ISAÍAS 53 - Quichua Imbabura Bible

1Ñucanchi villashcataca, ¿pita crishcayari? Mandaj Diospaj rigrataca, ¿pimanda ricuchishcayari?

2Paita servijca, paipaj ñaupajpica, chaquishca alpapi tiaj sapimanda shuj yura viñanshnami llujshinga. Paica, juyailla ñavi runaca na canllu. Shina cajpipash paita ricushpaca, na juyailla cajpipash, juyashunllami.

3Gente purapica, na ricunayachi tucushca, yangapi churai tucushcami carca. Ninan nanaicunata, llaquita apanata yacharishcami carca. Ñavita shujman churanshna, na ricunayachishpami fiñarcanchi. Paitaca, yangapi churashpami na ricunayachircanchi.

4Paica, ñucanchi ung:uicunata aparcapachami. Ñucanchi nanaicunahuanmi, llaquita aparca. Ashtahuangarin ñucanchica, paitaca Taita Dios astishpa, chugrichishpa llaquichishcatami yarcanchi.

5Ashtahuangarin Diosta ñucanchi na cazushcamandami, paica chugrichi tucurca. Ñucanchi juchacunamandami, cutai tucunshna llaquichi tucurca. Casilla ali causaita ñucanchi charichunmi, paipaj cuerpopi ninan llaquita aparca. Pai chugrichi tucushcamandami, ñucanchica jambi tucurcanchi.

6Ñucanchica, tucuicunami chingashca llamacunashna, caita chaita rircanchi. Tucuicunami, ñucanchi ñanda japishpa rircanchi. Ashtahuangarin Mandaj Diosca, paimanmi tucui ñucanchipaj juchata apachirca.

7Paica ninanda llaquichi tucushpa llaquihuan cashpapash, imatapash na nircachu. Maltun jari llamashnami, huañuchina pushtuman apai tucurca. Paica, rutujcunapaj ñaupajpi llama upalla sirijunshna, imata ningapajllapash na shimita pascarcachu.

8Prezu japi tucushpa, juchachi tucushpami, huañuchi tucurca. Paita catijcunataca, ¿pita cuentai ushanga? Paica, cai pachapi causaj puracunamandami anchuchi tucurca. Ñuca agllashcacuna na cazushcamandami, chugrichi tucurca.

9Paica, Diosta na manllajcunahuan tandanajushpa pambai tucungapajmi alichirirca. Ashtahuangarin paica, ima nalitapash na rurashca cashpapash, pitapash na umachishca cashpapash, charijcunahuanmi huañushpa pambai tucurca.

10Shina cajpipash Mandaj Diosca, paita ashtahuan llaquichingapaj munashpami, ninanda llaquichishpa charirca. Ñucanchi juchamanda paipaj causaita cushcamandaca, paita catijcuna tiajta ricungami. Ashtaca punllacunatami causanga. Paihuanmi Mandaj Diosca, pai munashcata rurashpa imapipash ali llujshinga.

11“Paipaj alma llaquita apashca jipaca, na yanga apashcata ricushpami, ninanda cushijunga. Imatapash alipacha ruranata yachaj cashpami, imatapash cashcatapacha ruraj ñucata servij runaguca, taucacunata ima juchachinapash illajta ruranga. Paicuna nalicunata rurashcataca apangami.

12Chaimandami paitaca, jatungunahuan japinata charichun tiachisha. Pai japinataca, ninan shinlli runacunahuanmi chaupirinajunga. Paica, huañuchi tucungacamanmi llaquichi tucurca. Paica, ashtacacunapaj juchata apashpa, na cazujcunamandapash Diosta mañashpami, juchayucunashnallata tucurca.