JOSUÉ 4 - Quichua Imbabura Bible

Jordán yacumandaca, chunga ishcai rumicunatami japinajushca

1Tucuilla israelcuna Jordán yacuta chimbashca jipaca, Josuetaca cashna nishpami, Mandaj Diosca mandarca:

2“Chunga ishcai Israel aillucunamandaca, cada aillumanda shuj runata agllashpa,

3cashna nishpa mandai: ‘Jordán yacu chaquishca chaupipi shinlli shayanajuj curacunapaj ladomanda, chunga ishcai rumicunata apashpa yalinguichi. Chai rumicunataca, canguna maipimi tuta samana canguichi, chaipi shayachinguichi’ nishpa mandai” nircami.

4Shina nijpimi Josueca, chunga ishcai Israel aillu puramanda, pai agllashca chunga ishcai runacunata cayarca. Paicunataca, cada aillumanda shujtallami agllashca carca.

5Josueca, cashna nishpami mandarca: “Cangunata Mandaj Taita Diospaj arcata ñaupashpa, Jordán huaicu chaupiman richi. Chaimandaca, taita Israelpaj chunga ishcai churicunapaj mirai aillucuna mashna cashcashnallata, cangunaca rumita shujgu shujgu japishpa, rigra jahuapi apaichi.

6Chai rumicunaca, canguna purapica shuj ricuchinami canga. Jipa punllacunapi cangunapaj miraicuna: ‘Cai rumicunaca, ¿imatata ricuchin?’ nishpa, taitacunata tapujpica,

7cashna nishpa tigrachinguichi: ‘Mandaj Dioshuan ari ninajushpa escribishcata alichishca arcata apashpa yalichunmi, Jordán yacuca ishcandi ladoman shicanyarirca. Chai arcata apashpa Jordán yacuta yalinajujpimi, chai yacuca caiman chaiman shicanyarirca’ ninguichi. Chai mundunashca rumicunaca, israelcuna tucui causaipi tandanajushpa yarinajuchunmi canga” nircami.

8Josué mandashcashnallatami, israelcunaca ruranajurca. Mandaj Dios imashna Josueta mandashcashnallatami, Israel aillucuna mashna cashcashnallata, Jordán huaicu chaupimanda, chunga ishcai rumicunata japinajurca. Chai rumicunataca, paicuna carpacunata shayachina pushtucaman apashpami, chaipi shayachinajurca.

9Shinallata Josuepash, Jordán huaicu chaupipica, chunga ishcai rumicunatami shayachirca. Chai rumicunataca, Dioshuan ari ninajushpa escribishcata alichishca arcata huandushpa rinajuj curacuna shayanajushca pushtupimi shayachirca. Chai rumicunaca, cunangamanmi chaipillata.

10Chai arcata huandushpa rinajuj curacunaca, mandashcata gentecunaman villangui nishpa, Mandaj Dios imashna Josueta mandashcashnallata rurangacamanmi, Jordán huaicu chaupipi shayanajurcalla. Moisés imashna Josueta mandashcashnallatami, tucuita ruranajurca. Israelcunaca, Jordán huaicutaca uchami chimbanajurca.

11Tucuilla israelcuna ña chimbajpica, curacunapashmi israelcuna ricujta, Mandaj Diospaj arcahuan chimbarca.

12Shinallata Rubenbaj, Gadpaj aillu runacunapash, Manasespaj chaupi aillu runacunapashmi, Moisés mandashcashnallata, macanajunacunata apashca, caishuj israelcunata ñaupashpa chimbanajurca.

13Macanajungapaj alichirishcalla runacunaca, chuscu chunga huarangashnami carca. Paicunaca macanajunacunandimi, Jericó pueblo ladolla pambaman Mandaj Diospaj ñaupajman chimbanajurca.

14Chai punllami Mandaj Diosca, tucui israelcuna ricujta Josuetaca, ninanda jatunyachirca. Chaita ricushpami israelcunaca Josuetaca, Moisesta manllashcashnallata paipaj tucui causaipi manllanajurca.

15Chai jipami Mandaj Diosca, Josueta cashna nishpa mandarca:

16“Ñuca escribichishca shimicunata alichishca arcata huandushpa rinajuj curacunataca, Jordán huaicumanda llujshichun mandai” nircami.

17Shina nijpimi Josueca, curacunataca: “Jordán huaicumanda llujshimuichilla” nirca.

18Mandaj Dioshuan ari ninajushpa escribishcata alichishca arcata huandushpa rinajuj curacuna, Jordán huaicumanda llujshijhuanmi, cashna tucurca: Paicuna llujshishpa, chaquishca alpapi sarujhuanmi, Jordán yacuca punda imashna cashcashnallata, ishcandi manñacaman jundashpa rijurca.

19Israelcunaca, punda quillapaj chunga punllapimi, Jordán yacuta chimbashpa, Gilgal shuti pueblo lado pambapi carpacunata shayachishpa tianajurca. Gilgal shuti puebloca, Jericó pueblomandaca indi llujshimuj ladomanmi.

20Gilgal shuti pueblopimi Josueca, Jordán huaicumanda apamushca chunga ishcai rumicunataca shayachirca.

21Chaipimi Josueca, israelcunata cashna nirca: “Jipa punllacuna cangunapaj miraicuna: ‘Cai rumicunaca, ¿imatata ricuchin?’ nishpa, taitacunata tapujpica,

22cashna ninguichi: ‘Jordán huaicutami, israelcunaca chaquishca alpata chimbarca.

23Cangunata Mandaj Taita Diosca, canguna chimbangacamanmi Jordán yacutaca, canguna ricujta chaquichirca. Pundapash, cangunata Mandaj Taita Diosca, ñucanchi chimbangacamanmi, Puca Cuchataca chashnallata chaquichirca.

24Cai pachapi causanajuj tucui gentecunaca, Mandaj Diostaca ninan ushaita charijta yachachunmi, chashna rurarca. Shinallata cangunapash, cangunata Mandaj Taita Diosta tucui causaipi manllashpa causachunmi, chashna rurarca’ nishpa villanguichi” nijurcami.