LEVÍTICO 19 - Quichua Imbabura Bible

Jucha illaj canatapash, imatapash cashcatapacha ruranatapash mandashcami

1Mandaj Diosca, Moisestaca cashnami nijurca:

2“Tandanajushca tucui israelcunaman, cashna nishpa villai:

‘Ñucami, cangunata Mandaj, jucha illaj Taita Dios cani. Shina cashcamanda cangunapash ñucashnallata, jucha illajmi causana canguichi.

3Cangunapaj taita mamataca, tucuicuna manllanami canguichi. Ñuca samana punllatapash, pactachishpami causana canguichi. Ñucami, cangunata Mandaj Taita Dios cani.

4Yanga dioscunata catingapaca, na tigranachu canguichi. Canguna charina dioscunataca, imatapash na yacuyachishpa ruranachu canguichi. Ñucami, cangunata Mandaj Taita Dios cani.

5Mandaj Dioshuan ali cangapaj animalta cushpa huañuchishpaca, pai chasquichun, pai munashcashna caranguichilla.

6Chaitaca, chai huañuchishca punllapash, cayandi punllapash micunguichilla. Quimsa punllacaman puchushcataca, ninapimi rupachina canguichi.

7Ña quimsa punlla tucujpi micushpaca, millanayaimi canga. Chashna rurajpica, pai carashcatapash na chasquingachu.

8Maijambash chashna micushpaca, Mandaj Diospajlla shicanyachishcata yangapi churashcamandami, chai nalita rurashcamandaca llaquichi tucunga. Chai nalita ruraj runaca, paipaj llacta puramandaca anchuchi tucungami.

9Cambaj alpapi granocunata cozechajushpaca, ama alpa manñacunacaman tandachinguichu. ña cozechashca alpapipash, na pallajunachu cangui.

10Shinallata cambaj uvas chagrapipash, na tigrashpa tigrashpa mascanachu cangui. Cambaj uvas chagrapi fucushpa urmashcatapash, na pallanachu cangui. Chaicunataca, imagupash illajcuna pallachun, caru llactamanda shamushcacuna pallachunmi saquina cangui. Ñucami, cangunata Mandaj Taita Dios cani.

11Na shuhuanachu canguichi, na umachirinachu canguichi, caishuj chaishujpash na llullarinachu canguichi.

12Ama yangata ñuca shutipi juramentunguichu. Chashna rurashpaca, cambaj Taita Diospaj shutitami, yangapi churajungui. Ñucami, Mandaj Dios cani.

13Cambaj cumba runagutaca, ama llaquichishpa charinguichu. Paipajtaca, ama imatapash shuhuanguichu. Shujpi shujpi trabajaj runagu, cambaj huasipi trabajashcamanda cunataca, ama cayandipaj shuyachinguichu.

14Rinri na uyaj runagutaca, ama imapash llaqui japishpami ali canman ninguichu. Ñausa runagupaj ñaupajpipash, ama nitijanata churanguichu. Ashtahuangarin cambaj Taita Diosta manllangui. Ñucami, Mandaj Dios cani.

15Imatapash cashcatapacha rurashpa llaquita alichinapica, ama imagutapash na charij cajpilla alita ruranguichu. Shinallata ashtacata charij cajpilla, ama alita ruranguichu. Ashtahuangarin cambaj cumba runagutaca imatapash cashcatapacha rurashpa llaquita alichingui.

16Cambaj gente purapica, ama huasha parlashpa puringuichu. Cambaj cumba runagutapash, ama huañuchinatalla yariashpa puringuichu. Ñucami, Mandaj Dios cani.

17Cambaj huauquitaca, ama cambaj shungupilla millanayachishpa puringuichu. Cambaj cumba runagu juchata rurashcapi, cambash paishnalla ama rurangapaca, aliguta yarishpa rimangui.

18Canda llaquichijpipash, na chashnallata llaquichinachu cangui. Cambaj llacta puratapash, ama fiñashpalla puringuichu. Ashtahuangarin cambaj cumba runagutaca, imashna can juyarinshnallata juyangui. Ñucami, Mandaj Dios cani.

19Pactachinajuchun ñuca cushca shimicunata cazungui. Cambaj huagrataca, ama shuj animalcunahuanra puñuchinguichu.

Cambaj alpapipash, ama shuj shuj muyucunata chapushpa tarpunguichu. Shinallata shuj shuj puchacunahuan ahuashca churajunatapash, ama churajunguichu.

20Shuj jarihuan cazarangapaj ari nirishcalla cashpapash, paipaj amoman nara culquita cushca, amopash nara cacharishca servij cuitsahuan shuj runa puñushpaca, ishcandimi asti tucunga. Cuitsata nara cacharishca cajpimi, paicunataca na huañuchinga.

21Chai runaca, pai nalita rurashcamandami, Mandaj Diosman cungapaj shuj jari llamata Dioshuan tuparina jatun carpa punguman apamunga.

22Juchamanda cushca chai jari llamataca curallatami, Mandaj Diospaj ñaupajpi Dioshuan ali tucuchun cunga. Shina cujpimi, chai runa juchata rurashcataca Diosca cunganga.

23Canaán llactaman ña yaicushpaca, micuna granocunata fucuj tucui yuracunatami tarpunguichi. Chai yuracunapi punda fucushcacunataca, circuncisión nishcata nara rurashcatashna yanguichi. Chaicunaca, quimsa huatacamanmi circuncisionda na rurashcashna canga. Chai fucushcacunataca, na micunachu canguichi.

24Ña chuscu huata tucujpica, chai yuracunapi tucui fucushcacunataca, Mandaj Diosta alicachishpa paiman shicanyachinguichi.

25Ashtahuangarin chai yuracunapi ashtahuan aliguta fucuchijuchunga, picha huatapi fucushcatami, cangunaca micuna canguichi. Ñucami, cangunata Mandaj Taita Dios cani.

26Yahuarhuandaca, imatapash na micunachu canguichi. Shinallata cangunaca, brujocunapash, yachajcunapash, na tucunachu canguichi.

27Uma coronataca, na muyundita rutuchinachu canguichi. Barbas pundatapash, na rutushpa huaglichinachu canguichi.

28Pipash huañujpica, cangunapaj cuerpotaca, na chugrichinachu canguichi. Cangunapaj cuerpopica, ima ricuchinatapash na rurachinachu canguichi. Ñucami, Mandaj Dios cani.

29Cambaj ushigutaca, na jaricunahuanlla causaj huarmita rurashpa mapayachinachu cangui. Chai llactapi causajcuna, culquimandalla huainayashpa, chai llactapi ama mapalla jundachunmi, na chashna rurana cangui.

30Ñuca samana punllacunataca, pactachinami canguichi. Ñucapajlla huasitapash, manllaihuan aliguta charinguichi. Ñucami, Mandaj Dios cani.

31Yumbucunatapash, yachajcunatapash na cutin mascanachu canguichi. Paicunata imatapash tapushpa, na mapayanachu canguichi. Ñucami, cangunata Mandaj Taita Dios cani.

32Yuraj uma rucugupaj ñaupajpica jatarishpa, paipaj ñavita ricushpa alicachinami cangui. Cambaj Taita Diostaca, manllanami cangui. Ñucami, Mandaj Dios cani.

33Shuj llactamanda shamushca runagu, cangunapaj llactapi cangunahuan causajujpica, na llaquichishpa charinachu canguichi.

34Shuj llactamanda shamushpa cangunahuan causajuj runagutaca, cai llactapi huacharishca runatashnallatami charina canguichi. Paitaca, imashna can juyarinshnallatami juyana cangui. Cangunapash Egipto llactapica, shuj llactamanda rishpami chaipi causarcanguichi. Ñucami, cangunata Mandaj Taita Dios cani.

35Ima llaquita alichinapipash, imatapash cashcatapacha rurashpami alichina canguichi. Alpata medishpapash, imata pezashpapash, ima shujta medishpapash, ali ricushpami alichina canguichi.

36Ali pezaj balanzata, ali pezaj rumita, ali medij medinatami charina canguichi. Ñucami, Egipto llactamanda llujchimuj, cangunata Mandaj Taita Dios cani.

37Cangunaca, pactachinajuchun ñuca cushca shimicunata, tucui ñuca mandashcacunatami pactachishpa causana canguichi. Ñucami, Mandaj Dios cani’ nishpa villai” nijurcami.