JOSUÉ 18 - Quichua Imbabura Bible

Caishuj aillucunapaj llactacunamandami villajun

1Tucui tandanajushca israelcunaca, chai llactata mishashpa cazuchishca jipami, Silo shuti pueblopi tandanajurca. Chaipimi, Dioshuan tuparina jatun carpata shayachinajurca.

2Shina cashpapash Israel puramanda canchis aillucunamanmi, paicuna japina alpacunataca nara chaupishpa cushca carca.

3Chaipimi Josueca, israelcunataca cashna nijurca: “Cangunapaj ñaupa taitacunata Mandaj Taita Dios carashca alpacunataca, ¿ima punllacamanda na japishpa shuyagringuichi?

4Llactacunaman rishpa alpacunata ricuchun, ñuca cachangapaj tucui aillumanda quimsa runacunata agllaichi. Paicuna rishpa, tucui llactacunata purishpami, alpacunata paicuna imashna japina cashcata ricushpa, ñucaman villanajunga.

5Chai alpacunataca, canchis pushtupimi chaupinajunga. Judá shuti runapaj miraicunaca, urai ladoman paicunapaj llactapillata quedachunlla. Josepaj huasi ucu puracunaca, jahua ladoman paicunapaj llactacunapillata quedachunlla.

6Cangunaca, alpata canchis pushtupi chaupishpa, imashna cashcata ricushpa ñucaman villahuanguichi. Chaitaca, ñucanchita Mandaj Diospaj ñaupajpi caipi suertecunata rurashpami, cangunaman cusha.

7Ashtahuangarin levitacunaca, canguna purapica, alpataca imatallapash na japinata charinllu. Paicuna japinaca, Mandaj Diospajlla cura canami. Rubenbaj, Gadpaj aillucunapash, Manasespaj chaupi aillupash Jordán yacumanda indi llujshimuj ladoman tiaj llactacunatami, paicunapaj cachun japirca. Chai llactacunataca, Mandaj Diosta servij Moisesmi paicunaman curca” nijurcami.

8Shina nijpi chai runacuna jatarishpa, alpata medishpa chaupingapaj rinajujpimi Josueca, cashna nishpa mandarca: “Tucui llactata rishpa alpata aliguta ricushpa chaupishpaca, ñucapajman tigramunguichilla. Ñucami, cai Silo shuti pueblopi suertecunata rurashpa, Mandaj Diospaj ñaupajpi cusha” nircami.

9Shina mandajpimi, chai runacunaca, tucui llactata rishpa, alpataca canchis pushtupi chaupishpa, chaipi tiaj pueblocunapaj shuticunandi, shuj libropi escribinajurca. Shina rurashpaca Josuepajmanmi, Silo shuti pueblopi carpacunaman tigramurca.

10Silo shuti pueblopimi Josueca, Mandaj Diospaj ñaupajpi suertecunata rurarca. Chaipillatami Josueca, alpacunata asha asha chaupishpa, israelcunaman curca.

11Benjamín aillupaj mirai familiacuna imashna cashcashnallatami, suerteca urmarca. Paicunapaj alpaca, Judapaj miraicunapaj llactahuan, Josepaj miraicunapaj llactahuan chaupipimi urmarca.

12Paicunapaj llacta linderoca, Jordán yacu jahua ladomanda callarishpa, Jericó pueblo jahua ladocamanmi, vichai rijun. Chaimandaca, indi huashajuj ladoman tiaj urcuman vichai rishpami, Bet-avén shuti jichushca pambaman llujshijun.

13Chaimandaca, Luz nishca Bet-el shuti pueblo urai ladomanmi yalijun. Chaimandaca, Atarot-adar shuti pueblo urai ladoman tiaj urcumanmi, urai rijun. Chai urcuca, urai ladoman tiaj Bet-horón shuti pueblo ura ladomanmi.

14Chaimandaca, Bet-horón shuti pueblo chimba purapi urcu ura ladotami, indi huashajuj ladoman muyujun. Chaimandaca, Quiriat-baal nishca Quiriat-jearim shuti pueblomanmi llujshijun. Chai pueblopica, Judapaj miraicunami causanajun. Chaimi, indi huashajuj lado linderoca.

15Urai ladoman linderoca, Quiriat-jearim shuti pueblo pundamandapacha callarishpami, indi huashajuj ladoman tiaj Neftoa shuti pugyu ladoman llujshijun.

16Chai linderoca, Hinom shuti runapaj churipaj pugru pamba chimba purapi urcu chaquicamanmi, urai rijun. Chai urcuca, Refaim shuti pugru pamba jahua ladomanmi. Chaimandaca, Hinom shuti pugru pambata urai rishpami, jebuseocuna causanajuj urai ladota yalishpa, Rogel shuti pugyu yacucaman urai rijun.

17Chaimandaca, ashata jahua ladoman tigrashpami, En-semes shuti puebloman llujshijun. Chaimandaca, Adumín shuti vichai rina ñan chimba purapi, Gelilot shuti puebloman yalishpami, Rubenbaj churi Bohán shuti runapaj rumicaman urai rijun.

18Chaimandaca, Arabá shuti pamba chimba ladoman yalishpami, chai Arabá pambaman urai rijun.

19Chai linderoca, Bet-hogla shuti pueblo jahua ladoman yalishpami, Cachi tiaj Cucha chupayashcapi, Jordán yacu ura lado pundapi tucurijun. Chaimi, urai lado linderoca.

20Indi llujshimuj ladopica, Jordán yacumi lindero carca. Benjaminbaj mirai familiacuna imashna cashcashnallata, paicuna japina alpacunapaj muyundi linderocunaca, chaicunami carca.

21Benjamín aillupaj mirai familiacunapaj llactapi pueblocunaca, caicunami carca: Jericó shuti, Bet-hogla shuti pueblocunapash, Casis shuti pugru pambapash.

22Shinallata Bet-arabá, Zemaraim, Bet-el,

23Avim, Pará, Ofra,

24Quefar-haamoni, Ofni, Geba shuti chunga ishcai pueblocunapashmi, muyundi uchilla llactacunandi carca.

25Shinallata Gabaón, Ramá, Beerot,

26Mizpa, Cafira, Mozah,

27Requem, Irpeel, Tarala,

28Zela, Elef, Jebús nishca Jerusalén, Gabaa, Quiriat shuti chunga chuscu pueblocunapashmi, muyundi uchilla llactacunandi paicunapaj carca. Benjaminbaj mirai familiacuna imashna cashcashnallata paicuna japinajushca alpacunaca, chaicunami carca.