JOSUÉ 12 - Quichua Imbabura Bible

Moisés mishashca jatun mandajcunatami villajun

1Israelcunaca, Jordán yacu chimbamandaca, indi llujshimuj ladocamanmi llactacunata japinajurca. Arnón shuti jatun larca yacumanda callarishpa, Hermón shuti urcucaman, shinallata indi llujshimuj ladoman tiaj Arabá shuti tucui pambacamanmi japinajurca. Cai llactacunata jatun mandajcunatami, israelcunaca misharca:

2Amorreocunata jatun mandaj Sehón shuti runaca, Hesbón shuti pueblopimi causajurca. Paica, Arnón shuti jatun larca yacu manñapi tiaj Aroer shuti pueblomanda callarishpaca, pugru pamba chaupicaman, Galaad llacta chaupicaman, shinallata Jaboc shuti jatun larca yacu ladocamanmi mandajurca. Chai yacuca, Amón shuti llactapaj linderomi.

3Indi llujshimuj ladoman, Arabá shuti pambataca, Cineret shuti mama cucha ladocamanmi mandajurca. Shinallata indi llujshimuj ladomanllata, Cachi tiaj Arabá shuti mama cucha ladocamambashmi mandajurca. Bet-jesimot shuti puebloman rina ñangunamambash, urai ladomandaca, Pisga shuti loma chaqui vichaicamambashmi mandajurca.

4Basán shuti llactata jatun mandaj Og shuti runaca, refaíta nishca puramanda puchushcami carca. Paica, Astarot shuti, Edrei shuti pueblocunapimi causajurca.

5Paica, cai llactacunatami mandajurca: Hermón shuti urcupi tiaj llactatapash, Salca shuti llactatapash, Basán shuti tucuilla llactatapash, Gesur shuti llactahuan, Maaca shuti llactahuan lindero ladocamanmi mandajurca. Shinallata chaupi Galaad llactatapash, Hesbón shuti pueblota jatun mandaj Sehón shuti runa mandajuj llacta linderocamanmi mandajurca.

6Chai jatun mandajcunatami, Mandaj Diosta servij Moisespash, israelcunapash misharca. Shina mishashpami, chai llactacunataca, Mandaj Diosta servij Moisesca, Rubenbaj, Gadpaj aillucunamambash, Manasespaj chaupi aillumambash curca.

Josué mishashca jatun mandajcunatami villajun

7Josuehuan israelcunahuanga, Jordán yacu cai ladomandaca, indi huashajuj ladoman tiajuj llactacunatami misharca. Paicunaca, cai jatun mandajcunatami misharca: Líbano shuti pambapi tiajuj Baal-gad shuti llactamanda, Seir shuti urcuman vichai rina Halac shuti urcucamanmi misharca. Josueca, chai llactacunataca Israel aillucunamanmi, mashnapura cashcashnallata paicunapaj alpacuna cachun, chaupishpa curca.

8Shina cujpimi urcucunapi, pugru pambacunapi, Arabá shuti pambapi, urcu vichaicunapi, jichushca pambapi, Neguev pambapi alpacunata japinajurca. Chai llactacunapica heteo, amorreo, cananeo, ferezeo, heveo, jebuseo nishca gentecunami causanajushca carca.

9Cai jatun mandajcunatami, huañuchinajurca: Jericó pueblota jatun mandajta, Bet-el shuti pueblo ladollapi tiaj Hai shuti pueblota jatun mandajta,

10Jerusalén pueblota jatun mandajta, Hebrón shuti pueblota jatun mandajta,

11Jarmut shuti pueblota jatun mandajta, Laquis shuti pueblota jatun mandajta,

12Eglón shuti pueblota jatun mandajta, Gezer shuti pueblota jatun mandajta,

13Debir shuti pueblota jatun mandajta, Geder shuti pueblota jatun mandajta,

14Horma shuti pueblota jatun mandajta, Arad shuti pueblota jatun mandajta,

15Libna shuti pueblota jatun mandajta, Adulam shuti pueblota jatun mandajta,

16Maceda shuti pueblota jatun mandajta, Bet-el shuti pueblota jatun mandajta,

17Tapúa shuti pueblota jatun mandajta, Hefer shuti pueblota jatun mandajta,

18Afec shuti pueblota jatun mandajta, Sarón shuti pueblota jatun mandajta,

19Madón shuti pueblota jatun mandajta, Hazor shuti pueblota jatun mandajta,

20Simron-merón shuti pueblota jatun mandajta, Acsaf shuti pueblota jatun mandajta,

21Taanac shuti pueblota jatun mandajta, Meguido shuti pueblota jatun mandajta,

22Cedes shuti pueblota jatun mandajta, Carmelo shuti urcu ladopi tiaj Jocneam pueblota jatun mandajta,

23Dor shuti llactapi tiaj Dor shuti pueblota jatun mandajta, Gilgal shuti pueblopi tiaj Goim pueblota jatun mandajta,

24Tirsa shuti pueblota jatun mandajtami huañuchinajurca. Tucuimandaca, quimsa chunga shuj jatun mandajcunatami huañuchirca.