2 CRÓNICAS 33 - Quichua Imbabura Bible

Manasés shuti runami mandajushca(2 Rey. 21:1-18)

1Manasés shuti runaca, chunga ishcai huatata charishpami, mandai callarirca. Paica, picha chunga picha huatatami Jerusalenbi mandajurca.

2Ashtahuangarin Mandaj Diospaj ñaupajpica, nalita rurashpami causajurca. Paica, israelcunapaj ñaupajmanda Mandaj Dios llujchishpa cachashca gentecuna millanayaicunata rurashcashnallatami rurajurca.

3Lomacunapi tiaj altarcunata paipaj taita Ezequías runa shitashcatapash, paimi cutin shayachirca. Shinallata Baal shuti dioscunamambashmi, altarcunata rurarca. Asera shuti huarmi diosman rijchajcunatapashmi rurarca. Jahua pachapi tiaj tucui luzerocunatapashmi, ninanda alicachijurca. Tucui chaicunatami, alicachishpa mañajurca.

4Mandaj Diospaj huasipipashmi, altarcunata shayachirca. Chai huasitami, Mandaj Diosca: “Jerusalenbi tiaj ñuca huasipimi, ñuca shutica causaita causaicaman causajunga” nishca carca.

5Shinallata Mandaj Diospaj huasi ishcandi patiopimi, jahua pachapi tiaj tucui luzerocunaman altarcunata rurarca.

6Manasés dhuti runaca, paipaj churicunata dioscunaman cushpami, Hinom shuti runapaj churipaj pugru pambapi rupachijurca. Shamui punllacunapi ima tucunata yachajpash, brujurishpa causajpash, yachajcunahuanlla causajpash, muspachij yumbucunata tapujpash, imata cashpapash chai yachajcunata tapujpashmi carca. Mandaj Diospaj ñaupajpi chashna yapa nalita rurashpami, ninandapacha fiñachijurca.

7Chai jahuami Manasés runaca, yacuyachishpa rurashca imamambash shuj rijchaj diostapash, Taita Diospaj huasipi churarca. Chai huasitami Taita Diosca, Davidtapash, paipaj churi Salomondapash, cashna nishca carca: “Cai huasitapash, Jerusalendapash, tucui Israel aillu puracunamandami agllarcani. Cai huasipimi ñuca shutitaca, causaita causachun churasha.

8Tucui imatalla ñuca mandashcata, mandashca shimicunata, escribichishca shimicunata, Moisesman mandashcashnallata pactachishpa causanguichi. Shina causajpica can israelcunataca, cangunapaj ñaupa taitacunaman carashca cai llactamandaca napacha cutinga llujchishpa cachashachu” nishcami carca.

9Ashtahuangarin Manasés runaca, Judá llactapi, Jerusalenbi causajcunataca, israelcunapaj ñaupajpi Mandaj Dios tucuchishca gentecunatapash yali jatun nalita rurachingapajmi, ninanda pandachirca.

10Shinamandami Mandaj Diosca, Manasés runamambash, Diosllata agllashca israelcunamambash villachirca. Ashtahuangarin paicunaca, napacha cazurcachu.

11Chaimandami Mandaj Diosca, paicunata llaquichijuchunga, asiriocunata jatun mandajpaj soldadocunata mandajcunata apamurca. Paicunami Manasés runataca, grillocunata churachishpa, cadenacunahuan huatashpa, Babiloniaman prezu apanajurca.

12Ashtahuangarin chai jipaca, ninan llaquicunata ña apajushpami Manasés runaca, paipaj ñaupa taitacunapaj Taita Diospaj ñaupajpi ninandapacha pingai tucushpa, urai cumurishpa, Mandaj Taita Diostaca mañajurca.

13Chashna mañajujpica, Diosca uyarcami. Pai mañajujta Taita Dios uyashpami, Judá llactataca paillata mandashpa catichun, paitaca Jerusalenman cutin tigrachirca. Shina rurajpimi Manasés runaca, Mandaj Diostaca Taita Diospacha cajta yacharca.

14Chai jipami Manasés runaca, Davidpaj pueblo muyundi canlla ladotaca, jatun pircata rurarca. Indi huashajuj ladoman tiaj Gihón shuti pugru pambamanda pircai callarishpaca, Pijihuan yaicuna pungucamanmi pircarca. Chai jipami, Ofel shuti pueblo muyunditapash, ashtahuan jatun pircata rurachirca. Shinallata Judá llactapica, muyundi jatun pircacunata charij tucui pueblocunapimi, soldadocunata mandajcunata churarca.

15Shinallata Mandaj Diospaj huasimandaca, shuj dioscunatapash, yanga diostapashmi anchuchirca. Lomapi huasichishca Mandaj Diospaj huasipi rurashca tucui altarcunatapash, Jerusalenbi rurashca altarcunatapashmi, pueblomanda llujchishpa shitarca.

16Chai jipaca, Mandaj Diospaj altarta cutin alichishpami, Dioshuan ali cangapaj cushpa huañuchishca animaltapash, Diosta alicachishpa carashpa huañuchishca animaltapash, chai altarpi huañuchijurca. Shinallata Judá llactapi causajcunataca, israelcunata Mandaj Taita Diosta servinajuchunmi mandarca.

17Ashtahuangarin gentecunaca, paicunata Mandaj Taita Diosman animalcunata carashpapash, lomacunapi tiaj altarcunapillatami huañuchinajurca.

18Manasés runa ashtahuan imatalla rurashcapash, paipaj Taita Diosta mañashcapash, Dios ricuchishcata villajcuna israelcunata Mandaj Taita Diospaj shutipi paita rimashca shimicunapash, Israel llactata jatun mandajcuna imatalla rurashcacunata escribishca libropimi tucuillata escribishca tiajun.

19Taita Diosta pai mañajpi tigrachishcapash, tucui juchacunata rurashcapash, yachashpata na cazushcapash, nalita rurashcamanda nara llaquirishpa, maipilla altarcunata rurashca pushtucunamandapash, Asera shuti huarmi diosman rijchajcunata churashcapash, yanga dioscunata rurashcapash, Dios ricuchishcata villajcuna escribishca shimicunapimi tiajun.

20Manasés runa huañushpa, paipaj ñaupa taitacunahuan tandanajujpica, mandana huasi ladopimi pambarca. Paipaj randica, Amón shuti paipaj churimi mandajurca.

Amón shuti runami mandajushca(2 Rey. 21:19-26)

21Amón shuti runaca, ishcai chunga ishcai huatata charishpami, mandai callarirca. Paica, ishcai huatatami Jerusalenbi mandajurca.

22Paipash, Mandaj Diospaj ñaupajpica, paipaj taita Manasés shuti runa rurashcashnallatami nalitalla rurajurca. Paica, paipaj taita Manasés runa rurachishca tucui chai yanga dioscunaman animalcunata cushpa huañuchishpami causajurca.

23Chashna causajushpapash, Mandaj Diospaj ñaupajpi paipaj taita Manasés runa pingai tucushpa urai cumurishcashnaca, napacha pingai tucurcachu. Ashtahuangarin juchacunatallami, ashtahuan mirachijurca.

24Paitaca, paita servijcunallata pacalla jatarishpami, paipaj huasipillata huañuchirca.

25Ashtahuangarin jatun mandaj Amón shuti runata huañuchingapaj pacalla jatarijcunataca, chai llactapi causanajuj gentecunallatami, tucuillata huañuchirca. Chai llactapi causajcunaca, Amón shuti runapaj churi Josías runatami, paipaj randi jatun mandaj cachun churarca.