Psalms 78 - Quichua Imbabura Bible

Jerusalenda urmachishcamandami huacashcaAsaf shuti runa rurashca Salmomi.

1Ñuca agllashcacuna, ñuca mandashcata uyaichiyari.

Ñuca rimashca shimicunataca,

rinrita mañachishpa uyaichiyari.

2Ñuca shimita pascashpami,

yarichij shimicunata rimagrini.

Ñaupa huatacunamandapacha pacalla

tiashcacunatami villagrini.

3Chaicunataca, ñucanchi ñaupa taitacuna

parlajpi uyashpami yacharcanchi.

4Chaicunataca, paicunapaj huahuacunamambash,

na pacashunllu.

Jipa miraicunamanmi, Mandaj Diosta

alicachinata parlashun.

Shinallata ninan ushaita pai charijtapash,

ima juyaillacunata rurashcatapashmi parlashun.

5Paimi, Jacobopaj mirai israelcunaman

imashna causanata yachachishpa, mandashca

shimicunatapash churarca.

Ñucanchi ñaupa taitacunamanmi, chaicunataca

paicunapaj huahuacunaman villachun mandarca.

6Jipa miraicunapash, jipaman huacharina

huahuacunapash yachachunmi curca.

Paicuna jatunyashpa, paicunapaj huahuacunaman

villachunmi curca.

7Taita Diosta yariashpa causachunmi curca.

Taita Dios imata rurashcacunatapash,

ama cungachunmi curca.

Pai mandashcacunatapash cazuchunmi curca.

8Cangunapaj ñaupa taitacunashnaca,

na canachu canguichi.

Paicunaca shinlli shungupacha tucushca,

na cazuj miraicunami carca.

Chai miraicunaca, paicunapaj shungutapash

na alichirishcachu carca.

Paicunapaj espiritupashmi, Taita Diosmanda anchurirca.

9Efrainbaj miraicunaca arcocunata,

flechacunata charishpapash, macanajui

punllapica tigrashpami calpaca.

10Taita Dioshuan ari nishcataca, na pactachircachu.

Pai mandashca shimicunapi nijunshna

puringapajpash na munarcachu.

11Ashtahuangarin pai imatalla rurashcatapash, jatun

juyaillanacunata ricuchishcatapashmi cunganajurca.

12Paicunapaj ñaupa taitacuna ricujtami,

juyaillanacunata rurarca.

Chaicunataca, Egipto llactapi tiaj

Zoán shuti pambapimi rurarca.

13Mama cuchata chaupishpami, paicunataca chimbachirca.

Yacucunataca, shujlla mundundashna rurashpami jarcarca.

14Punllapica, fuyuhuanmi pushajurca.

Tucui tutapica, ninahuan punchayachishpami pushajurca.

15Jichushca pambapipash, jaca rumicunata

chaupishpami, manllanayai ucu ucu jatun

yacucunamandashna yacuta ufiachirca.

16Jaca rumimandaca, ninanda rijuj yacucunata

llujchishpami, jatun yacutashna urai calpachirca.

17Ashtahuangarin paita fiñashpami,

juchata ashtahuan ruranajurca.

Jahua pachapi causajuj Diosta, jichushca

pambapi fiñashpami, chashna ruranajurca.

18Chashnami paicunapaj shungupica,

paicuna munashca micunata cuchun,

Taita Diosta mañashpa fiñachinajurca.

19Taita Diosta fiñashpami, cashna rimanajurca:

“¿Diosca, jichushca pambapica,

mezata mandai ushangachu?

20Ricuichi, jatun rumita faquijpimi, yacucunaca llujshirca.

Ninanda rijuj yacucunaca, pambacunapipashmi jundarca.

¿Tandatapash carai ushangachu imashi?

Pai agllashcacunaman carangapaca,

¿aichatapash charingachu imashi?” ninajurcami.

21Chashna ninajujta Mandaj Dios

uyashpami, ninandapacha fiñarirca.

Jacobopaj mirai israelcunahuanga,

nina japirinshnami ñapash fiñarirca.

22Taita Diostapash na crinajushcamanda,

pai quishpichinatapash na yariashpa

causanajushcamandami, chashna fiñarirca.

23Shina cashpapash jahuamandami, fuyuta cachamurca.

Jahua pacha pungucunatapashmi pascarca.

24Shina rurashpami, paicuna micunajuchunga,

maná shuti micunata tamiachirca.

Trigotapash, jahua pachamandami caramurca.

25Runacunaca, alicachi tucushcacunapaj

tandatami micunajurca.

Micunataca, na ushangacaman micungacamanmi cachamujurca.

26Urai lado huairata, jahua pachapi

cuyuchishpami, urai lado huairataca,

paipaj ninan ushaihuan cachamurca.

27Chashna rurashpami aichataca, ñutu alpatashna

paicunapaj jahuapi tamiachimurca.

Jahuata rij alasyu animalcunataca, mama

cucha t'iyutashnami tamiachimurca.

28Chai animalcunataca, paicuna causanajuj

carpa muyundi chaupicunapimi urmachimurca.

29Chaicunataca, na munajtami micunajurca.

Paicuna munashcatami, Diosca pactachirca.

30Paicuna munashcataca, nara chingachishcachu carca.

Micunapash shimipirami carca.

31Taita Dios ñapash fiñarishpaca,

maijan ashtahuan shinlli runacunatami huañuchirca.

Agllashca israelcunatami urmachirca.

32Tucui chaita rurajpipash,

juchata ashtahuan ruranajurcarami.

Juyaillagucunata pai rurashcatapash, na crinajurcachu.

33Shinamandami, paicuna causana

punllacunataca yangata chingachirca.

Paicuna causanajushca huatacunatapash,

jatun llaquimanmi tigrachirca.

34Paicunata huañuchijpica, chai

horasmi Taita Diosta mascanajurca.

Shina rurajpimi, na samashpa

ninanda paitaca mascanajurca.

35Paicunaca, Taita Dios paicunata pacaj cajta,

jahua pachapi causajuj Taita Dios paicunata

quishpichij cajtapashmi yarinajurca.

36Ashtahuangarin, paicunapaj shimihuanga

uyanayaita llullashpa parlashpami,

paicunapaj jalluhuanga llullanajurca.

37Paicunapaj shunguca, napacha Dioshuan alichu carca.

Paihuan ari nishcatapash, napacha

ali pactachinajurcachu.

38Ashtahuangarin paica llaquij cashpami,

paicuna nalita rurashcatapash cungashpa,

paicunataca na tucuchishpa saquirca.

Pai ninanda fiñarishca cashpapash,

na llaquichishpami cutin cutin saquirca.

Yapata fiñarishpa llaquichinatapash jarcarircami.

39Paicunataca, huañuna aichayu

runacuna cajtami yarirca.

Fucujpi samai llujshishpaca, cutinga na

tigramunshna cajtami yarirca.

40¡Cutin cutinmari jichushca pambapica,

paita na cazunajurca!

Imapash na tiaj pambapimari fiñachinajurca.

41Cutin, cutinmi Taita Diostaca,

paicuna munashcata rurachun mañanajurca.

Shina rurashpami, israelcunapaj

jucha illaj Diostaca fiñachinajurca.

42Llaquinayaita causanajujpi,

shuj punlla paipaj maquihuan

llujchishcataca, na yarinajurcachu.

43Egiptopica, imatapash rurashpami ricuchijurca.

Zoán shuti pambapica, juyaillacunatami rurarca.

44Chaipica, pipash ama ufiai ushachunmi,

paicunapaj jatun yacucunatapash, ninanda

rijuj yacucunatapash yahuarman tigrachirca.

45Paicuna puramanllatami, ashtaca millai

chuspicunata, sapocunata cacharca.

Chaicunami, ima tiashcatapash micushpa tucuchinajurca.

46Paicunapaj granocuna fucushcatapash,

oruga nishca jurucunamanmi curca.

Paicuna tarpushca chagracunatapash,

langosta jurucunamanmi curca.

47Paicunapaj uvas chagracunataca,

runduhuanmi tucuchirca.

Jigos yuracunatapash, casahuanmi tucuchirca.

48Paicunapaj tucui animalcunatapash,

huagracunatapash racu runduhuan, rayohuanmi huañuchirca.

49Egiptopi causajcunapaj jahuapimi, nina

japirinshna fiñarishcata cacharca.

Fiñarishcatapash, ninan llaquitapash,

nanaitapashmi cacharca.

Tucuchij ashtacata angelcunatami cacharca.

50Pai ninanda fiñarishpa huañuchingapaj yarishpami,

paicunapaj causai huañunataca na cuidarca.

Ashtahuangarin paicunapaj causaitaca,

huañuimanmi curca.

51Egipto llactapica, punda huacharishcacunataca,

tucuillatami huañuchirca.

Cam shuti runapaj miraicunapaj carpacunapica,

shinlli runa cashpa charishca punda

churicunatami huañuchirca.

52Pai agllashcacunataca, llamacunata

llujchinshnami, Egiptomandaca llujchimurca.

Jichushca pambatapash, ashtaca

llamacunatashnami pushamurca.

53Imatapash ama manllachunmi,

alipacha cuidashpa pushamurca.

Paicunata fiñajcunataca, mama cuchami quilparca.

54Chai jipaca, Diospajlla llactapaj

linderocunamanmi chayachimurca.

Paipaj ali lado maquihuan mishashca

cai urcumanmi pushamurca.

55Israelcunapaj ñaupajpimi, llactacunapi

causajcunataca llujchishpa cacharca.

Chai jipaca, cabiacunahuan medishpami,

alpacunataca chaupishpa cararca.

Shina rurashpami, chai runacuna

causanajushca huasicunapica,

Israel aillucuna causanajuchun churarca.

56Shina rurajpipash paicunaca, jahua pachapi

causajuj Taita Dios imatalla rurashcata

ricungapaj munashpami fiñachinajurca.

Imashna causanata pai yachachishca

shimicunatapash, na cazunajurcachu.

57Ashtahuangarin paicunapaj ñaupa

taitacunashnallatami, paita jariyashpa

huashaman tigranajurca.

Flechata na aliguta shitaj,

umachij arcoshnami tucunajurca.

58Paicunapaj lomacunapi, altarcunahuanmi fiñachinajurca.

Imamambash rijchaj labrashca paicunapaj

dioscunahuanmi, ninandapacha fiñachinajurca.

59Shina ruranajujta Taita Dios uyashpami,

israelcunata fiñashpa ninandapacha na ricunayachirca.

60Chaimandami, Silo shuti pueblopi

tiajuj paipaj carpataca jichurca.

Gentecunapaj chaupipi causajushca carpatami,

chashna jichurca.

61Paipaj ushaita ricuchijujtapash,

prezu apachunmi saquirca.

Pai punchapamba cajtapash,

paita fiñajpaj maquipimi saquirca.

62Pai agllashcacunataca, espadahuan

huañuchinajuchunmi curca.

Paipaj cachun agllashcacunahuanga,

ninandapachami fiñarirca.

63Paicunapaj chairalla viñaicunataca,

ninami tucuchirca.

Jarihuan nara tacarishca cuitsapajpash,

cazaraipi alicachishpa candanaca na tiarcachu.

64Paicunapaj curacunaca, espadahuanmi

huañuchi tucunajurca.

Paicuna huañujpi sapalla tucushca

huarmigucunapash, na huacai ushanajurcachu.

65Chai jipami Jatun Diosca,

puñujushpa rijcharinshna jatarirca.

Shuj shinlli runa vinota ufiashpa,

machashpa caparijunshnami carca.

66Shina jatarishpami paita fiñajcunataca,

huashamanda japishpa chugrichirca.

Tucui causaicaman rimai tucushpa,

pingai tucuchunmi saquirca.

67Diosca, Josepaj miraicunapaj carpa huasitaca

jichushpami, Efraín aillutaca na agllarca.

68Ashtahuangarin Judá aillutami agllarca.

Pai juyashca Sion urcutami agllarca.

69Chaipimi paipaj huasitaca, cai pachata,

causaita causaicaman shinlli shayajuchun

churashcashna juyaillagutapacha shayachirca.

70Paita servij Davidtami agllarca.

Paitaca, llama corralta cuidajtami agllarca.

71Chairalla huacharishca llamacunata

cuidajujtami pushamurca.

Diosca, Jacobopaj mirai paipajlla

israelcunata michijuchunmi pushamurca.

72Davidca, israelcunataca ali

shunguta charishcashnallatami michijurca.

Ali yachajushca paipaj maquihuambachami

cuidashpa michijurca.