APOCALIPSIS 3 - Quichua Imbabura Bible

Sardis shuti pueblopi crijcunamanmi villashca

1Sardis shuti pueblopi tandanajuj crijcunapaj angelmambash, cashna nishpa escribingui ninimi: ‘Ñucami, Taita Diospaj canchis espiritucunata, canchis luzerocunatapash charijushpa, cashna nini: Ñucami, can imatalla rurajujtapash ricujuni. Causajunmi ni tucushca cashpapash, huañushcashnami cangui.

2Ali cuidanshnami cana cangui. Can alitalla rurajushcataca, nara huañushcashna cajllapita alichinami cangui. Can rurajushcacunaca, Taita Diospaj ñaupajpi nara alipacha cajtami ricujuni.

3Imata yachachijujpi uyashcatapash, aligutami yarina cangui. Chai yachachishcataca, nali causajushcamanda llaquirishpami, aliguta pactachina cangui. Na rijcharianshna cajpica, shuhuashnami cungashcapi cambajman shamusha.

4Ashtahuangarin Sardis shuti pueblopi causanajuj canguna purapica, huaquingunaca churajunata na mapayachishcami tianguichi. Canguna alicuna cashpami, yuraj churajunata churajushpa, ñucahuan purinajunguichi.

5Nalita mishajca, yuraj churajunatami churachi tucunga. Paipaj shutitaca, causaita causanata villajuj libromandaca, na anchuchishachu. Ñuca Taitamambash, paipaj angelcunamambash, caicunaca ñucapajmi nishpami villasha.

6Maijambash rinrita charijca, tandanajuj crijcunaman, Diospaj Espíritu villajujta uyanguichi’ nishpa escribingui.

Filadelfia shuti pueblopi crijcunamanmi villashca

7Filadelfia shuti pueblopi tandanajuj crijcunapaj angelmambash, cashna nishpa escribingui ninimi: ‘Jucha illaj cashpami, na llullashpa villajuni. Davidpaj llavehuan ñuca pascashcataca, pipash na vichai ushangachu. Vichashcatapash, na pascai ushangachu. Ñucami cashna nini:

8Can imata rurajujtapash ricujunimi. Ricui, can villajuchunga, cambaj ñaupajpi punguta pascanshnami saquishcani. Chaitaca, pipash na vichai ushangachu. Na yapa ushaita charishpapash, ñuca villajushca shimicunataca, aligutami pactachijungui. Ñucataca na rijsinichu nishpaca, na nishcanguichu.

9Ricui, Satanasta yaringapaj tandanajujcunatami, cambajman cachamusha. Paicunaca, Judea llactamanda na cashpapash, Judea llactamandami canchi nishpami llullanajun. Ricui, candaca ñuca juyajujtaca yachachunmi, cambaj ñaupajman pushamushpa, paicunataca cungurichisha.

10Na ñapash fiñarishpami causana nishpa ñuca mandashcataca, aligutami pactachijungui. Shinamandami cai pachapi tucui causajcunata imashna causanajujta ricungapaj ninan llaquicuna japimuna horamandapash, candaca alichisha.

11Ricui, ñucami ñapash shamusha. Can japina coronata pipash ama quichui ushachunga, can ña charijushcataca aliguta charijunallami cangui.

12Nalicunata mishajtaca, ñucami ñuca Taita Diospaj huasipi pilartashna churana cani. Chaimandaca, cutinga na llujshingachu. Paipica, ñuca Taita Diospaj shutita, ñuca Taita Diospaj pueblopaj shutitapashmi escribisha. Chai puebloca, mushuj Jerusalenmi canga. Jahua pachapi tiajuj ñuca Taita Diospajmanda uriajumuna mushuj Jerusalenmi canga. Ñuca mushuj shutipashmi canga.

13Maijambash rinrita charijca, tandanajuj crijcunaman Diospaj Espíritu villajujta uyanguichi’ nishpa escribingui.

Laodicea shuti pueblopi crijcunamanmi villashca

14Laodicea shuti pueblopi tandanajuj crijcunapaj angelmambash, cashna nishpa escribingui ninimi: ‘Ricui, imapash chashnapacha cajpimi, ñuca ricushcatapacha imashna cajtapacha na llullashpa villajuni. Taita Diosca callaripica ñucahuanmi, ima tiachumbash tucuita rurarca. Shina cajpimi, cashna nini:

15Can imatalla rurajujtapash, ñucami ricujuni. Canga chiripash, rupajpash na canguichu. ¡Canga chiri cashpa, na cashpaca rupaj cashpachari ali canguiman!

16Cunujllalla cashpa na yapa chiri, na yapa rupaj cajpimi, candaca shungu tigrachisha.

17Canga, charij cashpami, ñucallatami ninanda charijyashcani, na imapash illanichu nijungui. Canga, llaquilla causaj, llaquinayai, imagutapash na charij, ñausa, lluchulla cashcataca na yachanguichu.

18Chaimandami candaca, can ninanda charijyangapaj munashpaca, ninapi rupachishca juyailla ñuca orota randihuai nishpa, ali yuyaita cuni. Churajunatapash, yuraj churajunata randihuai ninimi. Chaihuanmi cambaj pinganayai, lluchulla cuerpotapash quilparingui. Shinallata ñavi ali ricuchunga, colirio nishca jambitami churaringui.

19Ñuca juyashcacunataca, tucuicunatami jarcashpa, ninanda llaquichishpa yachachini. Cunanga, ñucatalla juyashpa, nalita rurashcamanda ninanda llaquirishpa, ñucapajman tigraringui.

20Ricui, ñucami punguta huactachinshna, mingachihuai nishpa cayajuni. Pipash ñuca rimajujta uyashpa punguta pascajpica, paipajman shamushpa, paihuanmi micusha. Paipash ñucahuanmi micujunga.

21Nalicunata mishajmanmi, ñuca mandashpa tiarinapi ñucahuan tiajuchun carasha. Ñucapash nalicunata mishashpami, ñuca Taitahuan pai mandashpa tiarinapi tiajuni.

22Maijambash rinrita charijca, tandanajuj crijcunaman Diospaj Espíritu villajujta uyanguichi’ nishpa escribingui” nihuarcami.