1 REYES 3 - Quichua Imbabura Bible

Salomonga, Faraonbaj ushihuanmi cazarashca

1Salomonga, Egipto llactata jatun mandaj Faraonbaj familia purami tucurca. Paica, Faraonbaj ushi paipaj huarmitaca, Davidpaj pueblomanmi pushamurca. Salomonga, pai mandashpa tiajuna huasitapash, Mandaj Diospaj huasitapash, Jerusalén pueblo muyundi pircatapash chairami rurachishpa tucuchijurca.

2Chai huatacunacamanmi, Mandaj Diosta yaringapaj rurashca huasica, nara tiarca. Chaimandami gentecunaca, lomacunapi tianajuj altarcunapilla animalcunata Diosman carashpa huañuchin carca.

Salomonga, ali yachaitami mañashca(2 Crón. 1:1-13)

3Ashtahuangarin Salomonga, Mandaj Diosta juyashpami, paipaj taita David yachachishcata cazushpa causarca. Paica, lomacunapi tiajuj altarcunapimi animalcunata Diosman carashpa huañuchin carca. Inciensotapashmi cushnichin carca.

4Jatun mandajca, Gabaón shuti pueblomanmi rin carca. Chai lomapi tiajuj altarmi ashtahuan ali nishca carca. Salomonga, chai altarpimi Diosman carashpa huañuchingapaj rishpaca, huaranga animalcunata Diosman carashpa huañuchishpa tucuillata rupachin carca.

5Shuj tutami Mandaj Diosca, Gabaón pueblopi Salomonman muscuipi ricurirca. Chaipimi Taita Diosca: “Imata ñuca carachun munashpapash, mañahuailla” nirca.

6Shina nijpimi Salomonga, cashna nijurca: “Canga, canda servij ñuca taita Davidtaca, ninandapachami llaquircangui. Paica, na nij tucushpalla imatapash cashcatapacha rurashpa, tucui shunguhuan aligutalla rurashpami, cambaj ñaupajpi canhuan purirca. Chaimandami can ninandapacha llaquishcataca, paiman alichishpa charijushcangui. Chashna charijushpami, pai mandashpa tiajushcapica, paipaj churita churahuashcangui. Chaica cunan cai punllami pactamushca.

7Cunanga, ñucata Mandaj Taita Dioslla, canmi canda servij ñucataca, ñuca taitapaj randi jatun mandaj cachun churahuashcangui. Ñucaca, chairalla viñai huambrami cani. Imagutapash nara yachapanichu.

8Canda servij ñucaca, can agllashca gentecunapaj chaupimi cani. Paicunaca, maitapash na cuentai ushanalla, mashna cajtapash na yachai ushanalla ashtaca gentecunami.

9Chaimanda canda servij ñucamanga, can agllashca gentecunata mandangapaj ali yuyaita charij shunguta carahuayari. Shinallata ima ali cajta, ima nali cajtapash ricushpa alichingapaj yuyaita carahuayari. Cai tucui ashtaca gentecunata mandaitaca, ¿pita ushanga?” nijurcami.

10Salomón chashna mañashcapash, Jatun Diospaj ñaupajpica alimi ricurirca.

11Chaimandami Taita Diosca, cashna nijurca: “Unaita causana punllacunata, charij tucunata, canda fiñajcunata huañuchijuchunga, na mañarcanguichu. Ashtahuangarin imata ninajujtapash, ali uyashpara alichingapaj ali yuyaitami mañarcangui.

12Ricui, shinamandami can mañashcashnallata rurashcani. Ricui, alipacha yachajushca ali yuyaita charij shungutami canman curcani. Chashna alipacha yuyaita charij runaca, cambaj pundapash canshnaca na tiarcachu, cambaj jipamambash canshnaca na tiangachu.

13Shinallata charij tucunata, ninanda alicachi tucunata can na mañajpipash, chaitapashmi cuni. Cambaj tucui causaipica, jatun mandaj puramandaca, maijambash canshnaca na tiangachu.

14Shinallata ñucata na saquishpa, ñuca escribichishca shimicunata, ñuca mandashcacunata, cambaj taita Davidshna cambash cazushpa causajujpica, cambaj causana punllacunatapash mirachishami” nijurcami.

15Salomón rijcharishpaca, muscuitalla muscujushcatami yacharca. Chaimandami Jerusalenman shamushpa, Mandaj Dioshuan ari ninajushcata alichishca arca ñaupajpi shayarirca. Chaipimi, Diosman animalcunata cushpa huañuchishpa tucuillata rupachirca. Dioshuan ali cangapajpashmi, animalcunata carashpa huañuchirca. Jatun micuitapashmi, tucui paita servijcunaman rurarca.

Salomonbaj ali yachaitapash, tucuipi ali llujshishcatapashmi villajun

16Chai punllacunallatami, culquimanda huainayaj ishcai huarmicunaca, jatun mandaj Salomonbaj ñaupajman shamurca.

17Chai huarmicunamandallata shujmi, cashna nijurca:

—¡Aij, ñucata mandajlla! Ñucapash, cai huarmipashmi shuj huasipilla causarcanchi. Ñucaca, paihuan chai huasipillata cashpami, huahuata ungurcani.

18Chai jipami, cashna tucurca: Ñuca ungushca quimsa punlla jipami, paipash ungurca. Chaipica, ñucanchillami ishcandi causarcanchi. Pipash na ashtahuan huasipi carcachu. Ñucanchi ishcaillami huasipi carcanchi.

19Shuj tutami cai huarmipaj huahuaca, paillata llapishpa siririjpi huañushca carca.

20Chaimandami paica, chaupi tuta jatarishpaca, canda servij ñuca puñujujpillata, ñuca huahuata japishpaca, paipaj ladopi churashca carca. Shinallata paipaj huahua huañushcataca, ñuca ladopimi churashca carca.

21Tutamandata ñuca jatarishpa huahuata chuchuchisha yajpica, huañushcami carca. Ña punllayajujpi ricushpaca, na ñuca ungushca huahua cajtami ricurcani— nijurcami.

22Shina nijpimi, caishuj huarmica:

—Na chashnachu, ñuca huahuami causajun. Cambaj huahuami huañushca— nirca.

Shina nijpimi, chaishuj huarmipash:

—Mana chashnachu, cambaj huahuamari huañushca. Ñucapaj huahuami causajun— nirca.

Chashnami, jatun mandajpaj ñaupajpi rimarinajurca.

23Chaimandami jatun mandajca, cashna nijurca: “Cai huarmica: ‘Ñuca huahuami causajun. Cambaj huahuami huañushca’ ninmi. Caishuj huarmipash: ‘Cambaj huahuamari huañushca, ñuca huahuami causajun’ ninmi” nijurcami.

24Chashna nijushpami, jatun mandajca:

—Shuj espadata apamuichi— nirca.

Shina nijpimi shuj espadata, jatun mandajman apamunajurca.

25Ña apamujhuanmi, jatun mandajca cashna nirca:

—Causajuj huahuata chaupipi fitichi. Chashnashpaca chaupitaca caishuj huarmiman, shuj chaupitaca chaishuj huarmiman cuichi— nircami.

26Shina nijpimi, causajuj huahuapaj mamaca, (paipaj huahuamandaca ninanda llaquirishpa, paipaj vijsa ucutapash nanachishpa), jatun mandajtaca cashna nirca:

—¡Aij, ñucata mandajlla, ama huañuchipaichu! Causajuj huahuataca, caishuj huarmiman cupailla— nircami.

Ashtahuangarin chaishuj huarmica:

—Ñucapajpash, cambajpash ama cachun, chaupichunlla— nirca.

27Shina nijpimi jatun mandajca, cashna nirca:

—Causajuj huahuataca, ama huañuchishpa, chai huarmiman cuichilla. Paimi, chai huahuapaj mama— nircami.

28Chai fiñanajuita jatun mandaj alichishcataca, tucui israelcunami yacharca. Imata alichingapajpash, Taita Dios cushca ali yachaita charijta ricushpami Salomondaca manllanajurca.