2 CRÓNICAS 31 - Quichua Imbabura Bible

1Tucui chaicunata ña rurashca jipami, chaipi tandanajushca tucui israelcunaca, Judá llactapi tiaj pueblocunaman llujshinajurca. Shina llujshishpami, rurashcalla dioscunatapash, Asera shuti huarmi diosman rijchajcunatapash, tucuillata faquishpa tucuchinajurca. Tucui Judá llacta, Benjamín llacta lomacunapi tiaj altarcunatapashmi urmachinajurca. Efraín llactapipash, Manasés llactapipashmi, tucuillata tucuchingacaman urmachinajurca. Chai jipami, israelcunaca paicunapaj pueblocunaman, paicuna causanajuj paicunapaj alpacunaman tucuilla tigranajurca.

Ezequías shuti runaca, curacunata, levitacunatapashmi, Diosta servinapi cutin churashca

2Chai jipami, Ezequías shuti runaca curacunata, levitacunataca paicuna imashna huashan huashan yaicun cashcashnallata, paicuna imata ruranata yachan cashcashnallata rurachun, shican shican churarca. Curacunata, levitacunataca, animalcunata Diosman cushpa tucuillata rupachinajuchun, Dioshuan ali cangapaj carashcata cunajuchun, Diospajta ruranajuchun, Diosta pashi nishpa, Mandaj Diospaj huasi patio pungu ladocunapi alicachinajuchunmi mandarca.

3Tutamandapash, chishipash Diosman cushpa tucuillata rupachinajuchunga, jatun mandajllatami, paipaj quiquin jazindamanda animalcunata cararca. Shinallata samana punllacunapi, luna llullu punllacunapi, fiesta punllacunapi, Mandaj Dios mandashpa escribichishcapi nijunshnallata, animalcunata Diosman cushpa tucuillata rupachinajuchunmi cararca.

4Shinallata Mandaj Dios mandashcata curacuna, levitacuna rurashpa catichunga, Jerusalenbi causajcunatami, curacunaman, levitacunaman cunataca cuchun mandarca.

5Cai mandashcata escribishcacunata tucuicunaman villajpimi israelcunaca, pambacunapi punda fucushca granocunata, vinota, aceiteta, balun mishquita, pambacunapi fucushca tucui shuj granocunatapash ashtacatapacha cunajurca. Shinallata tucui imalla tiashcamandapashmi, chungamanda shujguta shicanyachishpa ashtacatapacha apamunajurca.

6Israel llactapi causajcunapash, Judá llactapillata tiaj shuj pueblocunapi causajcunapash, chashnallatami huarmi huagracunamanda, llamacunamandaca, chungamanda shujguta cunajurca. Shinallata chungamanda shujguta cungapaj Diosman shicanyachishcatapash, paicunata Mandaj Taita Diosman carashumbachami nishcamandapashmi apamunajurca. Chaicunata apamushpaca, mundunashpami saquinajurca.

7Huatapaj quimsa quillapi granocunata mundunai callarishpaca, huatapaj canchis quillapimi tucuchinajurca.

8Ezequías runapash, mandajcunapash shamushpa, chai grano mundungunata ricushpami, Mandaj Diostaca aligumari cangui nishpa, Dios agllashca israelcunatapash bendicianajurca.

9Chai jipami Ezequías runaca, curacunatapash, levitacunatapash chai mundun granocunamanda tapurca.

10Pai tapushcataca, Sadoc shuti curapaj huasi ucupura curacunata mandaj Azarías shuti curami, cashna nishpa tigrachirca: “Mandaj Diosman imagutapash carashpa, paipaj huasiman apamui callarishcamandaca, ñucanchi japinata japishpaca, na ushajtami micupashcanchi. Chai jahuapash, ashtaca puchushcarami. Mandaj Diosmi, pai agllashcacunataca bendiciashca. Chaimandami, paicuna imatalla caramushcacunaca, ashtacapacha puchushca” nijurcami.

11Shinamandami Ezequías runaca, Mandaj Diospaj huasipi ucucunata rurachun mandarca. Shina mandajpimi, chai ucucunata ruranajurca.

12Chai ucucunapimi, punda fucushca granocunamanda cushcatapash, chungamanda shujguta cushcatapash, Diosman shicanyachishpa cushcatapash, aliguta cazushpa alichinajurca. Chaipi punda ricuj cachunga, Conanías shuti levitatami churanajurca. Paipaj jipa ricuj cachunga, paipaj huauqui Simei shuti levitatami churanajurca.

13Shinallata Jehiel, Azazías, Nahat, Asael, Jerimot, Jozabad, Eliel, Ismaquías, Mahat, Benaía shuti runacunaca, mayordomocunami carca. Paicunaca, Conanías shuti runata, paipaj huauqui Simei shuti runata ayudashpami servinajurca. Jatun mandaj Ezequías runapash, Taita Diospaj huasipi mandaj Azarías runapash mandashcashnallatami servinajurca.

14Indi llujshimuj lado pungupica, Imna shuti levitapaj churi Coré shuti levitami cuidajurca. Paica, gentecunapaj tucui munaihuan Taita Diosman carashcacunata, Mandaj Diosman shicanyachishpa chaupishcacunata, Diospajlla shicanyachishcacunata cuidajmi carca.

15Paitaca, Edén, Miniamín, Jesúa, Semaías, Amarías, Secanías shuti levitacunami ayudanajurca. Paicunaca, curacuna causanajuj pueblocunapi paicunapaj huauqui curacunaman chaupishpa cushcataca na cungashpami cunajurca. Paicunapaj huauqui curacuna mashnapi shicanyashca cashcashnallatami, paicunamanga rucucunamambash, jipa viñaicunamambash chaupishpa cunajurca.

16Miraicuna imashna cashcashnallata, quimsa huatamanda vichaiman shuticunata escribichishca jaricunamambash, Diospajta rurangapaj Mandaj Diospaj huasiman shamuna punllacunapi, paicuna imatalla ruranata yachashcashnallata shican shican shamujcunamambashmi cunajurca.

17Shinallata paicunapaj ñaupa taitacunapaj huasi ucu puracuna mashna cashcashnallata, cura puracunapi cuentashca runacunamambashmi cunajurca. Shinallata levitacunamambashmi, paicuna imatalla ruranata yachashcashnallata, imashna shican shican tandanajushcashnallata cunajurca. Chaita rurachunga, ishcai chunga huatata charijmanda vichaimanmi chashna cunajurca.

18Tucuita pactachingapaj Diospajlla tucushcamandami, paicunaca tucui huahuacunandi, ushicunandi, huarmicunandi shuticunata tucuilla escribichishca carca.

19Paicunapaj pueblo muyundicunapi tiaj michina pambacunapi causaj, Aaronbaj mirai curacunamambash, tucui pueblocunapimi chashnallata cunajurca. Shuticunata ña villashca runacunami, cura puracunapi tiaj tucui runacunamambash, levitacunapaj tucui miraicunamambash, paicuna japinataca chaupishpa cunajurca.

20Ezequías runaca, tucui Judá llactapimi, chashna rurarca. Paica, paita Mandaj Taita Diospaj ñaupajpica, tucui shunguhuanmi aligutalla, na pandashpa chashna cashcatapacha rurashpa causajurca.

21Taita Diospaj huasipi tucui imapilla servishpa callaringapaj yarijushcataca, mandashca shimicunapi nijunshnallatami rurarca. Paipaj Taita Diosta mascashpa, tucui shunguhuan imagutapash rurashcamandami, tucuipi ali llujshirca.