Psalms 35 - Quichua Imbabura Bible

Fiñajcunapaj maquimanda quishpichihuai nishpa mañashcamiDavid rurashca Salmomi.

1Mandaj Dioslla, ñucata fiñashpa

rimajcunahuan chimbapura shayaripairi.

Ñucahuan macanajujcunahuan macanajupairi.

2Jarcarina jatun escudotapash,

uchilla escudotapash japishpa,

ñucata ayudangapaj jataripairi.

3Ñucata catiriashpa llaquichijcunataca,

cambaj lanzata japishpa tuparipairi.

Ñuca almataca: “Ñucami, canda

quishpichij cani” nipairi.

4Ñucata huañuchingapaj munajcunaca,

pingai tucushpa muspachi tucushca cachun.

Ñucata nalita rurachingapaj munajcunaca,

pingai tucushpa huashaman tigrachi tucushca cachun.

5Huaira apanalla jupashna cachun, Mandaj Diospaj

angelpash llaquichingapaj catiriajuchunlla.

6Paicunapaj ñanga yana yanapash, lluchashpa

urmanallapash cachun.

Mandaj Diospaj angelpash, catiriashpa llaquichijuchunlla.

7Ima nalitapash na rurajpitami,

utujupi linllita pacalla ñucaman churanajurca.

Yangamandami, ñucaman utujuta ruranajurca.

8Paicunataca na yachajta, llaqui

japishpami ali canman.

Paicuna pacalla churashca linllillata

japishpaca, alimi canman.

Chai linllipica, llaquita apangapaj urmachun.

9Chashna rurajpica ñuca almaca,

Mandaj Dioshuanmi cushijunga.

Pai quishpichijpimi cushijusha.

10Tucui ñuca tullucunapashmi,

cashna ninajunga: “Mandaj Dioslla,

¿pita canshnaca tiangayari?

Canga, llaquichi tucujtaca,

paita yali ashtahuan shinlli runa

llaquichijujmanda cacharichijmi cangui.

Imagutapash na charij, imagupash illajcunata

quichuj runapaj maquimanda quishpichijmi

cangui” nijushami.

11Llullashpa juchachij, nalita ruraj runacuna

jatarishpami, ñuca na yachashcata tapuchinajuhuan.

12Paicunaca, ñuca almata llaquichingapajmi,

alita rurashcamandaca, llaquita tigrachinajuhuan.

13Shina cajpipash, paicuna ungushca cajpica,

ñucaca cañamutami churajurcani.

Tucui almahuan ninanda llaquirishpami,

micuitapash na micushpa ñuca shungupi mañajurcanilla.

14Ñuca cumbamandashna, ñuca

huauquimandashnami purijurca.

Mama huañujpi yanata churajushpa,

purinshnami yanata churajushpa, pingai tucujurcani.

15Ashtahuangarin paicunaca, llaquita ñuca

apajujpica, cushijushpami tandanajurca.

Ñucata fiñaj, na rijsishca gentecunashnami tandanajurca.

Imamanda chashna rurajtapash na yacharcanichu.

Chai runacunami, ñucataca fitishpa

tucuchinshna, na samashpa llaquichihuarca.

16Uyanayaita llullashpa parlajcunashna,

na cazushpa asijcunashna umachijcunashnami,

quirutapash canirishpa ñucataca fiñahuarca.

17Jatun Dioslla, ¿ima horascamanda

caitaca ricujugringuilla?

Ñuca causaita tucuchigrinajuj leongunapaj

shimimanda, ñuca almata quishpichihuayari.

18Candaca, jatun tandanajuipimi villajusha.

Candaca, tauca gentecunapaj chaupipimi alicachijusha.

19Yangamanda ñucata fiñajcunaca, ama cushijunajuchun.

Yangamanda na ricunayachij runacunaca, ama

ñavita capitsinajuchun.

20Paicunaca, casilla ali causaimandaca, na parlanllu.

Llactapi na jariyashpa causajcunata,

fiñashpa umachishpa villanatami yarinajun.

21Shimi cacharishcata rimashpami, ñucataca:

“¡Jajai, ñucanchi ñavihuambachamari

ricushcanchi!” ninajun.

22Mandaj Dioslla, canllata ricushcanguimi,

ama upalla ricuhuaichu.

Jatun Dioslla, ñucamanda ama caruyapaichu.

23Ñuca Taita Dioslla, ñucata Mandajlla,

ñucaman imatapash cashcatapacha rurangapaj,

rijcharishpa shayaripairi.

Imamanda llaquichinajujtapash, mitsashpa ayudahuayari.

24Ñucata Mandaj Taita Dioslla.

Canga, imatapash cashcatapacha imashna

rurajunshnallata ricushpa mitsahuayari.

Ñucata ricushpa cushijunajuchunga, ama saquipaichu.

25Paicunapaj shungupica: “¡Jajai, ñucanchica

chashna tucuchunmi munarcanchi, paitaca

langashcanchimi!” ninajuchunga, ama saquipaichu.

26Ñucata llaqui japijpi cushijujcunaca,

pingai tucushpa, muspachi tucushca cachun.

Ñucata fiñashpa jariyajcunaca, pinganayai

churajunata churajunshna muspachi tucushca cachun.

27Ashtahuangarin chashnallata rurana cashcamanda

ñucata mitsajcunaca cushijunajuchun, candanajuchun.

Paicunaca, tucui causaipi cashna ninajuchun:

“Mandaj Diosca, jatunyachi tucushca cachun.

Paica, paita servijtaca aliguta casilla

causachunmi munan” ninajuchun.

28Ñuca jalluhuanga, imatapash cashcatapacha

can rurashcatami villajusha.

Tucui punllacunami, candaca alicachijusha.