ROMANOS 7 - Quichua Imbabura Bible

Cazarashcahuan chimbapurashpami yachachijun

1Mandashca shimicunapi imata nijujtapash, tucui crijcunallata, alimi yachanguichi. (Mandashca shimicunaca causajpillami, pitapash mandashpa chari ushan).

2Cazarashca huarmica cusa causajujpica, mandashcapi nijunshnallatami cusata cazushpa causana. Ashtahuangarin cusa huañujpica, cusa mandajushcamandaca cacharishcami.

3Shinamandami, cusa causajpillata shujhuan causashpaca, huainayashpami causajun ni tucunga. Ashtahuangarin cusa huañujpica, pai mandajujmandaca cacharishcami. Shina cashpami shujhuan cazarashpapash, na huainayashpa causajun.

4Ñuca juyashca crijcuna, cangunapash shinallatami mandashca shimicunata ama rurangapaj, Cristopaj cuerpohuan huañushcashna canguichi. Shujpaj cangapajmi, chashna tucushcanguichi. Shinamandami, huañushcacunapaj chaupimanda causarishca Cristopaj canguichi. Taita Diospajtalla aliguta grano fucunshna rurangapajmi canguichi.

5Ñucanchipaj munaitalla rurashpa causajpimi, mandashca shimicunaca, juchata rurana munaicunata ñucanchi cuerpopi ima tiajtapash yarichijurca. Shina cashpami granota fucuchinshna, huañushpa chingagringapajlla imatapash ruranajurcanchi.

6Ashtahuangarin cunanga, chai mandashca shimicunamandaca cachari tucushcashnami canchi. Chai mandashca shimicuna mandajpimi causarcanchi. Shinamandami, chai escribishca shimicunaca, na ashtahuan mandachun, ashtahuangarin Diostalla servinajuchun, paipaj Espíritu mushujta mandashpa yachachijun cacharichirca.

Juchami, ñucapi causajun nishcami

7Shina cajpica: ¿“Mandashca shimicunataca nalichu” ninachu canchi? Napacha shinachu. Juchapi ñucanchi causanajushcata na yachashcanichu, ashtahuangarin mandashca shimicunamandami yacharcani. Mandashca shimipica: “Shujcuna imata charijtapash, na munanachu cangui” nishpa na yachachijpica, shujcuna imata charijtapash munanataca na yachaimanllu carcani.

8Ashtahuangarin mandashca shimipi chashna nijujpimi, juchaca ashtahuan shujcuna imata charishcatapash munachun yarichihuarca. Mandashca shimicuna illajpica, juchata ruranaca huañushcashnami.

9Mandashcapi imata nijujtapash na yachashpami, punda punllacunaca causajurcani. Ashtahuangarin mandashca shimicunata yachajushpaca, juchata ruranaca causarinshna ninanda yarichijpimi ñucaca huañurcani.

10Shinallata causaita carachun Dios cushca mandashca shimicunallata ñucataca, huañuiman apajushcatapashmi yacharcani.

11Mandashcapica, juchataca na ruranachu nijujpimi juchaca, ñapash umachishpa huañuchihuarca.

12Mandashca shimicunataca, Diosmi carashca. Chai shimicunaca na llullaj, jucha illajmi. Jucha illaj chai mandashca shimicunaca, imatapash cashcatapacha ruraj aligupachami.

13Shina cashpaca, ¿chai ali mandashcachu ñucataca huañuchihuashca? Napacha shinachu. Ashtahuangarin juchata ruranaca, napacha alichu nishpa, mandashca shimicunapi ricuchijpimi, ñucataca juchaca huañuchihuarca. Chaimandami juchata ruranaca, napacha ali cajta chai mandashca shimicunaca ricuchihuarca.

14Mandashca shimicunataca, Dios carashcatami yachanchi. Ashtahuangarin tucurinalla aichayu cashpami, juchata rurangapaj ñucallata jatui tucushcani.

15Ñuca imata rurashpa causajuitaca, ñucallata na yachanichu. Ñuca imaguta alita rurangapaj munashcataca, na rurai ushanichu. Ashtahuangarin ñuca na ricunayachishcatarami rurani.

16Ñuca imatami na rurangapaj munani, chaitarami rurani. Shinamandami, mandashca shimicunataca alicachini.

17Shina cashpami, na ñuca munailla chai nalitaca rurajuni. Ashtahuangarin ñucapi causajuj chai juchami, imatapash nalitara rurachijuhuan.

18Shinamandami ñuca cuerpopica, ñucallata aliguta ruranaca na tiajta yachani. Shina cajpipash imagutapash aliguta rurana munaica, ñucapica tianmi. Ashtahuangarin chai aliguta ruraitami, na ushani.

19Aliguta rurangapaj munashcataca, na ruranichu. Ashtahuangarin imatami na munani, chai nalitarami ruranilla.

20Ñuca na munashca nalitara rurashpaca, na ñuca ruranichu. Ashtahuangarin ñucapi tiajuj juchami, chashna nalitara rurachijuchun.

21Shinamandami imatapash aliguta rurangapaj ñuca munajushpaca, cai mandashcatara tarini: Nalita rurana munaica, ñucapillata tiajujtami tarini.

22Ñuca shungupica, Taita Dios mandashcata rurashpami cushijuni.

23Shina cajpipash, ñuca cuerpopi tiajcunata mandajuj nali munaimi, aliguta ruranata ñucata yarichijhuanga macanajujujta ricuni. Ñuca cuerpopi tiajcunata juchata rurachun mandajujmi, ñucataca prezushcatashna charijun.

24¡Imapajpash na valij, aij ñucalla! Huañuchun charijuj cai cuerpomandaca, ¿pita ñucataca cacharichihuanga?

25Ashtahuangarin ñuca Taita Diostami, ñucanchi Apunchi Jesucristomandaca pashi nijuni. Shina cashpami ñuca yuyaihuanga, Taita Dios mandashcata servishpa pactachijuni. Ashtahuangarin cuerpohuanga, jucha mandajujtarami rurajuni.