1Shina cajpipash, punda ari nishpapash, Diosta mañashpa paipajta mañanatami mandashca. Shinallata cai pachapipashmi, Diospajlla huasita charishca.
2Diospaj jatun carpataca, cashnami rurashca cashca: Punda ucuca, Diospajlla ucumi cashca. Chaipica, candelero nishcapash, Diosman shicanyachishca tandacunata churana mezapashmi tiajushca.
3Chaipaj cati, telahuan quilpashca huasha ucupica, jatun carpapillatami, Diospajlla shicanyachishca ucu tiashca.
4Chai ucupica, inciensota cushnichina oro altarpash, Dioshuan ari ninajushpa escribishcata alichina, muyundita orohuan quilpashca arcapashmi tiajushca. Chai arcapica, maná shuti micunata alichishca tiajuj oro mangapash, Aarón charishca cutin verdella viñashca varapash, Dioshuan ari ninajushcata escribishca tabla rumicunapashmi tianajushca.
5Chai arca jahuapica, punchapamba querubín nishcacunami, juchacunata Dios anchuchijujta ricuchishpa, alascunahuan quilpashca tianajushca. Chaicunamandaca cunambica na callarishpa, tucuita parlanata charinichu.
6Diospaj jatun carpa callari ucupi chashna tucuita alichishca tiajujpimi curacunaca, Diosta yaringapaj punllandi imatalla ruranacunata rurangapaj yaicunajun.
7Ashtahuangarin curacunata mandaj curallami, huatapi shuj viajella cati ucuman yaicuita ushan. Chaimanmi, paipaj juchacunamandapash, gentecuna na yachaimanda rurashca juchacunamandapash, animalcunapaj yahuarta Diosman cungapaj apashpa yaicun.
8Chaicunahuanga, Diospaj jatun carpapica, punda ucuman yaicushpa imata rurangapajpash, Diospajlla shicanyachishca ucuman yaicunataca, nara ricuchishcatami, Diospaj jucha illaj Espirituca yachachijun.
9Chaicunaca, cunambi chimbapurashpa yachajunatami ricuchijun. Diosman imatapash carashpa, Diosman animalcunatapash carashpami huañuchinajun. Diosta mañashpa imata rurashcapash, paicunapaj shungu alitalla yarichunga, napacha alichi ushanllu.
10Chai mandashcacunaca imata micunata, ufianata, imashnalla mapa illaj tucunata, cuerpopi mapayashca cashpa, imacunatalla rurachun mandanacunatallami villajun. Chaicunata ruranataca, Dios mushujta pactachina punllacamanllami charirca.
11Ashtahuangarin Cristoca, ñamari shamushca. Paimi, curacunata mandaj cashpa, imatapash aliguta carangapaj apamushca. Diospaj jatun carpaca, punda tiashcatapash yali ashtahuan jatunmi, ashtahuan juyaillagumi. Chai carpataca, na runacuna rurashca cajpimi, na cai pachapi tiajun.
12Cristoca, causaita causaicaman quishpichinata japishpami, Diospajlla shicanyachishca ucuman shuj viajella yaicurca. Paica, na jari chivocunapaj, shicucunapaj yahuarta apashpa yaicurcachu. Ashtahuangarin paipaj yahuarhuambachami yaicurca.
13Jari huagracunapaj, jari chivocunapaj yahuartapash, huarmi shicuta rupachishca uchufatapash, mapata ruraj gentecunapajpimi tsirapachinajun. Shina rurashpaca, cuerpopi mapatalla anchuchishpami, Diospajlla cachun ruranajun.
14Cristopaj yahuarca, ¿nachu chaitaca yali ushaita charin? Causaita causajuj Diospaj Espiritumandami Cristoca, ima mapapash illaj cashpa, paillata Taita Diosman cararishpa huañurca. ¿Nachu chai yahuarca, causajujlla Taita Diosta servinajuchunga, huañuiman apajuj nali munaicunata rurashcamanda, nali yuyaicunata charishcata anchuchi ushan?
15Shina cashpami, gentecunahuan mushujta rurangapaj Dios ari nishcataca, paica pactachijun. Pai huañushpami, punda ari nishcata na cazushcataca anchuchirca. Dios agllashcacunaca, causaita causanata chasquichunmi, chashna huañurca.
16Imatapash carashami nishpa escribishca tiajpica, chai carashami nishpa escribij runa huañunapachami.
17Carashami nij runa huañujpillami, japi ushan. Chai carashami nishpa escribij runa causajujpica, imapash na alichu.
18Shinallata punda ari nishcapash, animalcunapaj yahuarhuanllatami callarishca.
19Mandashca shimicunapi imata nijujtapash, Moisesca tucuicunaman villashca jipallami shicucunapaj, jari chivocunapaj yahuarta yacundi japishpa, hisopo nishca yura malquipi, puca milmata huatashpa mutiyachishca. Shina mutiyachishpami, pai charijuj libropipash, tucui gentecunapipash tsirapachishca.
20Moisesca cashnami nishca: “Ñucanchihuan Taita Dios ari nishcataca, cai yahuarmi ricuchijun” nishcami.
21Chashna rurashca jipapashmi Moisesca, Diospaj jatun carpapipash, Diospajta rurangapaj chai ucupi ima tiashcacunapipash tsirapachishca.
22Mandashca shimipi nishcashna yahuarta tsirapachijpimi, ashamandalla na tucuilla mapa illaj tucun. Yahuarta na jichashca cashpaca Diosca, juchacunataca na anchuchinmanllu.
Cristo huañushpami, juchataca anchuchishca23Jahua pachapi ima tiajujcunaman rijchajta caipi rurashcacuna mapa illaj cachunmi, animalcunapaj yahuarta jichanapacha carca. Ashtahuangarin jahua pachapi imalla tiajujcunaca, animalcunapaj yahuartapash yali alipacha yahuartami minishtin.
24Cristoca, na runacuna rurashca, Diospajlla huasiman yaicurcachu. Ashtahuangarin jahua pachapi tiajuj Taita Diospaj ñaupajmanmi, ñucanchimanda cararingapaj yaicurca. Chai carpaca, jahua pachapi Diospaj huasi tiajujtapachami ricuchijushca.
25Animalpaj yahuarta apashpa, huatapi huatapi Diospajlla shicanyachishca ucuman, curacunata mandaj cura yaicunashnaca na yaicurcachu. Ashtahuangarin Cristoca, cutin cutin Diosman cararishpa huañungapaca, na yaicurcachu.
26Shina cashpaca, cai pachata rurai punllamandapacha, cutin cutin huañunatami charinman carca. Ashtahuangarin cunan tucurimui punllacunapimi Cristoca, shuj viajella shamushpa, gentecunapaj juchacunataca anchuchingapaj, Diosman cararishpa huañurca.
27Shinallatami gentecunatapash, tucuicuna shuj viajella huañuchun churashca. Chai jipaca, llaquichi tucuchunmi churashca.
28Shinallatami Cristoca, ashtacacunapaj juchacunata anchuchingapaj, Diosman paillata shuj viajella cararishpa huañurca. Paica, juchacunata anchuchingapaca na shamungachu. Ashtahuangarin pai shamunata shuyajcunata quishpichingapajmi shamunga.
Who We AreWhat We EelieveWhat We Do
2025 by iamachristian.org,Inc All rights reserved.