GÉNESIS 38 - Quichua Imbabura Bible

1Chai huatacunami cashna tucurca: Judá shuti runaca, paipaj huauquicunamanda anchurishpami, Adulam shuti pueblopi causajuj Hira shuti runapajpi causagrirca.

2Chaipimi Judá runaca, cananeopura Súa shuti runapaj ushita rijsirca. Chai huarmitaca, paipaj huarmi cachun japishpami, chai huarmipi chayarca.

3Chai huarmi vijsayu tucushpami, shuj jari huahuaguta ungurca. Chai huahuagutaca, Er shutitami shutichirca.

4Cutin vijsayu tucushpaca, shuj jari huahuagutallatami ungurca. Chai huahuagutaca, Onán shutitami shutichirca.

5Cutin vijsayu tucushpapash, shuj jari huahuagutallatami ungurca. Chai huahuagutaca, Sela shutitami shutichirca. Huahuata unguna punllapica, Quezib shuti pueblopimi carca.

6Chai jipami Judá runaca, Er shuti paipaj punda churiman huarmita japirca. Chai huarmica, Tamar shutimi carca.

7Judá runapaj punda churi Er shuti runaca, Mandaj Diospaj ñaupajpica, nali runami carca. Chaimandami Mandaj Diosca, causaita quichurca.

8Chai jipami Judá runaca, Onán shuti runataca cashna nirca: —Cambaj huauquipaj huarmipi chayashpa, paihuan cazarailla. Shina cazarashpaca, cambaj huauquipaj miraicuna tiachun mirachilla— nircami.

9Onán shuti runaca, chai miraicunaca, na paipaj canata yachashpami, cashna rurajurca: Paica, paipaj huauquipaj huarmipi chayashpapash, paipaj huauquipaj miraicuna ama tiachunmi, alpapilla shutuchijurca.

10Chashna nalita rurajushcacunaca, Mandaj Diospaj ñaupajpica nalipachami ricurirca. Chaimandami, paitapash causaita quichurca.

11Judá runaca, paipaj jachun Tamartaca cashnami nirca: —Ñuca churi Sela viñangacaman, cambaj taitapaj huasipi sapalla causajuilla— nircami. “Sela shuti runapash, paipaj huauquicunashnallata huañuipajpash” yashpami, chashna nirca. Shina nijpimi Tamarca, paipaj taitapaj huasiman rishpa chaipi causajurca.

12Tauca punllacuna yalishca jipaca, Súa shuti runapaj ushi, Judá runapaj huarmipashmi huañurca. Shina huañujpi llaquilla cashca jipa, cutin cushilla tucushpami Judá runaca, paipaj llamacunata rutujcunapajman Timnat shuti puebloman vichai rijurca. Paica, Adulam shuti pueblomanda Hira shuti paipaj cumba runahuanmi rijurca.

13Chaitami, Tamarman cashna nishpa villanajurca: “Ricui, cambaj suedroca, paipaj llamacunata rutuchingapajmi, Timnat shuti puebloman vichai rijun” ninajurcami.

14Chaimandami paica, sapalla huarmi cashpa churajushca churajunacunata anchuchirca. Shina anchuchishpaca, umata quilparina telahuan quilparishpa, baitahuan ali pillurishpami, Enaim shuti puebloman yaicuna pungu ladopi, Timnat shuti puebloman rina ñan ladopi tiarirca. Sela shuti huambratapash, ña viñashcata ricushpa, paipaj suedropash chai huambrahuan na cazarachishcamandami, chashna rurajurca.

15Tamar huarmi avita quilparishcata Judá runa ricushpami, culquimanda huainayaj huarmimi yajurca.

16Judá runaca, chai ñanmanda anchurishpa, chai huarmipajman rishpami: —Cambi cunan ñuca chayangapaj saquihuailla— nijurca. Paipaj jachun cajtaca na yachashpami, chashna nijurca. Shina nijpimi, chai huarmica: —¿Ñucapi chayashpaca, imatashi cuhuangui?— nirca.

17Shina nijpimi Judá runaca, cashna nishpa tigrachirca: —Ñuca animalcunamandaca, huarmi chivopaj shuj huahua chivotami canman cachamusha— nircami. Shina nijpimi, chai huarmica: —Can chaita cachamungacaman, imatapash ñucaman saquihuayari— nirca.

18Shina nijpimi, Judá runaca: —¿Imatata saquichun munangui?— nirca. Shina nijpimi chai huarmica, cashna nishpa tigrachirca: —Cambaj sellota, racuta caupushca cambaj puchata, cambaj maquipi charijuj tauna caspita cuhuayari— nircami. Shina nijpimi Judá runaca, chaicunata cushpa chai huarmipi chayajpi chai huarmica, paipajta vijsayu tucurca.

19Chai jipaca, jatarishpa rircallami. Shina rishpami, umata quilparina telahuan quilparishcata anchuchishpa, sapalla huarmi cashpa churajuna, paipaj churajunacunatallata cutin churajurca.

20Judá runaca, huarmi chivocunapaj huahua chivotami, Adulam shuti pueblomanda paipaj cumbahuan cacharca. Chai huarmiman saquishcacunata cutin japimuchunmi, shina cacharca. Ashtahuangarin chai huarmitaca, na tuparircachu.

21Chaimandami, Enaim shuti pueblopi causaj runacunataca, cashna nishpa tapujurca: —Enaim pueblo ladolla ñambi tiaj, ¿culquimanda huainayaj huarmica maipita?— nijurcami. Shina tapujpimi paicunaca, cashna ninajurca: —Caipica, culquimanda huainayaj maijan huarmipash na tiashcachu— ninajurcami.

22Shina nijpimi chai runaca, Judá runapajman tigrashpa cashna nirca: —Chai huarmitaca, na tuparinichu. Chai pueblopi causaj runacunapash: ‘Caipica, culquimanda huainayaj huarmica na tiashcachu’ nihuarcami— nircami.

23Shina nijpimi Judá runaca, cashna nirca: —Ñucanchita pipash ama yangapi churashpa ricuchunga, chaicunataca can japilla. Ricui, cai huahua chivota cuchun cachajpipash, canga na tuparishcanguichu— nircami.

24Ña quimsa quillashna tucujpimi, cashna tucurca: Judá runamanmi, cashna nishpa villanajurca: —Cambaj jachun Tamarca, huainayashpami causajushca. Shinamandami cunanga, vijsayupacha purijun— ninajurcami. Shina nijpimi, Judá runaca: —Paitaca, llujchishpami rupachina canguichi— nirca.

25Ashtahuangarin paita ña llujchinajujpimi chai huarmica, paipaj suedroman cashna nishpa villachun cacharca: “Caicunapaj dueño runapajtami, vijsayu cani. Cunanga sellotapash, racuta caupushca puchatapash, tauna caspitapash ricui. ¿Caicunaca pipajta?” nishpami cacharca.

26Shina cachajpimi Judá runaca, chaicunata rijsishpa cashna nirca: “Paica, ñucatapash ashtahuan yali imatapash cashcatapachami rurashpa causajushca. Ñucami, Sela shuti ñuca churitaca, na paihuan cazarachircani” nircami. Judá runaca, chai huarmipica cutinga na chayarcachu.

27Huahuata unguna punlla ña pactajpimi, cashna tucurca: Paipaj vijsa ucupica, ishcai huahuacunami tiashca carca.

28Shinamandami cashna tucurca: Huahuata ungujujpica, shuj huahuarami maquita llujchirca. Shina llujchijpi, huahuata unguchij huarmi japishpami: “Caimi punda huacharirca” nishpa, paipaj maquipi shuj puca puchahuan huatachirca.

29Ashtahuangarin maquita llujchij huahuaca, maquita cutin ucuman aisajpimi, paipaj huauquira llujshirca. Shina llujshijpimi, unguchij huarmica: “¡Maitata canra punda llujshimunguiyari!” nishpa, Fares shutita shutichirca.

30Chaipaj catica, puca puchata paipaj maquipi huatashca, paipaj huauquimi llujshirca. Chai huahuataca, Zara shutitami shutichirca. Josemandapash, Potifarpaj huarmimandapashmi villajun