1Canguna purapi tiaj mandaj rucucunatami, cunanga yarichipani: Ñucapash, paicunashnallata mandaj rucumi cani. Llaquicunata Cristo apajujtaca, ñucapacha ricushca cashpami villajuni. Pai punchapambagu ricurimui punllapica cangunapash, ñucapashmi punchapambagu ricurishun.
2Canguna purapi Taita Diospaj tandanajushca llamagucunataca ricuriashpa michipaichi. Na pipash mandajpillatami, cangunapaj munaillata ricuriana canguichi. Imatapash culquimandalla nalitaca na rurashpami, ashtahuangarin cushijushpa, uchalla rurana canguichi.
3Aliguta ricuchun cangunaman mingashca, tandanajushca llamagucunataca, na yapata mandanachu canguichi. Ashtahuangarin cangunata ricushpa catichunmi, aliguta causana canguichi.
4Shina causashpaca, michijcunata jatun Michij shamujpimi, na tucurinalla juyailla coronata japinguichi.
5Shinallata chairalla viñaicunapash, chai rucucunataca aliguta cazunami canguichi. Tucuicunallata na jariyashpami, caishuj chaishuj cazurina canguichi.
“Taita Diosca, jariyashpa jatun tucujcunahuanga,
shinllitapachami macanajujun.
Ashtahuangarin na jariyashpa causajcunataca, ninandami juyajun” nijunmi.
6Shinamandami, ninan ushaita charij Taita Diospaj maqui ucupi na jariyashpa causana canguichi. Shina causajpimi, pai cushichina punlla chayajpi cangunataca jatumbi churanga.
7Diosmi cangunataca cuidajun. Shina cajpimi ima llaqui japijpipash, paiman mingashpa saquina canguichi.
8Cangunata fiñaj diabloca, león huacashpa, pitapash micungapaj mascajunshnami muyuriajun. Shina cajpimi rijchariashpa, aligutapacha yarishpa causana canguichi.
9Canguna crishcahuanmi, chai diablotaca mishana canguichi. Tucui cai pachapi causanajuj crijcunapash, cangunashnallata llaquicunata apanajujta yachashpami, chashna mishana canguichi.
10Ashtahuangarin ninan juyaita charij Taita Diosca, Jesucristohuan shujlla tucujpimi ñucanchitaca, paipaj punchapamba llactapi causaita causagrichun agllarca. Caipica, ashacamanllami llaquita apanajunguichi. Chai jipami Taita Diosca, cangunataca ima pandatapash ama rurachun shinlliyachishpa, ninan ushaitapash carashpa, pipash na anchuchinallapi churanga.
11Paica, causaita causaicaman punchapambagumi. Paica, mandana ushaitapashmi charin. Shina cachun.
Aliguta causapaichi nishpami tucuchishca12Silvano shuti alipacha crij huauquimanmi, cai asha escribishcapica, cangunata shinlli tacurishpa cachamuni. Ninanda juyashpa Taita Dios caramujujta canguna chasquinajujca, napacha llulla cajtapash villashpami, escribishpa cachamuni.
13Babilonia pueblopi tandanajuj, cangunatashnalla Dios agllashca crijcunapash, ñuca huahuashna causajuj Marcospashmi cangunataca, alillachu capanguichi nijun.
14Caishuj chaishuj ninanda juyarishpa muchashpami, alillachu capangui nina canguichi. Jesucristohuan shujlla tucushcamandaca, tucuilla cangunapi casilla ali causaigu tiachun ninimi. Shina cachun
Who We AreWhat We EelieveWhat We Do
2025 by iamachristian.org,Inc All rights reserved.
