LEVÍTICO 17 - Quichua Imbabura Bible

Diospaj huasipillami, Diosman imatapash carana cashca

1Mandaj Diosca, Moisestaca cashnami nijurca:

2“Aarondapash, paipaj churicunatapash, tucui israelcunatapash, cashna ningui: Mandaj Diosca, cashnami mandashca:

3‘Israel puramanda maijan runa cashpapash, huagrata cashpa, maltun llamata cashpa, chivota cashpa, cangunapaj carpacunapillata, na cashpaca carpacunamanda canllaman llujchishpami, cungata muchushpa huañuchinga.

4Shina huañuchishpapash, ñucahuan tuparina jatun carpa pungupi, Mandaj Dios ñucapaj jatun carpa ñaupajpi, Mandaj Dios ñucaman carangapaj napash apamungachu. Chashna rurashpaca, huañuchishpa yahuarta jichashcamandami, chai runaca llaquichi tucunga. Shinamandami chai runaca, Israel puramanda anchuchi tucunga.

5Pamba chaupicunapi animalcunata huañuchij israelcuna, Diosman cushpa huañuchina animalta caiman apamuchunmi, chashna shicanyachinga. Mandaj Dios ñucahuan tuparina jatun carpa ñaupajman apamushpa, curaman cunajuchunmi, chashna shicanyachinga. Chaipimi, Mandaj Dioshuan ali cangapaj cushca animalta huañuchinga.

6Chai animalpaj yahuartaca curami, Dioshuan tuparina jatun carpa pungupi, Mandaj Diospaj altar jahuapi tsrirapachinga. Virataca, Mandaj Diospajman mishquillagu ashnajuchunmi rupachijunga.

7Shinami cangunaca, canguna huañuchina animalcunataca, ima horapash cutinga na ayacunamanra cushpa huañuchinguichi. Chaicunata catishpami huainayarcanguichi. Caitami, cangunapaj tucui causaipi pactachinajuchun ñuca cushca cajpi, canguna causanajui huatacunapi pactachina canguichi’ ningui.

8Shinallata cashnatapash ningui: ‘Israel puramanda maijan runa cashpapash, na cashpaca shuj llactamanda shamushpa, cangunahuan causanajuj runacuna cashpapash, animalta cushpami tucuillata rupachinga. Na cashpaca animalta cushpami huañuchinga.

9Shina huañuchishpapash, Mandaj Diosman cuchun, Dioshuan tuparina jatun carpa punguman na apamushpaca, chai runapash Israel puramandaca chashnallatami anchuchi tucunga.

Yahuartaca, na micunachu nishpami mandashca

10Israel puramanda maijan runa cashpapash, na cashpaca shuj llactamanda shamushpa causajushpapash, ima yahuartapash micungapashchari. Yahuarta micuj chai runataca fiñashpa ricushpami, Israel puramandaca anchuchisha.

11Causaita charijcunapaj causaica yahuarpimi. Yahuartaca, juchata anchuchijuchun cangunapaj almamanda cushpa, altarpi churashpa rupachinajuchunmi curcani. Chai yahuarllatami, runapaj juchacunataca anchuchinga.

12Chaimandami israelcunataca, cashna nircani: Canguna puramandaca, maijambash na yahuarta micungachu. Shinallata caru llactamanda shamushpa cangunahuan causajuj runapash, yahuartaca na micungachu nircanimi.

13Israel puramanda maijan runa cashpapash, na cashpaca shuj llactamanda shamushpa, paicunahuan causanajuj gentecuna cashpapash, micuna maijan animalta, na cashpaca alasyu animalta cashpapashmi, japishpa huañuchinga. Shina huañuchishpaca, yahuarta shitashpami alpahuan quilpanga.

14Causaita tucui charijcunapaj causaica, paicunapaj yahuarpimi. Shinamandami israelcunataca, cashna nircani: Causaita tucui charijcunapaj causaica, paicunapaj yahuarpi cajpimi, maijan aichamanda yahuartapash, na micuna canguichi. Yahuarta maijambash micushpaca, Israel puramanda anchuchi tucungami nircanimi.

15Shinallata llactapillata huacharishca cashpa, na cashpaca shuj llactamanda cashpapash, huañushca animalpaj aichata, na cashpaca millai animal caita chaita fitishpa huañuchishca aichata micungapashchari. Shina micushpaca, pai churajushcata tajshachun, shinallata paipash armachun. Shina rurashpapash paica, tutayangacamanmi mapa canga. Chai jipami, mapa illaj tucunga.

16Ashtahuangarin pai churajushcata na tajshashpa, paipash na armashpaca, paipaj juchamandami llaquita apanga’ ningui” nijurcami.