2 CORINTIOS 4 - Quichua Imbabura Bible

1Dios ninanda llaquishpa, Diospajta ruranata ñucanchiman mingashca cajpimi, na shaijushpa saquinchi.

2Ashtahuangarin pacalla pinganayaita imatapash ruranatami saquishca canchi. Taita Diospaj Shimitapash na huaglichishpa, pitapash na umachishpami villanchi. Ashtahuangarin Taita Diospaj ñaupajpi, tucuicunallata ricurichun ali yuyaita japichunmi, paipaj Shimitaca na llullashpa villanajunchi.

3Ali villaita ñucanchi villanajujpipash quilpashcashna tiajushpaca, chingaita chingangapaj rinajuj puracunapimi quilpashcashna tiajun.

4Paicuna ama yachai ushachunga, cai pachapi mandajuj diosmi, paicunapaj yuyaita yanayachishpa saquishca. Paicunataca, punchapamba Cristomanda ali villaica, michashna ama punchayachijuchunmi, ñausatashna charijun. Imashna Taita Dios cajtapash, Cristomi ricuchijun.

5Shina cajpimi, na ñucanchi causaimandaca villashpa purinchi. Ashtahuangarin: “Jesucristomi, tucuita Mandaj” nishpami villanajunchi. Ñucanchitaca pai juyajujpimi, cangunata servijcuna canchi.

6Taita Diosca: “Yanata, micha punchayachijuchun” nishcami. Paimi, ñucanchi shungutapash punchayachishca. Taita Dios punchapamba causajujta yachachunga, Jesucristomi ñucanchiman ricuchimurca.

Crishpami aliguta causanchi

7Cai causaipica, alpa mangapishnami, shuj ninan valishcataca charinchi. Na ñucanchimandalla ushaita charishpapash, Taita Diosmandami ninan ushaita charinchi.

8Tucui jatun llaquicuna japijpipash, na llaquirishpami causanchi. Ima tucujushpapash, na ninanda musparishpami causanchi.

9Ñucanchita catiriashpa llaquichijpipash, Diosca na saquinllu. Huactashpa urmachijpipash, na tucurishpami causanchi.

10Maita ñucanchi ima horas rishpapash, Jesús huañuchi tucushcataca, ñucanchi cuerpopimi apanajunchi. Shina cashpami Jesús causarishcataca, ñucanchi cuerpopi ricuchinchi.

11Ñucanchica cai causaipica, Jesusta catinajushcamandami, tucui causaipi huañuchi tucunalla causanchi. Shina cashpami Jesús causarishcatapash, ñucanchi huañunalla cuerpopi ricuchinajunchi.

12Huañuimi ñucanchitaca catiriajun. Ashtahuangarin cangunaca, causaitami charinguichi.

13Ashtahuangarin crinata caramujuj Espirituta charishpami, escribishcapi nijunshna: “Crircanimi, shina cashpami villarcani” nishcata yariashpa, ñucanchipash crishpa parlanajunchi.

14Apunchi Jesusta Dios causachishcataca, ñami yachanchi. Paillatami, Jesusta imashna causachishcashnallata ñucanchitapash causachishpa, cangunahuan ñucanchitapash paipaj ñaupajman pushashpa ricuchinga.

15Ñucanchica, cangunata juyashpami llaquicunata apanajunchi. Taita Diosta ashtacacuna punchapambagumi cangui nishpa pashi ninajuchunmi, paillata ninanda juyashpa caramujun.

16Shina cashpami, ñucanchipaj cai cuerpo rucuyajujpipash, shaijuitapash na shaijushpa, na saquinchi. Ñucanchi shungutaca punllandimi, Diosca mushujyachijun.

17Cai causaipi ñapash yalinalla jatun llaquicunaca, ashacamanllami japin. Ashtahuangarin cai llaquicunataca, punchapamba llactapi ñucanchi causaita causagrichunmi, aliguta caramujun.

18Ñucanchica imapash ricurinacunataca, na yarishpami causanchi. Ashtahuangarin na ricushcacunatami yariashpa causanchi. Imata ricushcacunapash tucurinllami. Ashtahuangarin na ricushcacunaca, causaita causaipajmi.