushaj Diosmi, canmandaca shayaringa. Culquitapash, ashtacatami charingui.

26Shina charishpami, Tucui Ushaita Charij Dioshuan cushijungui. Taita Diostaca, cambaj ñavihuambachami vichai ricungui.

27Can paita mañajpica, paica uyangallami. Cambash, paiman imatalla carashapachami nishcataca pactachinguimi.

28Can imata ruranata yarishcapash, chashnapachami llujshinga. Can purina ñangunapipash, michami punchayachinga.

29Maijan pingaichi tucushca cajpipash: ‘Canga, jatunyachi tucunguimi’ ninguimi. Na jariyajcunataca, Taita Diosmi quishpichinga.

30Ima nalitapash na ruraj runataca, paimi quishpichinga. Cambaj maquihuan imatapash na rurajpimi, paica ima llaquimandapash cacharichinga” nijurcami.