ISAÍAS 59 - Quichua Imbabura Bible

Israelcunapaj juchacunataca, Diosmanmi villashca

1Ricuichi, cangunata na quishpichi ushangapaca, Mandaj Diospaj maquica na faquirishcachu. Canguna mañashcata na uyangapaca, paipaj rinripash na uyajca, na canllu.

2Ashtahuangarin canguna nalicunata rurashcallatami, cangunahuambash, cangunapaj Taita Dioshuambash shicanyachishca. Cangunapaj juchacunallatami, canguna mañashcata ama uyachun, paipaj ñavita pacashca.

3Cangunapaj maquica, huañuchishcamandami yahuarpi mapayarca. Cangunapaj dedocunapash, nalita rurashcamandami mapayarca. Cangunapaj shimicunapash, llullashpallami riman. Cangunapaj jallupash, nalitallami parlan.

4Imatapash cashcatapacha ruranajuchun caparishpa mañangapaca, pipash na tianllu. Llullashcamanda ricushpa llaquichij runapash, pipash na tianllu. Ashtahuangarin imapash yangacunata yariajlla causashpami, imatapash yangacunata rimanajun. Nali yuyaicunata vijsayu tucushpa, ungunshnami imatapash nalitalla ruranajun.

5Paicunaca, culebra lulungunata ugllanshna, araña telata ahuanshnami causanajun. Maijambash chai lulungunata micushpaca, huañungallami. Chai lulungunata tugyachijpica, culebracunami llujshinga.

6Paicuna ahuashca telacunaca churajungapajpash, na alichu canga. Paicuna imatalla rurashcahuanga, quilparitapash na ushangachu. Imata rurashpapash, nalitallami ruranajun. Paicunapaj maquica, imatapash llaquitallami ruranajun.

7Paicunapaj chaquihuanga, nalita rurangapajllami calpanajun. Ima nalitapash na rurajcunata huañuchishpa yahuarta jichangapajllami, ucha rinajun. Paicunapaj yuyaipipash, nalita ruranatallami yarinajun. Maipipash llaquichishpa, tucuchishpallami purinajun.

8Casilla aliguta causanataca, na yachanllu. Paicunapaj causaipica, imatapash cashcatapacha ruranapash na tianllu. Paicuna purina ñangunapash vishtumi. Maijambash chai ñangunata catishpaca, casilla ali causaitaca na rijsingachu.

9Chaimandami, imatapash cashcatapacha ruranapash, ñucanchimandaca caruyashca. Aliguta ruranapash, na ñucanchipajman chayamurcachu. Punchapamba punllata shuyanajushpapash, yana yana tutapishnami causanchi. Pacarichun shuyanajushpapash, tutapishnami purinajunchi.

10Ñavi illaj ñausacunashnami, patacunapi maquihuan taunarishpalla purinajunchi. Chaupi punllapash, tutapishnami nitijanajunchi. Huañushcacunashnami, yana ucucunapi causanajunchi.

11Ñucanchica tucuicunami, osocunashna huacanajunchi. Palomacuna huacanshnami, aij nishpa llaquilla huacanajunchi. Imatapash cashcatapacha rurachun shuyanajujpipash, na tiarcachu. Quishpirinata shuyanajujpipash, ñucanchimandaca caruyarcami.

12Ñucanchi canda na cazushcacunatami, cambaj ñaupajpica mirachishcanchi. Ñucanchi nalicuna cajtaca, ñucanchi juchacunallatami villanajun. Ñucanchi ima nalita rurashcapash, ñucanchipillatami tiajun. Chaimandami, ñucanchi juchacunataca rijsinchi.

13Yachashpata na cazushpa, Mandaj Diosta fiñachishcata, ñucanchi Taita Diosmanda anchurishcatapashmi yacharcanchi. Shinallata pitapash nalicachinata, Diosta na cazunata, umachishpa llaquipi churanatalla ñucanchi shungupica yarinajushcatami yacharcanchi.

14Chaimandami japina cashcata japinapash, imatapash cashcatapacha ruranapash, ñucanchimandaca caruyarca. Na llullanapash, plazapimi nitijashpa urmashna tucurirca. Chaimandami, aliguta ruranapash na shamui usharca.

15Na llullashpa villanaca jarcarircami. Imatapash nalita ruranamanda anchurijpash, prezumi churai tucujurca. Aliguta ruranata saquijta ricushpami, Mandaj Diosca ninanda fiñarirca.

16Shina nalicuna cajpipash, pi jarcajpash na tiajpimi, Mandaj Diosca ninanda llaquirirca. Chaimandami, paipaj rigrahuanllata quishpichirca. Shinami paica, imatapash cashcatapacha ruraj cajtaca ricuchirca.

17Imatapash cashcatapacha ruranatami, jirru churajunatashna churajurca. Quishpirinataca, umapi churajuna jirruta churajushcashnami shayarirca. Paita na cazushcamanda randi llaquichinatami, churajunata churajushcashna churajurca. Ninandapacha juyaihuanmi, jahualla churanahuanshna quilparirca.

18Paita fiñajcunataca, llaquichina cashcashnallata llaquichingapaj, paita na ricunayachijcuna japinatapash ninanda fiñarishpa paicunaman cungapajmi, chashna shayaringa. Mama cucha manñacunapi causajcunamambashmi, paita fiñashcamandaca cuna cashcatapachata cunga.

19Shina rurajpimi, Mandaj Diospaj shuti punchapamba cajtaca, indi llujshimuj ladomanda, indi huashajuj ladocaman manllanajunga. Fiñaj runaca, jatun yacushnami shamunga. Ashtahuangarin paita jarcangapaca, Mandaj Diospaj Espiritumi, banderata ricuchinshna jarcanga.

20“Quishpichijca, Jacobopaj miraicuna nalita ruranajushcata saquijpimi, quishpichingapaj Sion shuti puebloman shamunga” ninmi Mandaj Diosca.

21Mandaj Diosca, cashnatapashmi nin: “Paicunahuanga, caita pactachingapajmi ari nigrini: Ñuca Espirituca, cangunapimi tiajun. Cangunapaj shimipi ñuca churashca shimicunaca cangunapajpash, cangunapaj huahuacunapajpash, paicunapaj huahuacunapajpash, cunanmandapacha causaita causaicaman napacha illangachu” ninmi Mandaj Diosca.