MATEO 26 - Quichua Imbabura Bible

Jesusta japishpa huañuchingapajmi parlarinajushca(Mar. 14:1-2; Luc. 22:1-2; Juan 11:45-53)

1Cai tucuita villajushca jipami Jesusca, paipaj yachajujcunaman cashna nirca:

2—Pascua fiesta punlla chayangapaca, ishcai punllalla tiajtaca, cangunallata yachanguichimi. Chai punllapimi, Runa Aichayu tucushca ñucataca, cruzpi chacatashpa huañuchinajuchun japichihuanga— nircami.

3Chashna nijujpica, chai punllallatami curacunata mandajcunandi, mandashca shimita yachachijcunandi, israelcunata mandaj rucucunandi, curacunata mandaj Caifás mandashpa tiaj huasi patiopi tandanajurca.

4Paicunaca, Jesusta imashna umachishpa japishpa huañuchingapajmi parlarinajurca.

5Shina parlarishpapash: “Gentecuna jatarishpa, ñucanchita ama imatapash nishpa juchachinajuchunga, fiesta punllacuna yalijpirami japina canchi” ninajurcami.

Betania pueblopimi Jesustaca, mishquillagu ashnajuj jambihuan talishpa javishca(Mar. 14:3-9; Juan 12:1-8)

6Jesusca, Betania pueblopimi lepra ung:uihuan huañujushca Simonbaj huasipi carca.

7Chaipi cajpimi shuj huarmica, ashtaca valishca mishquillagu ashnajuj jambiguta, alabastro nishcamanda rurashca uchilla fundugupi apashpa, Jesuspajman chayamurca. Chai huarmica, Jesús micushpa tiajujpimi, chai mishquillagu ashnajujta umapi talishpa javirca.

8Chaita paipaj yachajujcuna ricushpami, ninanda fiñashpa cashna ninajurca:

—¿Imashpata chai huarmica, chashna yanga tucuchijunyari?

9Chai mishquillagu ashnajujtaca, ashtaca culquipaj jatushpa, imagutapash na charijcunaman carashpachari ali canman carca— ninajurcami.

10Chashna ninajujta uyashpami Jesusca, paipaj yachajujcunata cashna nirca:

—¿Imashpata cai huarmitaca nalicachinguichi? Ñucapaj ali cachunmi, cashna aliguta rurashca.

11Imagutapash na charijcunaca tiangallami. Ashtahuangarin ñucami, cangunahuanga na unaicaman caipi casha.

12Cai huarmica, ñuca huañushpa pambai tucunalla cachunmi, cai mishquillagu ashnajujtaca, ñucapi talishpa javingapaj shamushca.

13Na llullashpami, cangunataca cashna nini: Cai pachapica, maipi cashpapash cai ali villaita villajushpaca, cai huarmita yarichumbashmi, pai imata rurashcatapacha villanga— nircami.

Jesustaca, Judas runami japichishallami nishca(Mar. 14:10-11; Luc. 22:3-6)

14Chai jipami, Jesuspaj chunga ishcai yachajuj puramanda shuj, Judas Iscariote shuti runaca, curacunata mandajcunapajman rirca.

15Paimi, chai curacunataca cashna nirca: “Cangunaman Jesusta ñuca japishpa cujpica, ¿imatashi cuhuanguichiman?” nircami. Shina nijpimi paicunaca, quimsa chunga culquigutami cupashun ninajurca.

16Chai horasmandami Jesustaca, imashna japichi ushanata yarishpa, Judas runaca purijurca.

Apunchi Jesusca, pai huañunata yarishpa micuchunmi callarichishca(Mar. 14:12-25; Luc. 22:7-23; Juan 13:21-30; 1 Cor. 11:23-26)

17Levadura illaj tandata micuna callari fiesta punllapimi, Jesuspaj yachajujcunaca paipajman quimirishpa, cashna tapurca:

—Pascua punllapi cushijushpa can micuchunga, ¿maipita alichinajuchun munangui?— ninajurcami.

18Shina nijpimi Jesusca, paicunata cashna nirca:

—Jerusalén puebloman ripaichi. Chaipica, shuj runagupaj huasiman chayashpa, cashna ninguichi: ‘Ñucanchita Yachachijmi: Ñuca huañuna punllami ña chayamujun. Chaimandami, pascua punllapi cushijushpa micunata, cambaj huasigupi ñuca yachajujcunahuan micungapaj munani nijun’ ninguichi— nishpami cacharca.

19Jesús mandashcashna rurashpami paipaj yachajujcunaca, pascua punllapi cushijushpa micunata micungapaj alichinajurca.

20Ña tutayajpimi Jesusca, paipaj chunga ishcai yachajujcunahuan micungapaj tiarirca.

21Ña tianajushpami Jesusca, paicunata cashna nirca:

—Na llullashpami, cangunataca cashna nini: Canguna purapi tiajujllatami, ñucataca huañuchijcunaman japichigrihuan— nircami.

22Shina nijpimi ninandapacha llaquirishpa:

—¿Ñucachu candaca japichina capani, Apunchi Jesús?— nishpa, paipaj yachajujcunaca shuj, shuj tapui callarirca.

23Shina tapujpimi Jesusca, paicunataca cashna nirca:

—Ñucahuan cai platopillata maquita satishpa micujujmi, ñucataca japichigrihuan.

24Escribishcapi nijunshnami, Runa Aichayu tucushca ñucataca huañuchinajunga. Runa Aichayu tucushca ñucata japichij runaca, ¡aij imachari tucunga! Chai runaca, na huacharishca cashpachari, ali canman carca— nircami.

25Shina nijpimi:

—Yachachij, candaca ¿ñucachu japichina capani?— nishpa, Jesusta japichigrijuj Judas shuti runaca tapurca.

Shina tapujpimi, Jesusca:

—Canllatami chashna nishcangui— nirca.

26Ña micunajushpami, Jesusca tandata japishpa, Diosta pashi nirca. Chai tandata chaupishpa, paipaj yachajujcunaman carashpaca:

—Japishpa micuichi. Caica ñuca cuerpomi— nircami.

27Shinallata copatapash japishpami, Taita Diosta pashi nishca jipaca, cashna nishpa curca:

—Cai copamandaca, tucuicuna ufiachi.

28Caica, ashtaca gentecunapaj juchacunata anchuchingapaj, jicharina ñuca yahuarmi. Caihuanmi Taita Diosca, gentecunahuan shuj mushujta ari nishcata pactachigrin.

29Cangunataca, cashnami nini: Cai uvas vinotaca, cunanmandapacha cutinga na ufiashachu. Ñuca Taita mandajuj llactapi cangunahuan tiajushpami, shuj mushuj vinotaca ufiashun— nircami.

Pedroca, ñucataca na rijsinichu nihuangami nishpami Jesusca villashca(Mar. 14:26-31; Luc. 22:31-34; Juan 13:36-38)

30Paicunaca, candanaguta candashca jipami, Olivos shuti urcuman rinajurca.

31Shina rinajushpami Jesusca, paipaj yachajujcunata cashna nirca:

—Cunan tutallatami tucui cangunaca, ñucata na crishpa pandaringuichi. Escribishcapica, cashnami nijun: ‘Michijtaca chugrichishami. Shinamandami llamacunaca, caita chaita calpanga’ nijunmi.

32Ashtahuangarin ñuca causarishpami, cangunata ñaupashpa Galilea llactaman risha— nircami.

33Shina nijpimi Pedroca, cashna nirca:

—Caishujcuna canda na crishpa tucuilla pandarinajujpipash, ñucaca napacha pandarishachu— nircami.

34Shina nijpimi Jesusca, cashna nirca:

—Na llullashpami, candaca cashna nini: Cunan tutallatami, gallo nara candajpillata, ñucataca na rijsinichu nishpa, quimsacaman nigringui— nircami.

35Shina nijpimi Pedroca, cashna nirca:

—Canhuan huañuchi tucunapacha cashpapash, na rijsinichutaca napacha nishachu— nircami.

Caishuj yachajujcunapash, tucuillami chashnallata ninajurca.

Getsemaní shuti huertapimi, Jesusca Diosta mañashca(Mar. 14:32-42; Luc. 22:39-46)

36Getsemaní shuti pushtumanmi Jesusca, paipaj yachajujcunandi chayagrirca. Chaiman chayashpaca, cashna nirca:

—Chaipi Diosta ñuca mañagringacaman cangunaca, caipi tianajuichilla— nircami.

37Shina nishpallami Pedrotapash, Zebedeo shuti runagupaj ishcai churitapash, Jesusca pushashpa rirca. Ña rijushpami, ninan llaqui japijpi ninandapacha llaquirirca.

38Shinamandami Jesusca, paicunata cashna nirca:

—Ñuca almapimi, huañungashna ninanda llaquirini. Cangunaca, ñucashnalla ama puñushpa, caipi shuyanajuichilla— nircami.

39Shina nishpaca, ashaguta rishpallami, alpapi cungurishpa, Diostaca cashna nishpa mañarca:

—Ñuca Taitalla, cai copata ufianshna cai llaquita imashnallapash na apashpa yalinalla cajpica, yalichihuailla. Ashtahuangarin ama ñuca munashcata rurapaichu, cambaj munaita pactachipai— nircami.

40Chai jipalla, paipaj yachajujcunapajman tigramushpaca, puñunajujtami japij shamurca. Chaimandami Pedrotaca, cashna nirca:

—Shuj horasta ñucahuan rijchariajuitaca, ¿nachu usharcangui?

41Cangunata imapash nalita rurana munai ama japij shamuchunga, rijchariashpa Diosta mañaichi. Cangunapaj espirituca, Diosta mañangapaj munanmi. Ashtahuangarin cangunapaj cuerpomi shaijunlla— nircami.

42Jesusca, cutin tigrashpami:

—Ñuca Taitalla, cai copata ufianshna cai llaquita apanapacha cajpica, can munashcata pactachipailla— nishpa, caihuanga ishcaicaman mañarca.

43Shina mañashpa tigramushpaca, cutin puñunajujtami paipaj yachajujcunataca, japij shamurca. Paicunaca, ninan puñuihuan cashpami, ñavita pascaitapash na ushanajurca.

44Jesusca, paicunata saquishpa cutin rishpami, pundalla ima nishpa mañashcashnallata mañajurca. Chaihuanga, ña quimsacamanmi mañarca.

45Jesusca, paipaj yachajujcunapajman tigramushpami, cashna nirca:

—Cunanga, ña puñushpa samaichilla. Ricuichi, ñuca japi tucuna horasca, ñami chayamushca. Runa Aichayu tucushca ñucami, juchayu runacunapaj maquipi churai tucugrini.

46Ricuichi, ñucata japichij runaca, ñami chayamujun. Jatarishpa, ucha jacuchi— nircami.

Jesusta prezu apashcatami villajun(Mar. 14:43-50; Luc. 22:47-53; Juan 18:2-11)

47Chashna nijujhuanmi Judas runaca, Jesuspajman ñapash chayamurca. Paica, Jesuspaj chunga ishcai yachajuj purami carca. Paihuanga, ashtaca gentecunami espadacunahuan, caspicunahuan shamurca. Chai runacunaca, curacunata mandajcuna, israelcunata mandaj rucucuna cachamujpimi shamunajurca.

48Jesusta japichingapaj shamujuj Judas runami, paihuan shamunajuj runacunataca, cashna nishpa yachachishcalla carca:

—Maijandami ñuca muchani, chaita prezu japishpa apanguichi— nishcami carca.

49Jesuspajman, Judas runa ñapash quimirimushpaca:

—¿Alillachu capangui, Yachachij?— nishpallami mucharca.

50Shina muchajpimi:

—Cumba runa canga, ¿imapajta shamungui?— nishpa, Jesusca tapurca.

Shina tapujhuanmi Jesustaca, ñapash chai runacuna prezu japirca.

51Ashtahuangarin Jesushuan shayanajuj puramanda shuj runaca, ñapashmi espadata surcurca. Shina surcushpami, curacunata mandajta servijtaca, rinripi muchurijta huactarca.

52Shina muchujpimi Jesusca, chai runataca cashna nirca:

—Cambaj espadataca, maipi tiajushcapillata churai. Espadahuan macanajujcunaca, espadahuanllatami huañuchi tucunajunga.

53Ñuca Taitata mañajpica, huaranga huaranga angelcunatami, ñucata mitsachun cunanllata cachamunman. Chaitaca, ¿nachu yachangui?

54Ashtahuangarin angelcunata cachamujpica, Dios escribichishca Shimipi cashna japi tucunapachami nishpa villajujca, ¿imashnashi pactanman?— nircami.

55Chaipillatami, paita japingapaj shamushca runacunata Jesusca, cashna nijurca:

—¿Shuhuatashnachu japingapaj cangunaca espadacunahuan, caspicunahuan shamunguichi? Punllandimi, Diospaj huasi ucupica, cangunapash ricujta yachachishpa tiajurcani. Chaipica, na japishpa saquircanguichillami.

56Ashtahuangarin Dios ima nishcata villajcunaman, Diosllata escribichishca Shimipi nijushca pactachunmi, cangunaca cashna japingapaj shamushcanguichi— nijurcami.

Chaipimi Jesuspaj yachajujcunaca, paitalla saquishpa, tucuilla pacajushpa calpanajurca.

Mandaj puralla tandanajushcapaj ñaupajmanmi, Jesusta apashca(Mar. 14:53-65; Luc. 22:54,63-71; Juan 18:12-14,19-24)

57Jesusta prezu japishpaca, curacunata mandaj Caifás shuti curapajmanmi aparca. Chaipimi, mandashca shimita yachachijcunapash, mandaj rucucunapash, tandanajushca tianajurca.

58Ashtahuangarin Pedroca, Jesusta apajujpica caru carulla catishpami, curacunata mandajpaj huasi patiocaman rirca. Chaiman yaicushpaca, Jesusta imata rurajtapash ricungapajmi, chai huasita cuidajcunahuan tiajurca.

59Chaipica, curacunata mandajcuna, mandaj rucucuna, mandaj puralla tandanajuj runacunami tianajurca. Paicunaca, Jesusta huañuchingapaj nishpami, llullashpa villajcunata mascanajurca.

60Ashtaca runacuna Jesusmanda llullashpa villanajujpipash, nalita rurashcataca na tarircachu. Ashtahuangarin chai jipaca, ishcaipura runacunami, Jesusmandaca llullashpa villangapaj chayamurca.

61Paicunami cashna ninajurca:

—Cai runaca: ‘Taita Diospaj huasita urmachishpapash, quimsa punllapilla cutin shayachi ushashallami’ nirca— ninajurcami.

62Shina ninajujpimi, curacunata mandaj jatarishpaca:

—Caicuna canda cashna ninanda juchachinajujpipash, ¿nachu imatallapash tigrachina cangui?— nircami.

63Ashtahuangarin Jesusca, upalla shayajurcallami. Shinamandami chai curacunata mandajca, cashna tapurca:

—Causajujlla Taita Diospash ricujunmi. Ama llullashpa, juramentushpa villailla. Canga, ¿Taita Diospaj Churi, Quishpichij Cristochu cangui?— nircami.

64Shina nijpimi Jesusca, cashna nirca:

—Canmi cashna nishcangui: Cashnatapashmi, cangunataca nini: Runa Aichayu tucushca ñucataca, ninan ushaita charij Taita Diospaj ali lado maquiman tiajujtami, cangunaca ricuhuanguichi. Shinallata jahua pachamanda fuyupi shamujtapashmi ricuhuanguichi— nircami.

65Shina nijpimi, curacunata mandajca ninanda fiñarishpa, paipaj churajushcataca liquishpa, cashna nirca:

—¡Diostami nali shimicunata rimashca! Shujcuna paimanda villachunga, ¿pitapash tapunarachu canchi? Pai imata nirijujtapash, cunan cangunallata ña uyanguichimi.

66Cangunaca, ¿ima ninguichita?— nishpami tapurca.

Shina tapujpimi:

—Chai runaca nali cashcamandaca, huañunapachami— nishpa, paicunaca tigrachirca.

67Chashna nishpallami Jesustaca, ñavipi t'ucashpa huactanajurca. Huaquingunaca, lado ñavipi huactashpami,

68cashna ninajurca:

—Quishpichij Cristo cashpaca, yachayari. ¿Candaca, maijanda huactarcanchi?— nishpa tapunajurca.

Pedroca, Jesusta na rijsinichu nishcami(Mar. 14:66-72; Luc. 22:56-62; Juan 18:15-18,25-27)

69Pedroca, huasi canlla patiopi tiajujpimi, shuj servij cuitsa quimirishpa cashna nirca:

—Cambashmari, Galilea llactamanda Jesushuan purijurcangui— nircami.

70Ashtahuangarin paica na rijsinichu nishpami, tucuicunapaj ñaupajpi cashna nirca:

—Can imata nijutapash na yachanichu— nircami.

71Shina nishpalla ñan punguman chayajujpimi Pedrotaca, shuj cuitsapash ricurca. Chai cuitsami:

—Cai runapashmari, Nazaret pueblomanda Jesushuan purijurca— nishpa, chaipi shayanajujcunaman villajurca.

72Ashtahuangarin Pedroca, cutinmi:

—Chai runataca, rijsitapash na rijsinichu— nishpa juramenturca.

73Chai jipallmi, chai shayanajuj puracunamanda Pedropajman quimirishpa, cashna ninajurca:

—Cambash, chai runata catij purallatami cangui. Can chaipura cajtaca, cambaj rimaipillatamari rijsinchi— ninajurcami.

74Shina nijpimi:

—Chai runataca, rijsitapash na rijsinichu— nishpa, ninanda nalicachishpa juramentui callarirca.

Shina nijujhuanmi, galloca candarca.

75Shinamandami Pedroca, Jesús villashca shimicunata yarirca. Jesusca, cashnami nishca carca: “Narapash gallo candajpillatami, canga ñucataca quimsacaman na rijsinichu nihuangui” nishcami carca. Chaita yarishpami Pedroca, canllaman llujshishpa ninandapacha llaquirishpa huacarca.