EZEQUIEL 16 - Quichua Imbabura Bible

Jerusalenbi causajcuna na cazushcatami villajun

1Mandaj Diosca, cai shimicunatami cashna nishpa villahuarca:

2“Huañuna aichayu runa. Jerusalenbi causajcuna millanayaicunata rurashcacunataca, paicunaman ricuchiyari.

3Paicunataca, cashna ningui: Mandaj Jatun Diosca, Jerusalendaca cashnami nin: ‘Can huacharishpa causanaca, Canaán llactami. Cambaj taitaca, amorreo purami carca. Cambaj mamaca, heteo purami carca.

4Can huacharishcamanda parlashpaca, cashnami carca: Can huacharishca punllapica, puputapash na fitircachu. Yacuhuambash na armachircachu, cachihuambash na javichircachu, maituitapash na maiturcachu.

5Can chashna cajpi, llaquishpa imatallapash rurangapaca, pipash na tiarcachu. Ashtahuangarin can huacharishca punllallatami, candaca huañuchumbash yashpa pambapi shitarca.

6Ñucaca, cambaj ladota yalijushpami, yahuarlla, mapa sirijujta ricurcani. Shina yahuarlla cajta ricushpami, candaca: ¡Causari! nircani. Ari, candaca yahuarlla cajta ricushpami: ¡Causari! nircani.

7Candaca, pambapi jihuatashnami mirachircani. Ña viñashpa jatunyashpaca, juyaillagumi tucurcangui. Cambaj chuchucunapash, cambaj ajchapash viñarcami. Ashtahuangarin churajuna illaj, lluchullami carcangui.

8Cutinllata cambaj ladota yalijushpami, candaca ña juyarishpa causanalla cajta ricurcani. Ñuca jahualla churajunahuanmi, can lluchulla cajtaca quilpachircani. Shinami canhuanga, ari ninajushpa juramenturcanchi. Chaimandami, ñucapajlla tucurcangui. Mandaj Jatun Diosmi, chashna nini.

9Candaca, yacuhuanmi armachircani. Yahuarlla cajpipash maillachishpami, aceiteta talishpa javircani.

10Chai jipami, bordashca churajunata churachircani. Chaquipipash, tejón nishca caramanda rurashcatami churachircani. Linomanda rurashcatami chumbilichircani. Sedamanda rurashca churajunatapashmi churachircani.

11Candaca, chai juyaillagucunahuanmi juyaillaguta churachircani. Rigrapica brazaletecunata, cungapica hualcatami huatachircani.

12Cambaj singapipash, punchapamba juyaillagucunatami churachircani. Rinripica, zarcillocunatami churachircani, umapica juyailla diadema nishcagutami churachircani.

13Canga, shinami orohuan, culquihuan juyaillagu tucurcangui. Shinallata ali linota, sedata rurashca juyailla bordashca churajunatami churajurcangui. Micunatapash, ashtahuan ali trigo jacuta, balun mishquita, aceitetami micurcangui. Shinami canga, tucuimanda yali juyaillagupacha tucushpaca, jatun mandajpash tucurcangui.

14Can juyaillagu cashcamandami, cambaj shutica shuj llactacunapipash alicachi tucurca. Ñuca juyaillagu cajta canman cushcamandami, juyaillagupacha carcangui. Mandaj Jatun Dios ñucami, chashna nini.

15Ashtahuangarin canga, juyaillagu cashcatallami yariajlla causarcangui. Canga, maipipash rijsishca cashpami, huainayashpalla causarcangui. Tucui yalijcunahuan huainayashpami, paicunapajlla causarcangui.

16Lomacunapi tiaj altar ladocunapimi, cambaj churajunacunata mandashpa, chaipi huainayarcangui. Ima horapash na chashnapachaca tucushcachu, cutimbash na chashnapacha tucungachu.

17Shinallata ñuca carashca orota, culquita ima juyaillacunatapash japishpami, runaman rijchaj dioscunata rurashpa, paicunahuan huainayarcangui.

18Tauca color cambaj churajunacunatapashmi, paicunaman churachircangui. Ñuca aceitetapash, ñuca inciensotapashmi, paicunapaj ñaupajpi churarcangui.

19Can micuchun ñuca carashca tandatapash, ashtahuan ali jacutapash, aceitetapash, balun mishquitapash, mishquillagu ashnachun rupachingapajmi, paicunapaj ñaupajpi churarcangui. Shinami rurarcangui. Mandaj Jatun Dios ñucami, chashna nini.

20Chashna rurashca jahuami, ñucapajlla cachun can ungushca churicunatapash, ushicunatapash, chai dioscunaman carashpa huañuchishpa tucuchircangui. ¿Can chashna huainayashcapash, imapash na canllu yarcanguichu?

21¿Shina yashpachu, ñuca huahuacunatapash cungata fitishpa huañuchishpa, imamambash chai rijchaj dioscunaman carashpa ninapi rupachircangui?

22Chashna millanayaita rurana, huainayana yuyaicunahuanlla junda cashpami, can chairalla viñajushpa churajuna illaj lluchulla cashcatapash, yahuar quilpashca cashcatapash na yarircangui.

23Cai tucui nalita rurashca jipaca, (¡aij, aij, canga imachari tucungui! Mandaj Jatun Dios ñucami, cashna nini).

24Canga lomacunapipash, tucui plazacunapipashmi, altarcunata rurarcangui.

25Ñan callaricunapipashmi, altarcunata rurarcangui. Chaipimi, can juyailla cashcataca, millanayaita mapayachircangui. Tucui yalijcunataca, canllatami cayajurcangui. Chashnami, ashtahuan ashtahuan huainayashpa catijurcangui.

26Shinallata cambaj ladollapi causanajuj Egipto runacunahuambashmi huainayarcangui. Paicunaca, racu aichata charijcunami carca. Ñucata fiñachingapajmi, ashtahuan huainayashpa catijurcangui.

27Ricui, shinamandami candaca, ñuca maquita chutashpa llaquichircani. Micunatapash imashna cuna cashcamandaca, pishiyachishpami curcani. Canda na ricunayachij filisteocunamanmi, paicuna munashcata imatapash ruranajuchun curcani. Paicunapashmi, can nalita rurashpa causajushcata ricushpaca, pingai tucunajun.

28Huainayanata na amishpami, asiriocunahuambash huainayarcangui. Paicunahuan huainayashpapash, na amircanguichu.

29Shinallata Canaán llactapi causajcunahuambash, caldeocunahuambashmi, ninanda huainayarcangui. Paicunahuan huainayashpapash, napacha amircanguichu.

30¡Pandarijlla shungu cashpami, cai tucui nalicunataca rurarcangui! Culquimanda huainayashpa causaj, na pingaj huarmishnami cai tucuita rurarcangui. Mandaj Jatun Diosmi, chashna nini.

31¡Canga, tucuilla ñan callaricunapipash, tucui plazacunapipashmi altarcunata rurashpa, huainayashpalla causarcangui! Canga culquimanda huainayaj huarmishnallapash na carcanguichu. Chaimandami, can huainayashcamandaca imata japingapajpash, na munarcangui.

32Ashtahuangarin cazarashca jahua shujcunahuan huainayanshnami cusapaj randica, shujcunatara chasquingui.

33Culquimanda huainayashpa causaj huarmicunamanmi, imacunatapash caran. Ashtahuangarin canrami, cambaj juyashcacunaman imacunatapash cararcangui. Shina cajpimi, tucui llactacunamanda cambajman shamushpa huainayanajun.

34Can huainayashpaca, na shuj huarmicunashna culquimanda huainayarcanguichu. Chaimandami, cashna tucurca: Canhuan huainayangapaca, pipash candaca na mascarcachu. Ashtahuangarin huainayashcamanda imatapash can japingapaj randica, paicunamanrami imatapash curcangui. Chaimandami canga, pipash na rurashcata rurarcangui.

35Culquimanda huainayashpa causaj huarmi. Shina cashcamanda, Mandaj Dios ñuca ima nishcata uyahuai.

36Mandaj Jatun Dios ñucami, cashna nini: Canga, na pinganayachishpami, lluchulla tucushpa huainayarcangui. Canga, lluchulla tucushpami, cambaj juyashcacunahuambash, can rurashca millanayai, yanga dioscunahuambash huainayashpa pandarircangui. Cambaj huahuacunapaj yahuartapash, chai dioscunamanmi cararcangui.

37Ricui, chashna rurashcamandami, canhuan cushijushca cambaj tucui juyashcacunatapash, tucui maijandalla can juyashcacunatapash, can na ricunayachishca runacunatapash tandachisha. Shina tandachishpa, cambaj muyundipi churashapmi, cambaj lluchullata ricuchisha. Chashna rurajpimi paicunaca, cambaj tucui lluchullataca ricunajunga.

38Ñucami candaca, cazarashca jahua shujcunahuan causaj huarmicunata, huañuchij huarmicunata, imashna llaquichinata mandashcapi nijunshnallata llaquichisha. Candaca, ñucapajlla causachun munashpami, ninanda fiñarishpa huañuchisha.

39Candaca, paicunapaj maquipimi churasha. Paicunami, yanga dioscunata mañana, lomacunapi huasicunatapash, altarcunatapash urmachinga. Cambaj churajunacunatapash, juyailla huatarinacunatapashmi quichushpa apanga. Candaca, churajuna illaj lluchutallami saquinga.

40Canda llaquichij runacunataca, ashtacatami vichai cachamunajunga. Paicunami candaca, rumicunahuan pegashpa, espadahuan yalijta tujsishpa huañuchinajunga.

41Cambaj huasicunatapash, ninahuanmi rupachinajunga. Ashtaca huarmicuna ricujtami, candaca llaquichinajunga. Shina llaquichishpami, culquimanda huainayanatapash, cambaj juyashcacunaman imatalla caranatapash saquichisha.

42Shina rurashpami, ñuca ninanda fiñarishcataca yalichisha. Ñucapajlla cachun munashpa fiñashcatapash anchuchishami. Chai jipaca, na ashtahuan fiñarishpami samasha.

43Can chairalla viñai cuitsa cashpa, imashna causashcata na yarishpami, cai tucui nalita rurashpa, ñucataca fiñachircangui. Ricui, chashna nalita rurashcamandami, ñucapash candaca ninanda llaquichisha. Canga, nalita rurana munaihuanlla purijushcataca, cunangamambash na yarishcanguichu ningui’ ninmi” nihuarcami Mandaj Jatun Diosca.

44“Ricui, candaca yarichina shimicunata tucui rimajcunami, cai yarichina shimicunahuan cashna ninajunga: ‘Mama chashna cajpica, ushipash mamashnallatami canga’ ninajungami.

45Canga, cusatapash, huahuacunatapash jichushpa causajuj huarmipaj ushimi cangui. Canga, cusatapash, huahuacunatapash jichushpa causajuj huarmicunapaj ñañami cangui. Cambaj mamaca, heteo purami carca. Cambaj taitaca, amorreo purami carca.

46Cambaj paya ñañaca, Samaria pueblomi. Paica, paipaj ushicunandimi, jahua ladoman causajun. Cambaj jipa ñañaca, Sodoma shuti pueblomi. Paica, paipaj ushicunandimi, ura ladoman causajun.

47Shina cajpipash canga, na paicuna nali, millanayaita rurashcatalla catishpa rurajurcanguichu. Ashtahuangarin chai rurashcacunapash, na imapash cajpishnami, tucui imatalla ruranacunapipash ashtahuan yali jatun nalita rurashpa causarcangui.

48Mandaj Jatun Dios ñucaca causajunipachami. Ñucami cashna nini: Cambaj ñaña Sodoma shuti pueblopash, paipaj ushicunapash, canhuan cambaj ushicunahuan rurashcashnapachaca na rurashachu.

49Ricui, cambaj ñaña Sodoma jatun nalita rurashcacunaca, caicunami: Jariyashpami jatun tucurca, micunatapash ashtacatami charirca. Paica, paipaj ushicunandi, ninan quillacunami carca. Shina cashpami llaquichi tucushpa causajcunatapash, na shinllichishpa imagupash illajcunatapash, na ayudanajurca.

50Paicunaca jariyashpa jatun tucushpami, ñuca ñaupajpica millanayaicunata ruranajurca. Chaita ricushpami, paicunataca anchuchircani.

51Samaria puebloca, can rurashca juchacunamandaca, chaupitallapash na rurarcachu. Canga, paicunatapash ashtahuan yali millanayaitami rurarcangui. Canga, millanayai tucui juchacunata rurashpami, cambaj ñañacunataca, imatapash cashcatapacha rurashcatashna saquishcangui.

52Canga, cambaj ñañacunataca ricuriashpami nalicachircangui. Shina cashpapash canga, paicunatapash yali millanayai juchacunata rurashcamandami, pingai tucuna cangui. Cambaj juchacunahuan chimbapurajpica, cambaj ñañacunapaj juchacunaca, imapash na cashcashnallami ricurin. Cambash pingai tucuyari, cambash llaquita apairi. Canga, cambaj ñañacunataca, imatapash cashcatapacha rurashcatashnami saquishcangui.

53Prezu apai tucushcacunataca, ñucami tigrachimusha. Sodoma shuti pueblotaca, paipaj ushicunandi, Samaria pueblotapash paipaj ushicunandimi tigrachimusha. Prezu apai tucushcacunataca, prezu apai tucushca purami tigrachimusha.

54Chai tucui nalicunata rurashpa, paicunata cushichishpami, cambash pandachi tucushpa llaquita apashpa, pingai tucungui.

55Sodoma shuti, Samaria shuti cambaj ñañacunaca, paipaj ushicunandimi, punda imashna cashcashnallata tucunga. Cambash, cambaj ushicunandimi, punda imashna cashcashnallata tucunguichi.

56Can jariyashpa causajui punllacunapica, cambaj ñaña Sodoma shuti pueblotaca nalicachishpami rimajurcangui. Chashnaca na rimanachu carcangui.

57Can jatun nalita rurashcacunata nara ricuchijpimi, chashna carcangui. Cunanga, cambash ñami Siria llactapi, Filistea llactapi causajcunapaj llaquitallata apajungui. Paicunaca, tucui maipipash cangunataca, yangapimi churanajun.

58Canga, nalita rurana munaihuanlla cashpa, millanayaita rurashpa causajushcamandaca, llaquita apanapachami cangui” ninmi Mandaj Diosca.

59Ashtahuangarin Mandaj Jatun Diosca, cashnatapashmi nin: “¿Ari ninajushpa juramentushcata can na cazushpa yangapi churashcashnachu, ñucapash canhuanga rurasha?

60Ashtahuangarin can chairalla viñai cashca punllacunapi, ari ninajushcatapash yarijushallami. Canhuanga, causaita causaicaman ari nishpami callarichisha.

61Cambaj punda ñañacunata, jipa ñañacunataca, cambaj ushicunashna cachun ñuca canman cujpi chasquishpami, can imashna causajushcata yarishpa pingai tucungui. Ashtahuangarin canhuan ari nishcamandaca na cushachu.

62Ashtahuangarin ñuca, canhuan ari nijushcata pactachingapajmi, paicunataca canman cusha. Shina rurajpimi ñucataca, Mandaj Dios cajta yachangui.

63Chaita yarishpa pingai tucuchunmi, chashna rurasha. Tucui imatalla can rurashcacunata ñuca cungajpi, pingai tucushpa cutinga ama rimachunmi, chashna rurasha” ninmi Mandaj Jatun Diosca.