ROMANOS 6 - Quichua Imbabura Bible

Juchapaca, huañushca cajtami villajun

1Shina cajpica, ¿imatata nina canchi? Dios ashtahuan ninanda juyachunga, ¿juchatachu ashtahuan rurashpa catina canchi?

2Napacha shinachu. Ashtahuangarin juchata ama ashtahuan rurangapaj huañushcashna cashpaca, ¿imashnata ashtahuanga chai juchatallata rurashpa causashunchiyari?

3Cristo Jesushuan shujlla tucungapaj bautizai tucushcacunaca, pai huañushcashna causangapajmi bautizarircanchi. Chaitaca, ¿nachu yachanguichi?

4Bautizarishpaca, Cristohuan huañushcashna causangapajmi, paihuanllata pambai tucurcanchi. Cristotaca, huañushcacunapaj chaupimandami paipaj Taitaca, paipaj punchapambahuan causachirca. Chashnallata ñucanchipash mushuj causaipi causangapajmi, pambai tucurcanchi.

5Imashnami Cristohuan huañushcashna cashpa paihuan pambai tucurcanchi, chashnallatami pai causarishcashna ñucanchipash causarina canchi.

6Cashnatami yachanchi: Ñucanchita juchata rurachun punda nalita yarichijuj munaicunaca, Cristohuan cruzpi chacatai tucujpimi, tucurishca. Shina cashpami, juchataca na ashtahuan servinajunchi.

7Ashtahuangarin maijan cashpapash Cristohuan huañushcashna cashpaca, jucha nalita rurachijujmandaca imatapash cashcatapacha rurashcashna chasqui tucushcami.

8Cristohuan huañushcashna cashpami, paihuan causagrinatapash crinchi.

9Huañushcacunapaj chaupimandami, Cristoca causarirca. Cutinga na huañunatami, paitaca yachanchi. Huañuica, cutinga na paitaca mandashpa charijunllu.

10Paica, tucuicunapaj juchamandami shuj viajella huañurca. Ashtahuangarin causarishpaca, Taita Diospajllami causajun.

11Chaimandami cangunapash, cashna yarina canguichi: Juchata ama rurangapaca, huañushcashnami canchi. Ashtahuangarin ñucanchi Apunchi Cristo Jesusmandaca, Taita Diospajlla causaj cashcatami yarina canchi.

12Shina cashpami, cangunapaj huañunalla cuerpopi jucha mandachunga, napacha saquina canguichi. Nali munaicuna yarichijujtapash, napacha cazunachu canguichi.

13Shinallata cangunapaj cuerpopi tucui tiajtapash na juchaman saquinachu canguichi. Ashtahuangarin huañushcacunapaj chaupimanda causarishcashna cashpami, Taita Diospaj cachun cangunallata cuna canguichi. Cangunapaj cuerpopi ima tiajtaca, imatapash cashcatapacha rurachunmi, Taita Diosman saquina canguichi.

14Shina rurajpimi juchaca, na ashtahuan mandashpa chari ushanga. Cangunaca, mandashca shimicuna mandajpica, na causanajunguichichu. Ashtahuangarin Dios ninanda juyajujpimi causanajunguichi.

Imatapash cashcatapacha rurajcunami canguichi nishcami

15Dios ninanda juyajujpimi, mandashca shimicunaca na ashtahuan mandai ushan. Shina cashpaca, ¿juchata rurashpa catinallachu canchi? Napacha shinachu.

16Maijambaj gañan tucushpaca, ¿nachu paita cazungapaj gañan tucunguichi? Chaitaca, ¿nachu yachanguichi? Shinallatami maijanda cazushpa causajushpapash, chaipaj gañan canguichi. Jucha mandajujtara gañanshna cazushpaca, huañushpa chingagrinami canguichi. Ashtahuangarin Diosta cazujushpaca, imatapash cashcatapachami ruranajunguichi.

17Ashtahuangarin Taita Diostami, pashi nini. Cangunaca, gañanshna juchatara cazushpa punda causashca cashpapash, Diosmanda yachachijujta tucui shunguhuan chasquishpami cazunajunguichi.

18Shinamandami, juchata rurashpa causajujmandaca Dios cacharichijpi, imatapash cashcatapacha rurajcuna tucushcanguichi.

19Cangunaca, runa cashcamanda nara shinlli cajpimi, ñucapash runashnallata parlajuni. Pundaca nalita rurangapajmi, cangunapaj cuerpopi ima tiajtapash, mapatalla rurashpa nalita rurachun saquircanguichi. Chashnallatami cunanga, Diospajlla causangapaj cangunapaj cuerpopi ima tiajtapash, imatapash cashcatapacha rurashpa servingapaj cuna canguichi.

20Juchapaj gañan cashpami, imatapash cashcatapacha ruranamanda cacharishcami causarcanguichi.

21¿Shina causashpaca, ima alitata japircanguichi? Cunambica, chaita yarishpami pingai tucunguichi. Chai rurashcacunaca, huañuimanmi apajurca.

22Ashtahuangarin juchata rurashpa causajujmanda Dios cangunata cacharishcamandaca, cunanga Taita Diostalla servijcunami tucurcanguichi. Shina tucushpami, grano fucunshna Diospajlla causanata japircanguichi. Chaita japijushcamandaca, causaita causagrinatami charinguichi.

23Juchata rurashpa causajcunamanga, huañushpa chingagrinatami cujun. Ashtahuangarin ñucanchi Apunchi Cristo Jesusmandami, causaita causagrinata Taita Diosca yanga caramujun.